Read Angami Naga Timothi Kerieu 3 Bible Online

Timothi Kerieu 3 - Angami Naga bible

Timothi Kerieu 3

¹Die pu hau ketho zo: Kehoupuorei kehou kepfhe[6] lietho chü nyüyakezhau, therhu mhatho menguya.

²Süla kehou kepfhemiae[7] thethapfü kemomia, va puo rübei u kiya kechümia,[8] u kethekerekecümia, kemenuomia, rhulie kesümia, mia peso nyüyakezhamia, mia petha toushülie kevimia,

³zu krie mezeyakemomia, mha kebvüshüyakemomia tsiu menekecümia, meyiemeyhakemomia mu shükeiraka mehouyakemomia morosuo.

⁴Puo kikru meza menuolieyakezhamia, mha kehoupuonurei puo nuonuoko kekha se bakeliemia morosuo,

⁵mhanuü miapuonie puo kikru meza menuolieya mo üro, puo kikidi Ukepenuopfü kehouu mezalie ta?

⁶Kepele nu miasamia bu chü suo, puo kemiako sieta di te satan tha nu letalie vi.

⁷Sizomonyü puo bu miathapfü mu terhuokesuou ratho nu puo makelie keprei la chazoumia mhodzünu rei therhukepfümia morosuo.

⁸Sütuoi dikonmia rei mhale pesouyakezhamia, die kenietaya kemomia, zu die chüta kemomia, shükeiraka mehouyakemomia morosuo,

⁹u nou mezhü di kepele u ngokecüu thezetsa se tuoyakezhamia morosuo.

¹⁰Uko rüli rie meho perie di u kepejo jü üro u bu dikon chücie.

¹¹Dikonpfüko rei sümhie soukecümia, mia tha mia meleyakemomia; menuo mu mha pete nu diethoyakezhamiapfü morosuo.

¹²Dikonmia va puo rübei u kiya kechümia,[9] u nuonuo mu u kikru meza menuolieyakezhamia morosuo;

¹³siro dikon chü menuokeliemia u tha vilie di Khrista Jisu kitsa u kepeleu nu thepfu selieya.

¹⁴A n ki vor zikecü mengu zo, derei die hako thupie n ki shüya ho, siro

¹⁵mhanuü a menyhuota rei Ukepenuopfü kikruu nu kebamia u zho kimhie ba morosuo shiü n bu si nyü; ki süu rheituoyakezha Ukepenuopfü kehouu, ketho-u toupfü keba co-u zo;

¹⁶u nanyü u ngokecü hau zhaü molie kenjü: Chüüzie nunu puo[10] pie pengushü, ruopfü nunu puo die nu vota[11], teigeidielieko bu ngu, Judakemomia donu pu pesishü, kijü vala nu puo pelelie, zapuzayie nunu puo ze khote.