Read Angami Naga Tita 1 Bible Online

Tita 1 - Angami Naga bible

Tita 1

¹Paul, Ukepenuopfü kituou[1] mu Ukepenuopfüe kedalieketako kepeleu la mu Ukepenuopfü khrü keprei zho-u medzi di ketho mhasiu la Jisu Khrista apostel chülie,

²süu tijülie kelho Ukepenuopfü thuo nnhie nnhie nunu pupie ketuo,

³puotei touki puo dieu zhapu kechü nunu pesipengukeshü kechachie kerheiu kemerü la zo, mu hau Ukepenuopfü u kelakelieu thuo a bu chünu di kha a peleshüwate.

⁴Leshü hau pie kepele nu vierhe kechü a nuo ketho chüketa Tita kishü ho: Ukepenuopfü u Puou mu u kelakelieu Jisu Khrista bu ngukemezhie[2] mu noune kha n tsükelieu chüliecie.

⁵N bu mhachü tso mo kebako chüketuo la, mu hadzü n ki pukeshü tuoi rünako nu phichüko kedapie ba phrewaketuo la a n khapie Kreta nu bawa.

⁶Sümia mia bu u pejolie kelhomia, va puo rübei u kiya kechümia,[3] mu puo nuonuoko rei kepelemia di mia bu uko üse rüzhü morei mia die zeyakemomia üdi thawa kemomia morosuo.

⁷Kehou kepfhemia[4] puoe Ukepenuopfü kituomia puokecü la pejolie kelhomia morosuo; u thuo u medo kechü, u nou meyie mhatayakezha, zu die chüyakezha, mu mia vütayakezha, siro mha kemehoumia suo,

⁸derei mia peso nyükecümia, mha kevi u neikezhamia, meciemephrükecümia, kemiathomia, kepecümia mu u kethekerekeliemia morosuo.

⁹Puo kethodieu kepetha dieko thezetsa se thalie morosuo, sidi kepele dzetsa kepetha die puotouu se mia tarhoshülie kevi mu süu vajoketuoko chü kemezhülieketuomia morosuo.

¹⁰Mia die zeyakemo, diethuodieruo kepu mu u thuo u sese ketuo, kekra tuote mu süko u zhürekepfüko pekuo;

¹¹uko bu kemekrieta morosuo, uko dietho kemo kemevi ngukelie le di pu zhükemo dieko se mia petha di kikru kekra kebvü tuote.

¹²Uko mia puo, uko donu siedzekesimia puo thuo pupiekezhü, “Kretamia sü tijü seiyakezha, khunuo kesuo; mecü mu cahuocaya kro puo zo” si.

¹³Zhapu süu ketho zo. Hau la no uko kejoko pu tsashülie, sitse uko kepele nu metei thalietuo,

¹⁴di uko bu Judamia kemeduo dze mu ketho-u therhieketako sanyü hie.

¹⁵Kemesako la we mha pete mesa; derei rhuketa mu pele kemoko la we mhapuorei kemesa jü, süko we u nou mu kelekemedoko rei rhu phrete.

¹⁶Kepu nu zowe uko Ukepenuopfü si üya, derei uko mhathoko nu we puo si mo. Ukoe kerütsekecümia, mia die zeyakemomia, mu mhatho kevi puorei chülie sü mo.