Read Angami Naga Joshua 5 Bible Online

Joshua 5 - Angami Naga bible

Joshua 5

¹Jordan niakratsa keba Amor kediko pete mu dzükezha khie keba Kanan kediko pete Jihovae Jordan chü pesoshü di Israelko bu ciepralie ükecü dze sishü. Sitse ukoe Israelko la u melou suo mu michie phi bata.

²Süki Jihovae Joshua ki, “Tsiekhrü puoü vikecü chülie, sidi va kenieu Israelko zhürewalie” sishü.

³Süla Joshuae Jihova kepu mhiei tsiekhrü puoü kevi chülie, sidi Gibit-Haralot[5] nunu Israelko zhü relie.

⁴Mu Joshua uko zhürekecü puoca hau, Ijipt nunu kepar thepfumia pete, terhü themia pete, ukoe Ijipt nunu parkelie sienu rayha nu, chala nu siata.

⁵Ijipt nunu keparko pete u zhürewata zorei, Israel-e Ijipt nunu parkelie sie, rayhanu ketuo ki penuokelieko zhüre mo.

⁶Ukoe Jihova pfhe rünyükemo la, Israelkoe cie hiedia rayhanu nu rühou di Ijipt nunu parkelie terhümiaviko pete siata; Jihovae mithunudzü mu mepfhidzü krukezhü kijü puo khapie u tsütuo üdi uko puonuoko ki rüsekeshü uko bu we ngulie lho üdi Jihovae rüsewa.

⁷Süla Joshuae uko zhürekeshüko, puoe uko sounu sesierkeshüko nuonuoko zhürewa; chala nu uko zhüre mo zoluokecü la.

⁸Seyie pete u zhürekewa sie, vilalie kemochie razhüchü nu ba zo di menekelie tso.

⁹Jihovae Joshua ki, “A, thie, nieko Ijiptmia khrükhro ketuo thengau chü kelhouwate,” isi. Süla thie ketso rei, thechüu za pie Gilgal[6] üdi kiete.

¹⁰Israelkoe Jeriko razhau khieki nu Gilgal nunu razhü chü keba ki, zha keredia nhie thevatie ciekevo-u nyilie.

¹¹Ukoe süsienhie Kanan kijü nunu pelhoukelie vie cü kerietho chü; lhako kethuda mu khreiüshükemo niekhrüda cülie.

¹²Sidi ukoe kijüu nu lhoukelie vie cükelie sie nhie manna tsur sa mota; mu Israelko manna cü sa mota, sidi teicie süu nu Kanan nunu ciekelie vie cüta.

¹³Va puo Joshuae Jeriko khie ki keba ki puoe tosie ru themia puo zhiecha puo pie di puo mhodzünu ketha ngu. Sitse Joshuae puo ki kho puo ketso di, “No úko puo zo mo, hie kepetsoumia ga?” isi.

¹⁴Sitse puo sie, “Puo la rei mo, derei a krodiko Jihova rüpfhünuoko mho kezhau chü di tsie vor ketha zo,” isi. Ru Joshua tsu kijü zerepfü zhülie di puo rüsuota di sie puo ki, “A niepuu puo kituou bu kedipuo chü nyüya ga?” isi.

¹⁵Sitse Jihova rüpfhünuo mhokezhaue Joshua ki, “N phi geinu n phikou rhuowalie; no kethachüu mesakecü la,” si. Mu Joshuae sükemhie chülie.