Read Angami Naga Thesaloniako Kenieu 2 Bible Online

Thesaloniako Kenieu 2 - Angami Naga bible

Thesaloniako Kenieu 2

¹Siro hie üpfüko mu siezedzürieko[1], u Niepu Jisu Khrista la vorketuo mu uko keze puo mhodzünu kenguketuo dze, hie nie ki puya,

²ruopfü die la morei mia die la morei leshü thukeshü puo la üdi Niepuu teisozhau vorta ükecü die se nie hüwa di nie nou kehoukeruo chü bata hiecie.

³Miapuorei bu mhakehoupuonurei nieko sewa hie; kerüzhakecüu, mu thezho sanyü kemo-u[2] sier perie, süu kataketuou[3] mia mhingu chü par kemochie teisozha süu vorlie lhocü la.

⁴Puo terhuo ükezha morei rüsuoyakezha vieko pete petsou di puo thuo puo chü pezhapie süko mho shütuo, siro puo Ukepenuopfü rüsuokiu nu rei zo le balietuo mu puo thuo puo üse Ukepenuopfü ütatuo.

⁵A hadzü nieko ze keba ki mha hako dze pushükecü nieko siele mote me?

⁶Siro puo bu puotei tou ki parlieketuo la mha kikecüpuoe tsie puo khase ba shi nie si ba.

⁷Kekreilamonyü thezho rünyü kemo-u kepekhreko chü bate, derei puokhapuodei se kebau chü periewatuo.

⁸Süsie nu thezho rünyü kemo-u mia mhingu chü siertuo, Niepuu Jisu tie nunu kepar thesü üse süu penyüwatuo mu puo kevor pengukeshüu thuo puo pekapejüwatuo.

⁹Thezho rünyü kemo Satan ze kekuo se di, zasi, kethekhrükecü doneiü chü mia kietuo,

¹⁰mu kerüzhü zho kekra se katatuoükezhüko seketsituo, süko ketho-u khrielie di kelalietuo ücü chü mvütakecü la.

¹¹Ukepenuopfüe hau la puo mevivacü kezha se puo ketsepie uko kishü di uko bu ketijü peletatuo,

¹²ketho-u pele mvü di miatho kemo u neiyakezhako pete pejowatuo.

¹³Derei Niepuu khriekepfü hie üpfüko mu kezeko[4], hie nie la Ukepenuopfü thezie sei tuo zhüte, kekreilamonyü Ruopfüu bu nie chü kemesakelie mu nie bu ketho-u pelekelie geinu nie bu kelalieketa puo silie keriemia chütuoü di Ukepenuopfü thuo kedapie tuote.

¹⁴Hau la hie pu ketuo dieliekeviu[5] geinu puo thuo nie kieliete, sidi nie bu rei u Niepu Jisu Khrista zayieu nyilieketuo la.

¹⁵Süla hie kezeko, hie tie nunu rei mu leshü khuthu nunu rei nie pethakeshü zhoko se kemetei mu chüsechü ba zolie.

¹⁶Siro u Niepuu Jisu Khrista mu Ukepenuopfü u Puou, süusü u khriekeshüu mu u ngukemezhieu la kechachie thenou keluo mu u siedze kevi kha u ketsüu bu,

¹⁷nie nou thupeluoshü, chü kethepfushü, siro mhathomhachü mu diepudieshü kevi kheko nu nie chü pekuo sashüliecie.