Read Angami Naga Joshua 3 Bible Online

Joshua 3 - Angami Naga bible

Joshua 3

¹Süsieduü khiserüna Joshua mu Israelko pete sie zilie, sidi Shitim nunu tuo Jordan nu kerlie. Sitse uko süu cie prakecü mhodzü süki nu razhü chü.

²Teisozha se sie krütakoe razhüchüko nu whi vo,

³mu themiako ki sie, “Levi zievokoe Jihova nie Kepenuopfü dietseidiekho bouu pie kevor ngu tse, nie kebachüko nunu tuoshülie. Sidi süu medzilie.

⁴Sitse niekoe nie voketuo chau silietuo, nie hadzü cha hanu vor mo zocü la. Sirei süu ze kepecie tuolie, thu nyie kenie kepecie nu tuolie; süu penuo vo hie” sishü.

⁵Joshuae sie themiako ki, “Nie chükemesalie, kekreilamonyü Jihova sodu nie donu ungomhatho chüshütuo” isi.

⁶Süsie Joshua zievoko ki “Dietseidiekho bouu toupielie di themiako mhodzü tuoshülie” sishü. Süla ukoe dietseidiekhobouu pielie di themiako mhodzü tuoshü.

⁷Jihovae Joshua ki, “A thie Israelmia pete mhingu nunu n chüpezha sedeshütatuo, sitse ukoe a Mosa zeketuo tuoi n ze rei tuo zokecü silietuo.

⁸Siro noe dietseidiekho bouu kepie zievoko ki hakemhie pushü tuo, ‘Niekoe Jordan rüu dzükhie vorlie tse, sei-i thalie’ ” sishü.

⁹Sitse Joshua themiako ki, “Penuo vorlie di Jihova nie Kepenuopfü dieko rünyüliecie” si.

¹⁰Joshua sie, “Nieko hanu nu rheituoyakezha Ukepenuopfü nieko donu ba ücü mu nieko mhodzünu nu Kananko, Hitko, Hivko, Perizko, Girgashko, Amorko mu Jebusko whuo touwa zotuocü silietuo:

¹¹Kijü pete Niepuu dietseidiekho bouu nie mhodzünu Jordan nu votazhie.

¹²Süla tsie Israel seyieko donunu seyie puo nu mia puopuo idi mia kerekenie kedalie cie.

¹³Niepuu kijü pete Jihova dietseidiekho bouu pieketuo zievoko phizhü le dzü prashü ro, Jordan dzükru khawatuo, sidi dzükru kerkezhüko thechü puo nu thatatuo” sishü.

¹⁴Sidi themiako Jordan cie praketuo la razhüchüu nunu tuo sedeshü mu dietseidiekho kepie zievokoe themiako mhodzü tuoshü.

¹⁵Siro lieyie teiki Jordan nu dzü thu pra puo khie vutameya, mu dietseidiekho bouu kepieko Jordan nu vor tsolie di dietseidiekho bouu kepie zievoko vor kerü tsolie di u phi se dzü prashü tse,

¹⁶dzü kru kerkezhüko kru sa mota, mu pfhepfü di Zarethan kepenuo ki Adam ükecü nadiu ketso khapfü thata. Sidi Arab dzükezha Kesia Dzükezha[2] nu tsu kezhüko dathe tseiwata, sidi themiako bu Jeriko rütsietsa pralie kevi chülie.

¹⁷Tsiu Israelko kerü keso nu phikezhü ki Jihova dietseidiekho bouu kepiekoe Jordan metsuo keso nu tha di themiako bu pra tseilie kemochie metei thalie.