Read Angami Naga Timothi Kerieu 1 Bible Online

Timothi Kerieu 1 - Angami Naga bible

Timothi Kerieu 1

¹Ukepenuopfü u Kelakelieu, mu u kemerüu Jisu Khrista khakeshü die nunu apostel chükelie Paul-e,

²Khapie kepeletsa a nuo ketho chüketa Timothi tsükeshü: Ukepenuopfü u Puou mu u Niepu Khrista Jisu ki nu kepar ngukemezhie, kekhrie mu noune bu bakelieu chücie.

³A hadzü Makedonia nu votuoükezhü ki n bu Efesa nu ba di mia kro puo bu kepethadie kekrei pie petha hienu,

⁴morei kemeduo dzeko pu mu u pfutsanuoko za phrü hulie kelho chü kebako rünyü hienushü, mha süko la mia bu kepele nunu Ukepenuopfü lie[1] chükelieu monyü mia chüpie keprüli tuokezha zo.

⁵Derei die khakeshüu ro thenou kemesa kekhrie, mu noudonoule kemezhü, siro kethera kemo kepeleu zo.

⁶Huomia we hako vajopfü rürei vo diethuodieruo kepu nu tuote,

⁷uko thezho-u dze kepethamia chü nyüya, sirei uko thuo puyakezhako morei si tou üketuo dieu rei si tsoya mo.

⁸Miapuonie thezho-u ze menuo tuoya ro puotou zoücü we si ba zo.

⁹We sikelie thezho-u zowe miathomia la monyü thezho varhuokezhamia mu mia die zeyakemomia, miathokemomia mu kephoumamia, mesakemomia mu kerüzhümia, u puonuo kedukhriko mu u zuonuo kedukhriko mu mia kedukhrimia la;

¹⁰pieü kechümia, thepfumia thuo thepfumia ze kekhriekezekecümia, themia kerügumia, kemedamia, tijü di rüsekezhamia, sizomonyü kekrei kehoupuorei kepethadie keviu ze ketherükecüko la khakeshü zo.

¹¹Pie a pelekeshü die süusü, zayie kechü mu thejakepfü Ukepenuopfü dieliekeviu zo.

¹²Khrista Jisu u Niepuu, a chü pekuoshüyakezhau pezie, puo a le pevi di a bu puo lie chükelie la,

¹³a thiedzü puo tha, mia pechüpenyü mu mia pesüpemvü zo. Derei a ngukemezhie ngulie, a pele kemo ki mhasi kemo nunu mha süko chükewa la,

¹⁴mu u Niepuu Khrista Jisu ki nu kevor ngukemezhie nu kepele mu kekhrie pie a tshu zie phipfü tuote.

¹⁵Khrista Jisue kephoumako kelalietuo üdi kijü tsurkecü die süu ketho tou zo mu süu ze ketseiketsolie zhü, süko donu a we phoumado-u zo.

¹⁶Derei puo a ngumezhiekewa süu hasie puo pelelie di kechachie kerhei ngulieketuoko la a kephoumado-u rüli geinu puo mia gei puo nou shükhreshühiethor tuoyakezha thashü kieketuo la zo.

¹⁷Siro kechachie kediu, siatalie kelho-u, umhi pie ngulie kelho-u, Ukepenuopfü puo rübei zokecüu bu kechachie thetshetherhupfü mu zapuzayie chücie.[2] Amen.

¹⁸A nuo Timothi, hadzü n dze pukeshü siedzekesi die tuoi n bu süko se n hiechü keperhie thalieketuo la a die hako pie n kishüzhü ho.

¹⁹Kepele mu noule kemezhüu se tha zolie. Huomia we süu khawa di u kepeletsa u rou hetshehetshakewa tuoi tuote;

²⁰süko donu Huminia mu Alekandra unie sa; unie bu Ukepenuopfü tha suokecü silieketuo la a unie khapie Satan dzie nu shüwate.