Read Angami Naga Joshua 9 Bible Online

Joshua 9 - Angami Naga bible

Joshua 9

¹Jordan khie kekreitsa kijüthou gei rei, razha nu rei mu Dzükezhau khie pete Lebanon ketso bakecü kediko, Hitko, Amorko, Kananko, Perizko, Hivko mu Jebuskoe Israelmia kuokelie dze sishü tse,

²ukoe keze noupuo chü di Joshua mu Israel ze kegeituoü kengulie.

³Derei Gibeon nu kelhoumiako Joshuae Jeriko mu Ai gei kedipuo chüshü shikecü sishü tse,

⁴uko kedoda di Joshua seketuo rhülie. Sidi uko thoulakrako huo mu chüzhü kewe pekhuokecü pie uko gadako geishülie,

⁵pfhekra kerürha dzielie mu phikoukra pekhuokecü selie. Mu ukoe kecüca seketuoko pete rei sototo mu khrüketa kro puo pfü sa.

⁶Sidi ukoe Gilgal razhüchüu nu Joshua ki vo, di puo ki mu Israelmiako ki hakemhie pushü, “Hieko rüna kepecie nunu vor, mu n bu hieko ze dietseidiekho puo chüshünu chayalie” isi.

⁷Derei Israelmiakoe Hivko ki; “Kiüdi nieko ze dietseidiekho puo chülietuo dimu? nieko haki kepenuo ki lhoubaya rei si moe” sishü.

⁸Ukoe Joshua ki, “Hieko sü n kituomia zo” ishü. Joshuae uko ki, “Nie suomia ga? Mu kirapuonu vor ga?” si.

⁹Sitse ukoe puo ki, “N kituoko thechü kepecie phinu vorlie, kekreilamonyü hieko Jihova nie Kepenuopfü dze sishü, sizomonyü puoe Ijipt nu mhachükeshü pete sishüte,

¹⁰mu puoe Jordan niathutsa keba Amor kedinie, Heshbon kediu Sihon mu Bashan kediu Og, Ashtarot nu kebau gei chükeshü pete siwate.

¹¹Süla hie krütamiako mu hie kijü nu themia pete hie ki, ‘Nie rüve la nouva kesepfülie, di vo uko ze kesecie, tsiu uko ki, “Hieko sü nie kituoko zo mu hie ze dietseidiekho puo chükecü chanu hie ketseshüwe” sishülie.’

¹²Hie nie ki vortuoü tuokeshü nhie, niekhrüda haha, leme di nouva la hie ki nunu pfüpar, derei harie, tsiewe sototote, mu khrü rei sate.

¹³Hie chüzhü sü hako puo ketshu chü mu kesa rei, harie rürha phrete, mu hie pfhenei mu hie phikouko cha cha phikecü la puokra chü phrete,” sishü.

¹⁴Sitse krütakoe[11] uko ze uko nouva cülie, derei Jihova medo rüsa mota.

¹⁵Sidi Joshua uko ze vitho chüwa mu uko perheishüketuo dietseidiekho chüwa, mu Israel krodi krütako rei dietseidiekho-u pebatuoü uko die phrashüwa.

¹⁶Uko ze dietseidiekho chükewa zha se sie, ukoe themia süko uko zanuo ki lhoubaya zoükecü silie.

¹⁷Süla Israelmiakoe tuoshü di zha se nhie themia süko lhoukeba nadiko nu vorlie. Uko nadiko sü Gibeon, Kefira, Birot mu Kiriat-Jearim.

¹⁸Derei Israelko uko geilie suota, kekreilamonyü Israel krütakoe, Jihova, Israel Kepenuopfü za se di uko ki rüse shüwaketa la. Themiako pete u krütako gei mebe phreta,

¹⁹Derei krütako sie, “Hie Jihova, Israel Kepenuopfü za se di uko ki rüseshüwate, süla we tsie uko pechülie kenjüte.

²⁰Hie hau uko gei chüshütuo: Hie uko perheishü morosuo, simoro hie uko ki rüsekewa rüseu la noupfhüu hie gei pfüta rei si mo” sita.

²¹Derei krütakoe sie uko ki, “Uko thuo lhou balie, derei uko bu u pete la sei kedumia mu dzü keümia chütuo” sishü.

²²Sitse Joshuae uko bu puo ki vornu kieshü, sidi puo uko ki, “Nieko hie ze zanuo ba zo di, kiüdi nie sie ‘Hie kepecie phinu baya’ üdi hie kedoya ga?

²³Nieko hakemhie kechü la rüsepfüte, nie themiako pete miadie chü di, a Kepenuopfü kiu la sei kedumia mu dzü keümia chütuo” sishü.

²⁴Sitse ukoe Joshua ki, “Jihova n Kepenuopfüe Puo kituou Mosa ki pushü di kijü hau pie n tsüwa mu no penyü vorkezhü tuoi hanu lhou keba pete dukhri pejüwatuoükecü hie silieketa la; mu hie-e hie kerheiro la rei michiethorta di hau chüwate.

²⁵Hie tsie we n kekuo nu bate, süla n mhodzü ki viü mu mezhü ükecüu hie ze chüliecie” sita.

²⁶Süla puo uko gei hakemhie chü, puoe uko kelalie mu Israelko bu uko dukhriwa molie.

²⁷Derei teiso sünhienu Joshuae uko bu miadie chüta, sidi uko bu kehouu mu Jihova ruosuobau la sei kedumia mu dzükeümia chüta. Thie ketso rei, Jihova rüsuoketuo la kedakeshü thechüu nu ukoe uko mhatho chütuoya zo.