Read Angami Naga Joshua 4 Bible Online

Joshua 4 - Angami Naga bible

Joshua 4

¹Seyie peteu Jordan ciepralie tse, Jihova Joshua ki:

²“Themiako donu mia kerekenie kedaliecie, seyie puo nu mia puopuo idi,

³sidi uko ki, ‘Jordan metsuo nunu ketsie kerekenie chülie, zievoko kethachü touu nunu, süko pie vor di tsiezhü nieko razhü chüketuo thechüu nu shülie’ idi pushüliecie” sishü.

⁴Sitse Joshua puo thuo kedakelie mia kerekenieko kieshü, seyie puonu mia puopuo idi;

⁵uko ki, “Nieko Jordan metsuo nu phi di Jihova nie Kepenuopfü dietseidiekho-u mhodzünu nu Israel seyieko le di ketsie nieko tse chüpie nieko bouka gei shülie.

⁶Sitse mha hau nieko donu zasi puo chütuolietuo. Sidi thiesie rei nie nuonuoe ‘Ketsie hako kedipuo la ga?’ idi ketso sie ro,

⁷nie-e uko ki Jihova dietseidiekho bouu toupie kerü nu kephi ki Jordan dzükru dathe kewa dze putuo. Mu ketsie hakoha la Israelmiako haki nu kedipuo chüte shikecü Israelko bu rükra sei-ilie ketuo puo chütuo” sishü.

⁸Israelko Joshua kepu kemhiei chülie. Siro Jihovae Joshua ki die khakeshü tuoi ukoe Israel seyieko le di Jordan metsuo nunu ketsie kerekenie chülie, sidi pie vo uko razhüchüu nu khapie zhüwa.

⁹(Siro Joshua Jordan metsuo nu, dietseidiekho bouu kepie zievoko thakecü thechüu nu ketsie kerekenieko seshü; ketsie süko thie ketso rei zhüya zo.)

¹⁰Jihovae themiako bu chünu di Joshua ki diekhakeshüko chü tseiwa kemochie zievokoe Jordan rüu metsuo nu tha zolie, di Mosae Joshua ki pupieketuo dieko chü tseilie. Mu themiako bu rükrei kerüu cieprata.

¹¹Sidi themiako bu rükrei kerüu cieprata tse, Jihova dietseidiekho bouu mu zievokoe themiako mhodzünu nu tuo pralie.

¹²Siro Reuben nuomia, Gadnuomia mu Manasseh nuomia ketoupuo Mosae uko ki pukeshü mhiei ukoe rünyie se di themiako mhodzü rie vota.

¹³Sidi themia nyie hiedia mese terhü la u kesepfü di Jihova mhodzü Jeriko razhau nu pralie.

¹⁴Sünhiesü Jihovae Israelmia pete mhingu nu Joshua chüpezhashü; mu ukoe Mosa khrüprei kevor tuoi, puo kerheichie puo khrüpreilie.

¹⁵Siro Jihovae Joshua ki,

¹⁶“Dietseidiekhobouu[3] kepie zievoko bu Jordan nunu partanu di diekhashücie” sishü.

¹⁷Süla Joshuae zievoko ki, “Jordan nunu partacie” ishü.

¹⁸Ru zievokoe dietseidiekho bouu pie di Jordan rüu metsuo nunu par kijü keso nu pralie tse, thiedzü tuoi Jordan dzükru puothau nu la vorta di puokhie pete vulie.

¹⁹Themiakoe thekhrü kerieu zha ker nhie Jordan cieparlie di Jeriko khie niathutsa keba Gilgal nu uko razhüchülie.

²⁰Sidi Joshuae Gilgal nunu uko Jordan nunu pie kepar ketsie kerekenieko seshü,

²¹puoe Israelko ki, “Thiesie nie nuonuoe u krünuo ketso di, ‘Ketsie hako kedipuo la ga?’ iro,

²²nie-e uko ki, ‘Israelko-e Jordan cie kepar ki kerüu so di tuo parliewe’ idi uko bu siliecie.

²³Nie-e Jordan cieparlie kemochie, Jihova nie Kepenuopfüe Kemerie Dzükezhau[4] chü pesokeshü tuoi, Jordan rei chüpesoshü di u bu parkelie dze se uko ki putuotuo.

²⁴Sidi kijü nu themia pete bu Jihova dzie kekuo kedithede kuo shikecü silie, mu nie bu kechachie Jihova nie Kepenuopfü khrüprei tuolieketuo la” sishü.