Read Angami Naga Joshua 24 Bible Online

Joshua 24 - Angami Naga bible

Joshua 24

¹Sitse Joshuae Israel seyie pete pfhü kengu ze vo Shekem nu shülie, di Israel phichüko, krütako, capiko mu kezhamiako kieshü; ru ukoe Kepenuopfü mhodzünu vorlie.

²Sidi Joshuae themia peteko ki, “Jihova Israel Kepenuopfüe hakemhie puya: Thiedzütho nie pfutsanuoko, Tera, Abraham mu Nahor unie puou, uko Eufrat rü lu tsakhie lhou, sidi ukoe terhuo kekrei lie chü vor.

³Derei a kerü lu tsatienu nie puo Abraham ze Kanan kijü pete pfüthe vorshü, sidi puo nuolhou chüpekrashü. A Isak khapie puo tsüshü;

⁴mu ae Jakob mu Isau khapie Isak tsüshü. Mu ae Seir kijüthou rünau Edom khapie Esau tsüshü. derei Jakob mu puo nuonuoko we Ijipt nu tsuta.

⁵Kenuotsa a Mosa mu Aron unie ketseshü, mu ae sünu mhachüshü di Ijipt pechüpenyüshü; sidi nieko ze parshüte.

⁶Ae Ijipt nunu nie puonuoko zeparlie, di nie bu dzükezha nu vorlie, mu Ijiptkoe gari mu gura geinu nie puonuoko whuo zo Kemerie Dzükezha[27] nu vor tso.

⁷Derei ukoe Jihova ki uko mezhiemeloshü tse, puoe kezei khapie Ijiptmia mu uko donushü, sidi dzükezha bu krutsur uko vuwa; a Ijiptmiako gei kedipuo chüshü shikecü nie mhipie ngu. Süsie niekoe teicie kekra nhatsa nu lhou.

⁸Ae nieko ze Jordan niathutsa lhoukeba Amorko kijü nu vorshü; ukoe nie ze kegei, derei a uko khapie nieko dzienu shü, mu ae nie mhodzünu uko pekawa; tsiu niekoe uko kijü pevielie.

⁹Siro Zipor nuou Balak, Moab kediu, Israel ze kegeituoü sie, sidi nieko rüsewaketuo la mia ketse pie Beor nuou Balam kie,

¹⁰derei ae Balam pfhe rünyü mvüta; süla puo bu japie nieko tsü; sidi a puo dzie nunu nieko kelashü.

¹¹Siro niekoe Jordan ciese Jeriko nu vorlie, Jeriko themiako nie ze kegei; sükemhiei Amorko, Perizko, Kananko, Hitko, Girgashko, Hivko; mu Jebusko rei nie ze kegei; derei a süko pete khapie nie dzie nu shüshü.

¹²Ae nieko mhodzü pfhidi ketseshü di süko bu nie mhodzü vo Amorko kedinie whuowa; süu nie zhiecha mu nie theü se chülie mo.

¹³Nie mhachü kemezhiekecü nunu ngulie kemo kijü puo, mu nie thuo chükemo rünako se nie tsüshü; mu nie süko nu lhou bate; sidi nie pelhoushü kemo khubelie mu Oliv lie nunu puo si riecü bate.”

¹⁴“Joshua-e die pu sa di, süla tsie Jihova preilie mu nie nou nie thochü di puo lie chülie; nie pfutsanuokoe Kerükhie kekreitsa nu Ijipt nu terhuo liechü kevorko khawalie, sidi Jihova liechülie.

¹⁵Mu Jihova liekechü nieko mhodzü ki mha kesuo üro, nie supuo lie chütuo shiü thie nie thuo kedaliecie, nie pfutsanuoko Kerükhie kekreitsa nu terhuo lie chü kevorko tuo mo, nie u kijü nu keba Amormia rhuoko tuo shi; derei a mu a kikru zowe Jihova lie chü zotuo” sishü.

¹⁶Themiakoe la sie, “Jihova khawa di terhuo kekrei lie chütaketuo nouleu bu hie penuo hie!

¹⁷Kekreilamonyü Ijipt kijü nu miadiekechü nunu hieko mu hie puonuoko zeparkelieu sü Jihova hie Kepenuopfü thuo zo, puoe hie rüve cha pete nu mu hie vokecü seyieko pete donunu hie pekru se vorshü zo,

¹⁸mu Jihovae hie mhodzünu seyieko pete whuowa, sizomonyü rünau nu lhoukeba Amorko rei whuowa. Süla hie rei Jihova lie chü zotuo, kekreilamonyü puoe hie Kepenuopfü zocü la.”

¹⁹Derei Joshua la sie themiako ki, “Nieko Jihova lie chülie kenjü; puoe kemesa Kepenuopfü; Puo rokenyi Kepenuopfü puo zo. Puoe nie vajokewako morei nie kephouma vashü nie tsülie lho.

²⁰Nie Jihova khawa di kekreimia rhuoko lie chüta ro, puoe nie gei mha kevi chüshü kevor nunu rürei la vor nie pechü mu nie pekapejüwatuo.”

²¹Sirei themiakoe Joshua ki, “Mo! hie Jihova lie chü zotuo” sita.

²²Sitse Joshuae themiako ki, “Nie Jihova lie chü zotuoü di puo kedalieta ketho ükecü nie thuo nie zhapuko zo ho” sishü, ru ukoe sie, “U zo, hie-e zhapuko zo” sishü.

²³Sitse Joshuae sie, “Sizoü liro, tsie nie donu miaramia rhuoko khakegewalie, sidi nie nou khapie Jihova, Israel Kepenuopfü kitsashülie” sishü.

²⁴Themiakoe Joshua ki, “Hie Jihova hie Kepenuopfü lie chü zotuo, mu hie Puo die khakeshüko ze zotuo” sishü.

²⁵Süla Joshuae sünhie, themiako ze dietseidiekho puo chülie, sidi Shekem nunu uko la thezhoko mu medziketuo ahzako khashü.

²⁶Mu Joshuae die hako pete pie Jihova zho leshüdau nu thulie. Sidi puoe ketsie kezha puo pielie di, Jihova Kemesa chüu nu phriebo puo khro nu ketsieu seshü.

²⁷Sidi Joshuae themiako ki, “Meholiecie, ketsie hau bu u petsoukecü sakhi puo chütuo; we Jihova die uki pukeshü peteko siliete; süla nie nie Kepenuopfü gei tijüta liro, hau bu nie kepetsou sakhi puotuo” sishü.

²⁸Süsie Joshuae themiako ketsepie u thuo u kayie nu shüwa.

²⁹Mha hako tseiketa sie, Nun nuou Joshua, Jihova kituou cie krie puo di kerta di siata.

³⁰Sidi ukoe Gash kijüthou peso kevatsa, Efraim kijüthou rüna nu, puo kayie kijü Timnath-sera nunu puo khruwa.

³¹Joshua kerhei chie, mu puo ze kelhou phichüko, Jihovae Israel la mhachükeshü pete si mu ngukecüko kerhei ki we Israelko Jihova lie chü vor.

³²Mu Israelko Ijipt nunu se kevor Josef ruko pie Shekem nu khruwa mu süu Jakob-e Shekem nuo puo Hamor nuonuoko kinu raka krie puo[28] pie khrükelie kijüu nu; mu kijü süu pie Josef nuonuoko kayie vie chüta.

³³Mu Aron nuou Eliazar rei siata, di ukoe puo pie Gibia nu, puo nuou Finehas ketsü kijü, Efraim kijüthou rüna nu khruwa.