Read Angami Naga Joshua 6 Bible Online

Joshua 6 - Angami Naga bible

Joshua 6

¹Jeriko nadiu sü Israelko la puo kharu khatsapfü bata; miapuorei nadiu nu le morei pra mota.

²Ru Jihovae Joshua ki, “Harie, a Jeriko, siro puo kediu mu puo chüpahiko pete pie n dzienu shüwate.

³No mu terhümiavimia pete khunhie va puo tuo nadiu whituo. Nieko zha sorou hakemhie chütuo,

⁴mu zievomia thenie bu tekuo kia ketsü u thetse pie di dietseidiekho bouu mhodzünu tuotuo. Mu zha thenie nhie nieko va thenie tuo nadiu whishü tse zievokoe ketsü khoushütuo.

⁵Siro ukoe tekuo kia ketsüko khou pecha seshütuo, mu niekoe sü pfhe si mumetha, themia pete shiepeto seshütuo, sitse nadiu dahouko tetsutatuo. Sidi rüpfhünuo pete tuo mezhü nadiu nu lelietuo” sishü.

⁶Sitse Nun nuou Joshuae zievoko kieshü di uko ki, “Dietseidiekho bouu pielie, mu nieko mia thenie tekuo kia ketsü pie di süu mhodzünu tuoshülie” ishü!

⁷Puoe themiako ki, “Tuoshülie; tuo se nadiu whi sedelie, siro rünyie keseko bu Jihova dietseidiekho bouu mhodzünu tuo shülie” sishü.

⁸Siro Joshuae themiako ki diepushü tse, tekuo kia ketsü kepie zievo thenieko Jihova mhodzünu tuoshü, di ketsüko khoushü, mu Jihova dietseidiekho bouu pie uko medzi di tuoshü.

⁹Rünyie kesekoe ketsü khouketuo zievoko mhodzünu tuo, mu puosietsa kepfheko dietseidiekhobou sienu tuo, mu zievokoe tuo chakhra ketsüko khou.

¹⁰Süsie rei Joshuae themiako ki die khashü di sie: “Nieko mepfümewhilie lho, morei mia bu nieko pfhe rei silie lho, a nieko bu shieshü nukeshü nhie nie bu shietuo, sikemochie nie tie nunu die puorei puphra hie” sishü.

¹¹Sidi puoe themiako ki pushü di dietseidiekho bouu toupielie di vapuo nadiu whishü; süsie uko razhüchüu nu vorlie di teizeizhau pevolie.

¹²Süsieduü Joshua khise rüna sielie, mu zievoko Jihova dietseidiekho bouu pielie.

¹³Mu tekuo kia ketsü thenieko kepie zievokoe Jihova dietseidiekho bouu mhodzünu ketsüko khou petemo di khoutuo zo; mu rünyie kepiekoe uko mhodzü tuo vo, mu puosietsa kepfhekoe Jihova dietseidiekho bouu sienu tuo, zievokoe tuo chakhra uko ketsü khoutuo zo.

¹⁴Zha kenie nhie ukoe va puo nadiu whi voshü di uko razhüchü nu la vorta. Zha sorou hakemhie chü voshü.

¹⁵Zha thenie nhie ukoe teisotie sielie di hadzü kemhie tou di sünhie va thenie tuo nadiu whishü. Sünhie nu ukoe va thenie tuo nadiu whishü.

¹⁶Mu va thenieu va, zievokoe ketsüu khoushü tse, Joshuae themiako ki “Shieshüliecie! Jihova nadiu pie nie tsüwaketa la.

¹⁷Nadiu mu sünu keba mha peteko pekawaketuo la pie Jihova tsüshüwatatuo. Rahab thethenupfü mu puo kinu puoze kebako rübei rheilietuo; puoe themia ketsekeshü nie keviekeshü la.

¹⁸Derei nieko mia puo rei pekawaketuo vieko puorei mehou[7] di chü suo, mhanuü nie süu chü ro nie-e kemezhiekecü mu kepeka se vor Israel razhüchüu nu shüshü zotuokecü la.

¹⁹Sirei rakachü, suna, mu thegikhouü hiebouko zowe Jihova la mesa zo, süko pie Jihova kinyibouu nu shütuo” sishü.

²⁰Süla ketsü khoushü, mu themiako shieshü. Themiakoe ketsü khoukeshü sishü mumetha, ukoe mepfüshü, sitse dahouu puochünu metsuta, sidi themiakoe u thuo u mese kinu nadiu nu lelie, di nadiu lielie.

²¹Siro uko zhiecha se nadiu nu mhapete peka lotsowa, thenuthepfu, phichünhicu mu sizomonyü mithu, tekuo, mu gada rei pete dukhriwa.

²²Derei Joshuae kijüu riekecü nie ki, “Thethenupfü ki vo di nnie puo ki die khakeshü mhiei, puo mu puo kinu keba khe zeparlie.”

²³Süla unie le di Rahab, puo puo mu puo zuo, puo prünuoko mu puo ze keba pete ze parlie, unie-e puo kikru mu puo diemiako pete rei zepar Israelko razhüchünu khapie bawa.

²⁴Siro ukoe mi pie nadiu mu sünu keba pete thepie mige chüwa; sirei suna, rakachü, merenyi mu thegi se kechü vienyako zowe pie Jihova kinyibouu nu khashülie.

²⁵Derei Joshuae Rahab thethenupfü mu puo kinu kebako mu puovie keba pete kelashü kekreilamonyü süpfüe mharienu di Joshuae ketsekeshü dielie nie keviekeshü la. Puo yiemia thie ketso rei Israel nu lhoutuo zo.

²⁶Süteiki Joshuae rüse puo pie uko geishü, di sie, “Themia kehoupuorei sie di Jeriko nadiu chü laketuo dojükecümia bu Jihova mhodzü rüsepfücie! Kehoupuorei puomvü dzekeshüu puo nuo nuorieu pejütuo; mu kehoupuorei kharu sedekeshüu puo nuo nhicutho-u pejütuo” sishü.

²⁷Siro Jihovae Joshuae zetuolie; mu rüna pete nu puo za pu kemeyie phi vota.