Read Angami Naga Joshua 8 Bible Online

Joshua 8 - Angami Naga bible

Joshua 8

¹Sitse Jihovae Joshua ki, “Terhü themiako pete zelie di Ai recie; michie hie morei n melou thachüta hie. Harie, a Ai kediu, puo themia, puo nadi, mu puo kijü khapie n dzienu shüwaketa la.

²Noe Jeriko mu puo kediu gei chükeshü tuoi Ai mu puo kediu gei rei chüshütuo; derei tsieu va we terhü mhavako mu puo kicükiriko se n vie chülie vi. Pekhre vo di nadiu peprielieketuo dojülie,” sishü.

³Süla Joshua sielie di terhü themiako zekho Ai reketuo dojülie. Puoe terhü miavimia nyie ser kedalie tsiu ahza khashü di pezei zenu uko ketseshüwa,

⁴di uko ki, “Harie, nieko rünau whuoketuo la rüshü balie, puosietsa nu, tuo pecie ta hie, derei rhorhü di dojü phre balie.

⁵A mu a ze ketuoko tuo nadiu petsou khotuo. Siro uko themiako hieko whuopar ro hieko rürei di tashütuo.

⁶Hiekoe uko meshü ze nadiu ciepar tseita kemochie uko mhodzü tashütuo. Sitse ukoe sie, ‘Kerieu va tuoi ukoe u mhodzü nu tatazhie’ icü letuo. Mu hiekoe uko mhodzünu takezhü ki,

⁷niekoe rüshükebau nunu sielie di nadiu lielietuo; Jihova nie Kepenuopfü thuo süu pie nie dzienu shüwaketa la.

⁸Mu nie-e nadiu liekelie sie, Jihova pukeshü mhiei mi pie süu thewatuo. Harie, a nie ki diekha shüte ho,” sishü.

⁹Sidi Joshuae uko ketseshüwa; mu ukoe Ai kisie tsatie Bethel mu Ai unie donu rüshüchü nu volie di pfhebata; derei Joshua we süzhü razhüchü nu bata.[9]

¹⁰Joshuae khise rüna sielie, di puo themiako kie kengulie. Sidi puo mu Israel nu krütako terhü miaviko ze Ai nu kho.

¹¹Terhü themiako puo ze di nadiu mede nu kholie, sidi puotsei pesotsa nu razhüchü keselie, siro razha puo Ai mu uko donu zhü.

¹²Sidi puoe mia nyie pengou mese zelie di, uko bu nadiu khietsa Bethel mu Ai unie donu rüshü balie.

¹³Sizomonyü uko pete kezapie u tha u tse nu shülie, sidi miakrau bu nadiu khie pesotsa, mu kekreiko bu nadiu kisietsa nu rüshü balie. Derei Joshua we süzhü razhau nu bata.

¹⁴Ai kediue süu ngu tse, puo mu puo themia, nadiu nu lhou kebako pete ze khiserüna sielie di Israel ze kegeituoü di Araba mhodzünu tuo pra, derei puoe nadiu sietsa puo bietuoü di rüshü kebau dze si tuo mo.

¹⁵Sidi Joshua mu Israelko pete kemichie rova di ta se rayhatsa va vota.

¹⁶Sitse uko Israel whuoketuo la nadiu nu themia kiekengulieta, sidi ukoe Joshua whuo zo nadiu ze kepecie phinu vorta.

¹⁷Ai nadiu nu keba themia pete Israelko whuo tuota, sidi nadiu kha kemethuowa mu nadiu yalieketuo miapuorei tuo mota.

¹⁸Sitse Jihovae Joshua ki “N dzienu ketuo rüngouu piesie Ai tsa rüshülie; a süu khapie n dzienu shüwaketuo la” sishü. Ru Joshuae sükemhie chülie.

¹⁹Mu puoe puo dzie yhashü mu chakhrie rüshükebako u chü nunu mhai sielie, di ta nadiu nu le süu lielie; sidi rükri mi pie nadiu thewa.

²⁰Süki Ai themiako u sietsa mehoshü ru nadiu nunu mi khusiekezhü nguta. Derei ukoe mhatsa puorei valie kenjüta, kekreilamonyü ta se rayha vaketakoe rürei vor uko petsouketa la.

²¹Siro kekreikoe nadiu lielie tsiu thewa, mu mi khukesie Joshua mu Israelkoe süu ngushü tse, ukoe rürei la vor Ai themiako gei sede vü.

²²Sizomonyü nadiu nu keba Israelko rei rüyachüu nu kelie. Süla Israelko bu uko hou toupfülie, huomia lutsa mu huomia hatsa idi uko pete gei zo vowa. Miapuorei perheikelie morei takelie chülie mo.

²³Derei Ai kediu zowe perhei telie di puo ze Joshua mhodzünu vor.

²⁴Israelkoe Ai themiako whuo vo terha mu rayhanu uko gei phrewa, mu zhiecha pie uko pete biepejüwa tse, Israelmia peteko Ai nu la vor di zhiecha pie süu biewa.

²⁵Mu sünhie biekevo thenu rei thepfu rei, Ai nu thepfuko sakecü pete kesa nyie kerekenie.

²⁶Israelkoe sünu themiako gei tseiwa kemochie Joshuae Ai petsou di puo ngou piekethau puo dzienu rhü lashü mo zo.

²⁷Jihovae Joshua ki pukeshü tuoi, Israelkoe nadiu nu kicükiriko mu mhavako rübei liepie uvie chülie.

²⁸Sidi Joshuae Ai thewa, mu pekaperuowa: süu thie ketso rei pekakewa nhie kemhie zhü zo.

²⁹Mu puo seibo puo geinu Ai kediu goupie zha thevatie tso; sidi niaki kele tieki Joshuae die khashü, di ukoe seibo geinu puo mo-u pie kerlie, di kelhoupie nadiu kharu tieki shüwa. Sidi süu mho tsiepfhe kezha puo pfhewa, süu thie ketso rei ba zo.

³⁰Süsie Joshuae Ebal kijüthouu geinu Israelko Kepenuopfü Jihova ki khashüketuo ruosuoba puo chülie,

³¹puoe Jihova kituou Mosae Israelko ki kepu kemhie tou chüshü, süu Mosa zho nu pukecü “Ketsie phrokemo,[10] miapuorei theginya pie kou chiekemo ketsie pie ruosuoba kechü,” idi thupie keba tuoi. Sügeinu ukoe kethe ruosuo chüpie Jihova kishü, mu vitho ruosuo rei khashü.

³²Mu Israelmia mhodzünu nu Joshuae ketsieko gei Mosa thezho thukeshüu thu lashü.

³³Siro Israelko pete, pehüko, kezhako, capimiako mu uko donu lhoukesier solhimiako rei sa ze di Jihova dietseidiekho bouu khie lutsa mu süu kepie Levimia zievoko mhodzünu vo tha phrelie, ketou puo Gezirim kijüthou phinu mu ketoupuo Ebal kijüthou phinu idi thalie, Jihova kituou Mosae hamhodzü uko bu theja lieketuo ki sümhie di chülienukecü die khapie kezhü la.

³⁴Süsie Joshuae thezho dieko pete phrü peto seshü, thejako rei mu rüseko rei thezho leshüda nu thukeba kemhie tou di pete phrüshü.

³⁵Joshuae Israel krodi thenumia rei nhicunuoko rei mu solhimia uko donu keba pete mhodzünu Mosae diekhakeshü pete phrüshü, mu dieca puorei phrüshü mota mo.