Read Angami Naga Timothi Kerieu 2 Bible Online

Timothi Kerieu 2 - Angami Naga bible

Timothi Kerieu 2

¹A therie nu tarhoshü kenyüu ro mia pete la cha di u mezhie pu rükhruo mu meheimelo, siro kethezie sashülienuya,

²kediko mu kezhako pete la rei, silie ro we tshüimhiei di ketho chü Ukepenuopfü khrüprei nu lhoulietuo.

³Hauha u kelakelieu Ukepenuopfü mhodzü ki zivi mu lielie kesü,

⁴mu puo medoe themia pete bu kelalie mu ketho mhasiu nu vorlieketuou zo.

⁵Kekreilamonyü Ukepenuopfüe puo rübei zo; Ukepenuopfü mu themia donu ketha rei puo zo, süu themia chüketa, Khrista Jisu zo,

⁶mia pete rhalieketuo la puo thuo puo phou khashü, puotei tou ki hau zhapu chüshü.

⁷Hau la a kedapie zhapumia mu apostel chülie (A ketho-u puya,[3] a meda mo zo) kepele mu ketho-u la Judakemomia kepethau zo.

⁸Siro a thepfumia bu kehourapuorei noupfhünouyie se mu keprülita mo di kemesa dzie yhapie chakecü a nei;

⁹sütuoi thenumia bu rei u keseu se tou mu u nou mesamezhü di u tsütha chie doneiü chüpfü mu suna morei cü puoma kerepfüko morei pfhemenei puoma kerethoko se monyü puotou se u ketso menuo tuocü a medo zo,

¹⁰derei Ukepenuopfü khrieürhukezhamiapfü we mhatho keviko chücü u vazhü.

¹¹Thenumia bu menenuoi mia khrükhro ba tsei di mhasilie.

¹²A thenumia[4] bu mia petha morei thepfumia[5] mho kekuo sekecü a kele mo; derei u bu kemekrie balie.

¹³Kekreilamonyü Adam chü rie di Iv chülie;

¹⁴sizomonyü Adam sewa mo, derei thenupfü sewa di kejo chüwata zo.

¹⁵Sirei thenumia u nou kemezhü se di kepele mu kekhrie mu kemesa nu ba zolie ro nuo kepenuo kirei u kelalietuo.