Read Angami Naga Thesaloniako Kenieu 1 Bible Online

Thesaloniako Kenieu 1 - Angami Naga bible

Thesaloniako Kenieu 1

¹Paul, Silvana mu Timothi ki nu: Pie Ukepenuopfü u Puou mu Niepuu Jisu Khrista nu baketa Thesaloniako kehou ki keshü:

²Ukepenuopfü u Puou mu Niepuu Jisu Khrista ki nu ngukemezhie mu noune bu nieko ze baliecie.

³Hie kezeko, hie nieko la Ukepenuopfü thezie sei ba zo morosuo, süu chükecü puotou zo, nie kepele vi miemielie kezhü, mu nieko huoniehuo khrie kechüliekezhü la.

⁴Siro nie metei thakelie, mu pechüpenyükecü nu rei kepele se thakelie mu kemezhiekecüko nu rei hiekelie la Ukepenuopfü kehouko nu hie nie dze pu kemelha tuoya.

⁵Haue Ukepenuopfü capi kechü ketho zo ücü thashü, mu nie Ukepenuopfü kedi themia chülie kesü chülieketuo la kemezhiekezha zo.

⁶Kekreilamonyü kemiatho Kepenuopfüe nie pechüyakezhako gei kemezhiekecü pie tsü tou zotuo,

⁷mu kerülei pie we rei mu kemezhiekezhako rei tsütuo, hau Niepuu Jisu teigei nu puo dielie kezha kekuoko ze mia mhingu chü kevor ki chüshütuo.

⁸Miü kemeriekecü nu Ukepenuopfü si kemoko mu u Niepuu Jisu dieliekeviu die ze kemoko gei khepu lietuo.

⁹Kechachie kepeka üse hako pechütuo, sidi Niepuu zapuzayie kekuou nunu süko chü khowatuo.

¹⁰Sünhie puo pele tuoketako bu puo ngu di u ngoketuo mu puo kemesako geinu zapuzayie chüketuo la vortuo, nie hie nie ki zhapu chükeshü peleliete ru.

¹¹Hie thie ketso nieko la cha sei baya, süusü Ukepenuopfü bu nieko chüpie puo phreikiemia chülie kesü chüketuo, tsiu puo bu puo kekuo üse nie mha kevi mengu keba khe mu nie kepele mhathoko chü tseishüketuo la.

¹²Sitse Ukepenuopfü mu Niepuu Jisu Khrista ngukemezhie khakeshü mhie u Niepu Jisu za bu nieko geinu mu nieko rei puo geinu zayie chülietuo.