Read Angami Naga Timothi Kenieu 1 Bible Online

Timothi Kenieu 1 - Angami Naga bible

Timothi Kenieu 1

¹Ukepenuopfü medo nunu Khrista Jisu geinu phrapie kezhü kelhouu la Khrista Jisu apostel chükelie Paul ki nu,

²Thupie a nuo a khrieu Timothi ki keshü: Ukepenuopfü u Puou mu u Niepu Khrista Jisu kinu kepar ngukemezhie, kekhrie mu nouneu bu n gei bakelieu chüliecie.

³A theva rei khinhie rei a kecha nu n rükrakeshü ki, thiedzü a puotsanuoko puo rüsuo kevor, mu a rei a nou a pejo mo di puo rüsuoyakezha Ukepenuopfü thezie kekralie lho baya.

⁴No n mhidzü pekrukeshü rükra di a neilie.

⁵A n kepele rei rükra ba, kepele süu thiedzü n tsapfü Lowi mu n zuo Ewoniki unie nou ketuo kepeleu, mu kepele süu n nou tuo toukecü a si ba.

⁶Hau la a thiedzü a dzie yhapie n geikeshü ki no Ukepenuopfü kinu mhaphruo ngukelieu n bu süu chü petu sei tuolienu di n tarho lashüya;

⁷kekreilamonyü Ukepenuopfü kemichie ruopfü pie u tsü monyü, kekuo mu kekhrie mu u kethekerekecü ruopfü pie u tsüwate.

⁸Siro u Niepuu zhapu kechü morei a kedie chükecü la mengata hiecie, derei dieliekeviu zhapu la Ukepenuopfü kekuo nu tha di a ze kemezhieliecie,

⁹puo u kelalie mu kemesa kekieu se u kieliete, süu u mhatho la mo derei puo medo-u mu u ngukemezhie la zo. Peteko sedekelie mhodzü Khrista geinu ngukemezhie hau pie u tsüwate,

¹⁰derei u kelakelieu Khrista Jisu kevor ze di tsiewe süu pie u mhingu chüshüwate; puoe kesia penyüwa di dieliekeviu geinu cieürietalie kelho kelhouu pie u tsüshüte;

¹¹dieliekevi hau la a bu pheshiemia puo chü, apostel chü, mu kepethamia rei chüte,[1]

¹²mu süu la a kemezhiekecü hako rei ngulie. Derei süla a menga ba mo, kekreilamonyü a puo pele tuoketau a süu si tuoya zo, mu a mha pie puo pelekewau[2] puo süu rüguo se teisozha süu tsolie vikecü a si tou ba zo.

¹³No a kinu sikelie kepetha die puotoukecüko thezetsa se balie, Jisu Khrista kinu kevor kepele mu kekhrie nu tha zolie.

¹⁴U nou tuoketa Kemesa Ruopfü kekuo nunu kinyi pie n peleshüwaketau rüguo setuo zolie.

¹⁵Asia nu kebako pete a kitsa tha moketa no si batuo, süko donu Figilo mu Hermoginis unie rei sa.

¹⁶Niepuu bu ngukemezhie pie Onesifora kikruu tsücie, kekreilamonyü puo tsiekenuo a nou chü pemvüshü mu thegiro se a phapfü keba la rei mengataya mo;

¹⁷puo Rom nu vorlie mumetha kenourhei a pfhü vor.

¹⁸Puo bu teisozha kezha nhie Niepuu bu ngukemezhieu pie puo tsükelieu chücie. Siro Efesa nu puoe a khruohi phikeshü no rei si batuo.