Read Angami Naga Joshua 7 Bible Online

Joshua 7 - Angami Naga bible

Joshua 7

¹Derei Israelko kenyüvie cü hienukeshünu kejo chüwa. Süu Akan ükecü Karmi nuou mu Zabdi tsuu zo, mu Juda yiemia donu Zera chienuomia puo dieze chülie moketa la Jihova noupfhü Israel gei vorta.

²Joshuae Jeriko nunu themia ketsepie Bethel niethutsa Beth-aven khieki Ai rüna nu shü di uko ki “Kho di kijüu rieshücie” si. Süla themiakoe kho Ai rieshü.

³Sidi uko la vor Joshua ki pucü: “Mia pete kho Ai whuo zo morei vi, mia nyie kenie moro nyie se kholie ro mhamo. Themia pete bu kemezhie di sünu kho ba hie, Ai nu kebako keduoyo zo” sishü.

⁴Süla mia nyie se mese kho di süu whuo; derei ukoe Ai themiako mhodzü thalie mota.

⁵Ai themiakoe rünau kharu nunu uko whuo zotsur ketsie tsau Shebarim tso di kijüthou phi chasu kinu uko mia seresorou geiwa. Mu themiako melou thachüta mu thachü zo vo mekuteta.

⁶Sitse Joshuae mu Israelmia krütako upfhe cierha mu uziepie kijü zerepfülie di Jihova dietseidiekho bouu mhodzünu zhü thevatie tsota, siro nyophe pie uko tsügei tshupfülie.

⁷Sidi Joshua sie, “Hou, Niepuu, Ukepenuopfü! Kiüdi no hieko ze Jordan cie parshü di, hieko pekawaketuo la hieko khapie Amorko dzienu shüwatuo ga? Hieko Jordan khie lutsa batakecü we vikuotuo muru!

⁸He-i Niepuu, a kedipuo pu salietuo dimu, Israel-e uko ngumvüko mhodzü taketa siesü!

⁹Cüsie tsiewe Kananmiako mu rünaü nu kelhou pete süu si votie, mu hie houpfü di hie krenyü mu kijüu nu hie za pejüwatie! Sita ro no n za kezhau la kedipuo chüta?” sita.

¹⁰Sitse Jihovae Joshua ki, “Sielie! Kiüdi zerepfü hizhü zo ga?

¹¹Israel-e phoumawate; ukoe a uko ki diekhakeshü dietseidiekho-u varhuowate. Ukoe pekawaketuo vie huo chüliete; ukoe rügulie zorei meda di pie uko nya donu shüliete.

¹²Süla Israelkoe uko ngumvümia mhodzü thalie mote; ukoe rünoupie uko ngumvümiako tsüshüte, kekreilamonyü uko tsiewe rüsekepfü puochü di pekawaketuo nu thaketa la! Nieko chükelie vienyako biepesuowa kemochie, a nieko zetuo sa motatuo.

¹³Sieliecie, themiako chükemesalie, sidi uko ki, ‘Sodu la nie thuo nie chü kerünuolie; kekreilamonyü Jihova Israel Kepenuopfü hakemhie puya, “He-i Israel; no n geinu kenyü vieko khawa kemochie n ngumvüko mhodzü thalie kenjü zotuo!” sishü.

¹⁴Süla nieko khise nie seyie mu seyie di vortuo. Sidi Jihovae seyie tekelieu chienuo idi penuo vortuo, Jihovae chienuo tekelieu kikru idi penuo vortuo; mu Jihovae kikru tekelieu mia puopuo idi penuo vortuo.

¹⁵Sidi kenyüvie sa puo tekelieu mi pie puo thewatuo, puo mu puo keba pete, puo Jihova dietseidiekho-u varhuowa mu thenga kezha se Israel gei vorwaketa la,’ ” sishü.

¹⁶Süla Joshua süsienhie khiserüna sielie di seyie seyie di Israel ze vor; sidi Juda yiemia telie.

¹⁷Sidi puo Juda chienuomia ze vor; ru Zera chienuo telie, siro Zera chienuoko kikru mu kikru ze vor di Zabdi kikru telie.

¹⁸Siro puo Zabdi kikruu nu mia puopuo idi ze vor ru Zabdi tsuu, Karmi nuou Akan telieta.

¹⁹Sitse Joshua Akan ki, “A nuou, no Jihova Israelmia Kepenuopfü ki thetshetherhu khashülie, sidi puo ki n kejo phralie, mu no kedipuo chüwa shiü, kevieta hie di a ki pushücie” sishü.

²⁰Akan-e Joshua ki, “Kethote, a Jihova Israel Kepenuopfü mhodzünu phoumawate. A hau chüwate.

²¹A terhü mhavako donu Shinar nunu kechü pfhe kezivi puo mu rakachü shekel krie kenie, mu suna shekel hiepengou mesi bakecü puo ngushü tse, a süko mehoute, di süko pieliete. Mu harie, a pfheki nu rakachü bu pekhro di kijünu süko keviepie zhü ho” sishü.

²²Sitse Joshuae dieliemia ketseshü, di ukoe ta pfheki nu vo; ru rakachü bu pekhro di mha süko pfheki nu khrupie zhü ngulie.

²³Ru ukoe pfhekiu nunu süko chülie di se Joshua mu Israelko pete ki vor, di khapie Jihova mhodzünu shü.

²⁴Sidi Joshua mu Israelmia peteko Zera nuo-u Akan mu rakachüu, pfheu, sunau, puo nuo thepfuko mu thenuko, puo kicükiriko, gadako, tekuoko, puo pfheki, mu puo vieükecü pete telie; di süko ze Akor razhau nu vorlie.

²⁵Sitse Joshuae sie, “No kiüdi mha kere haikecü se vor úko gei shüga? Jihovae thie mha kere pie n gei shütuo,” si. Sidi Israelmia pete ketsie pie Akan mu kekreiko pete vakhriwa di uko vienyako sa thewa.

²⁶sidi uko puo mhogeinu tsiepfhe kezha puo pfheshü; süu thie ketso rei baya zo. Sitse Jihova nouyie tukebau rükreta. Mu thechü süu za pie Akor razhau chüta.[8]