Read Angami Naga Timothi Kenieu 2 Bible Online

Timothi Kenieu 2 - Angami Naga bible

Timothi Kenieu 2

¹Süla a nuo, Jisu Khrista geinu kepar ngukemezhie nunu metei thalie,

²mu a dze zhapumia kekra kinu sikelieko, no süko pie pelelie kesümia mu mia kekreimia rei pethashülie kevimia pele lashülie.

³Jisu Khrista chüpahi kevimia puo mhiei kemezhielie.

⁴Themia kehoupuorei chüpahi chüketuo ki mha kekrei chü u kenyha saya mo, puo bu chüpahi chütuo üdi puo za rukelie kezhau nei chülieketuo la.

⁵Sizomonyü rüzhümia puo rei rüzhüzho medzi mo di kevizhakhra ngulieya mo.

⁶Puo rhiechü mhachüyakezha liecieu puo lieyieu nu puo si ngu rie zhü.

⁷A n ki pukeshüko leshücie; Niepuu n bu süko caülako silieketuo chüshütuo.

⁸Jisu Khrista, kesia nunu rheisieketa, David yieu rükrashücie, süusü a dieliekeviu zo,

⁹süu la kejokechümia tuoi mia bu a khese kemezhie hi tuokecü zo. Derei Ukepenuopfü dieu we phawa mo zo.

¹⁰Süla kedalieketako la a mhakehoupuonurei shügeshühiepfü tuoya, sidi uko bu rei Khrista Jisu ki vor kelakelie ngulie di kechachie zayie chülieketuo la.

¹¹Pukeshü hau ketho tou zo: We puo ze sia ro, we puo ze di rhei reilietuo;

¹²We shügeshühielie ro, we puo ze kedi chütuo; we puo melieta ro, puo rei u meliewatuo;

¹³We dietho mo zorei, puo we dietho sei zotuo, kekreilamonyü puo thuo puo ü moütalie kenjü.

¹⁴Hau pie uko ki pu lashücie, mu Ukepenuopfü mhodzünu uko bu keprüli hienu tarhoshücie, sikecüe mevikelieu monyü kerünyüko chü pesuowaya.

¹⁵Ukepenuopfü bu no ü puo medomia ülieketuo la puo mhodzünu n rachülie, puo mhatho-u la mengata mo zocü liethomia puo chülie, puotou nunu ketho dieu kezashülie.

¹⁶Siro mesa kemo diethuodieruoko therhielie, kekreilamonyü süu themia cha thapie ketho le mo miemietaya

¹⁷mu uko die-e teletekou kechü tuoi thuo miemietatuo. Süko donu Huminia mu Fileta rei sate,

¹⁸unie ketho-u vajowa di rheilasieketuo üse tseita üdi pu tuote. Sidi unie huomia kepele thurhuowatazhie.

¹⁹Derei Ukepenuopfü puo bo dekeshüu we metei ba zo, mu süu gei: “Niepuu puo thuo puo vieko si ba,” mu “Kehoupuorei Niepuu za kiekeliemia mha kesuo kechü therhietacie” icü thupiezhü.

²⁰Siro ki kevi kezha nu zorei mhabou kekreikreicü baya; süko huo rakachü mu huo suna pie chü, tsiu kekreiko huo sei mu huo rünyo pie chüya; süko huo se therhu mhatho chü mu huo we si zo mo.

²¹Kehoupuorei a pukeshüko[3] nunu u thuo u chü kemesakeliemia, sümia chüpie therhukepfü, chü kemesakelie, ki niepuu bu se mha chülie kesü, mhatho kevi kheko la kese mhabou chülietuo.

²²Siro ta themia lhounyü ki menguko therhie zolie, sidi u nou mesa di Niepuu za kieyakezhako ze di kemiatho, kepele, kekhrie mu kezekeviu whuo volie.

²³Derei mhale kemo diepu mu kemethuo nu keprülikecüko ze mhapuorei chü hie, süko kegeitsia zokecü no rei si ba ze ru.

²⁴Niepuu liethomia[4] keprüli suo, derei kehoupuo gei rei tseiüvi, mia petha si mu shügeshühielie morosuo,

²⁵thenou kemene se di puo petsouyakezhamia tarholie morosuo. Ukepenuopfü puotei kevi puo khapie süko tsü di uko bu rei thenoukedi lalie di ketho-u silieketuo chülie kevi la,

²⁶sidi süko u nou mezhü[5] lalie di terhuokesuou ratho nunu ta lalietuo.