Read Angami Naga Timothi Kenieu 3 Bible Online

Timothi Kenieu 3 - Angami Naga bible

Timothi Kenieu 3

¹Siro teisozha thelatsa u dzü kezei chü zokecü vorketuo rükralie.

²Sükisü themia u thuo u zhazhü kepfhü, raka kemehou, kemelha, kemiako, mia thepesuo, u krü die ze kemvü, mia thezie kemo, mesakemo,

³noushünouzhie kejü, mia kejo vakemvü, mia tha mia mele, u kekhalieya kemo, u zhokesuo, mha kevi rütsekecü,

⁴kelhiekecü, mia die rünyü kemo, komethuo; tsiu Ukepenuopfü nei chükecüu kirei u thuo u nei u nyü chü nyükuokecü siertuo;

⁵süko chazoutsa Ukepenuopfü khrü keprei meviva, derei kekuo ketho-u melieya. Sükemhieko therhietalie.

⁶süko huomia goumelie mia kinu vo di mhale kemo u kephoumako la u keraketuo thenuko, u mengu neiüko bu u meshü ze tuoketako selietatuo,

⁷süko mia bu u petha sei tuoya, derei mhakipuorei ketho-u silieketuo nu tuoya mo.

⁸Thiedzü Jani mu Jambri unie Mosa petsou sieketa tuoi, süla themia hako u nou mha kesuo tuo mu kepeleu meviva, süla ketho-u petsouya.

⁹Derei süko ta pecie ba zo volie lho, kekreilamonyü themia sünie tuoi, themia pete uko kesuo ngu parta zotuocü la.

¹⁰Sirei no zo we a kepetha die, a zho, a kelhou nu kele, a kepele, a shükhreshükecü, a mia kekhrie, a metei thakelie,

¹¹a kepechü ngukelieko, Antiok, Ikonia mu Lustra nu a gei pfürkecüko ngushüte. Kiderei kemezhieshü shi. Sirei süko pete nu Niepuu thuo a kelashüte.

¹²Ketho zo, themia kehoupuorei Khrista Jisu ze puo chü di lhou nyüyakezhau mia bu puo pechüpenyü zotuo.

¹³Derei kerüzhümiako mu mia seyakezhako u thuo u seya, mu kekreimia rei seya, süko suo miemietatuo.

¹⁴Derei no zowe ketho-u pie n pethashüwaketa tuoi peletsapfü tha zolie, no zo we suomia ki nu mha süko silie shi si ba zocü la,

¹⁵mu no zowe n nhicu nunu kemesa leshüko silie di süu thuo n pethapie n bu kepele geinu Jisu Khrista geinu kepar kelakelieu ngulie kevi chülie.

¹⁶Ketholeshü pete Ukepenuopfü kinu haphra par zo mu süu mia kepetha la, mia tahitarhoketuo la, mia chü kemezhüketuo la, mu mia ketshüpie kethotsa shülieketuo la zo.

¹⁷Sidi Ukepenuopfü themia chüketa kehoupuorei chü pevipie mhatho kevi kheko chülieya.