Read Angami Naga Timothi Kenieu 4 Bible Online

Timothi Kenieu 4 - Angami Naga bible

Timothi Kenieu 4

¹A Ukepenuopfü, tsiu Jisu Khrista, kerhei mu kesiako ketsoketuou, puo vortuoükezhü mu puo kedi chüketuou la, n ki die hau pu beishü ho:

²dieu pie petha ba zolie; puotei vi rei mo rei, shükhreshühie mu n teitso chü mia petha di mia rüchüpie mia bu lielie, kerhieshülie, mia chü kethepfu shülie.

³Kekreilamonyü puotei puo vorzhie, kepele die puotoukecü liemvütaketuo, derei u nyie kemeso la ukoe u thuo u krukecü kepethamia pfhü kengulietuo.

⁴Sidi ketho-u rünyükelieu monyü rürei se ketho kemo dzetsa votatuo.

⁵Derei no zowe n melou mecie balie, kemezhiekecüko nu rei shügeshühielie, dieliekevi kepetha chü balie, no lietho chütuoü kebau chü tsei zolie.

⁶A zowe ruo kechü vie puo tuoi a zie rei kengeshüwatuoü bate, tsiu a tuotaketuo tei rei tso bate.

⁷A keperhie kezhütho-u nu keperhie pevi seshüte, a ta vo tsowate, tsiu a kepeleu se zo tha tsoshüte.

⁸Tsieyawinu kemiatho tsüreu pie a tsüpie zhüwate, süu kemiatho capiu, Niepuu thuo puotei nhie pie a tsütuo, mu pie a rübei zomonyü puo kevor mengu keba pete tsü phretuo.

⁹No a ki vor mhaiketuo le beicie.

¹⁰Kekreilamonyü Dema-e tsiedo kijü hau va khrieta di a khawa di Thesalonia nu vote, Kresen-e Galatia nu vote, Tita Dalmatia nu vote.

¹¹Luk rübei a ze keba zote. No Mark rei zelie di vorcie, a lietho nu puo kekhruohilie zotuocü la.

¹²A Tukika ketsepie Efesa nu shüwate.

¹³No vorkecü ki, Troa nu a boulie khapie Karpo dzie nu kebau se vorliecie, a leshüdako rei, ba hurei chüzhü geinu kethuko se vorliecie.

¹⁴Rükreiyakezhau Alekandra a gei mha kesuo se chüshü, puo chüwaketako la Niepuu thuo puo zhada vüshütuo.

¹⁵No rei puo gei n kireilie, puo u kepetha dieu petsou phiyacü la.

¹⁶A a thuo sie a zha pu kerieu va miapuorei a yapie mo, sicüumonyü mia pete a khawa. Süu la uko pejota moü thienyü.

¹⁷Derei Niepuu thuo a ze tha di kekuo khapie a tsü, sidi a bu dieu pu tseipie Judakemoko pete bu rei rünyülie. Sidi losha me nunu rei a se kelashü.

¹⁸Niepuu thuo a pie teigei kedi nu shülieketuo la a petsoukezha mha kesuo pete nunu a kelashütuo. Puo bu telhekechachie zayieu chüliecie! Amen.

¹⁹Priskila mu Akila tsiu Onesifora kikruu kelushü ho.

²⁰Erasta bu Korint nu bate, Tofima mhachüketa la a puo bu Mileta nu bate.

²¹No teisei mhodzü a ki vorketuo le beicie. Eubulo n kelushü ho. Puden, Lino mu Klaudia, tsiu kepelemia u üpfüko mu kezeko[6] pete n kelushü ho.

²²Niepuu bu n ze tuolie. Kepenuopfü kinu kepar ngukemezhieu bu n ze tuoliecie.[7]