Read Angami Naga Timothi Kerieu 6 Bible Online

Timothi Kerieu 6 - Angami Naga bible

Timothi Kerieu 6

¹Mia bu Ukepenuopfü za mu kepetha dieu thaketa keprei la, mia die chü mia vocie khro tuoketa khe bu puo niepuko rhu tseiütsoshü zhücü lelie.

²Puo niepumia kepelemiatacüko bu rei keze kehou nu tsüphrü phreta üdi süko rhu moketa chü hie; sikecüumonyü süko lie chü pevikuolie, uko mhatho geinu kemevi nguliekezhakoe kepelemia mu u kekhriemia zocü la.[17] Mhatho hako pie petha mu hüzhü zolie.

³Kehoupuorei kepethadie kekrei se mia petha di u Niepu Jisu Khrista die keviko mu Ukepenuopfü kepele die keviko ze kerheyakemomia,

⁴mhapuorei si mo zorei komethuo tuoya, mu kenyamia mhie di mha ketso mu die neiü se mia ze keprüli tuoya. Haicü nunu mia ngu u rokecü, kegeikecü, kethakecü, mia lekepesuo, panyapara,

⁵u noule vi kemo mu ketho-u perhukewa sükoe Ukepenuopfü khrüprei üse upraushü puo laüya.[18]

⁶Ketho, Ukepenuopfü khrüprei nu tuo di u nei siketuo sü puo kepra ba phi;

⁷kekreilamonyü we mhapuorei se kijü nu vor mo, mu we mhapuorei se la pralie lhocü la;[19]

⁸derei we ucauva mu pfhemenei bakelie sie u nei zo.

⁹Sirei mhakenyi leyakezhamia te dophi nu, kebie nu, mha kemethuokemeruoko nu, mu u chü pesuowakezha kemengu neiü nu le di pekawaya.

¹⁰Kekreilamonyü shükeiraka kemehoue mha kesuo pete bo-u zo; huomia süu mehoumengu di u kepele rei vajopfü tuote, sidi nousuo kekra pie u ze pechüpfü tuote.

¹¹Derei Ukepenuopfü themiau, no zowe mha hako pete therhielie; kemiatho, Ukepenuopfü khrü keprei, kepele, kekhrie, shükhreshühiekecü mu thenou kemene whuo zoliecie.

¹²Kepeletsa n rhiechü di keperhielie; sidi kechachie kerheiu theze kemetei tha zolie, süu la n kielie mu no rei zhapumia kekra mhodzünu süu pushüshü vorta zo.

¹³Kerheipie peteko ketsü Ukepenuopfü mu Pontia Pilat mhodzünu die kevi zhapu chükeshüu Khrista Jisu mhingu nunu a n bu

¹⁴Niepuu Jisu Khrista la vor kemochie die khakeshüko chüüzelie di mia bu süko pejowalie kelho chünu n ki puya ho,

¹⁵puo kevor sü puo thuo puotei touu nu mia bu ngutuo; puo sü kediko Kediu, siro niepuko mho Niepuu; thejakepfütho-u mu puo rübei kekuotho-u zo.

¹⁶Puo rübei siaüjütalie kelho-u mu miapuorei penuo volie kelho kezie nu lhou kebau, miapuorei puo ngu mo mu ngu reilie lho; puo bu telhe kechachie therhupfü mu kedi chücie. Amen.

¹⁷Tsie teiu nu mhakenyiko bu u nou rükrie mu u kemerüu pie khrukhrekemo kinyiu gei shü monyü, u bu se u neilieketuo la mephruomevuo di mha pete pie u tsükezha Ukepenuopfü gei shülienu pucie.

¹⁸Uko bu mha kevi chülie, mhatho kevi bu kra philie, mephruomevuo zolie, mhapie miatsümiaza nyüsielienushücie,

¹⁹silie liro thiesie la u kinyi kengupie puo mvüdze kemeteiu gei balietuo, mu kerhei ketho-u se thalietuo.

²⁰Harie Timothi, mha pie n pelekewau se menuo balie. Sidi ketijüdie kesikele üyakezha nunu kepar diethuodieruo mha kemesako bie perhuwayakezha dieko therhie zoliecie,

²¹huomia süu zeya üdi kepele nu kekrü tuote. Ngukemezhieu bu nie ze bakelieu chücie.[20]