Read Angami Naga Tita 2 Bible Online

Tita 2 - Angami Naga bible

Tita 2

¹Derei no zowe kepethadie puotoukecüko medzi toucüko pu petha ba zolie.

²Phichümia bu u kethekere, mesümede, meciephrüi balie, mu kepele nu, kekhrie nu, mu shügeshühiekecütsa vi balie.

³Sütuoi thenupfümiako bu rei u zho u rüliko nu menuo mia tha mo morei zu die chüta hie, siro mha kevi pie mia pethakecümia chülie,

⁴sitse ukoe thenupfü kemedzüko pethapie u nupfu rhu, mu u nuonuo khrie,

⁵mu u thuo u kethekere, mesa, kitiekinu se menuo, mia khrie tsiu u thuo u nupfunuo khrükhro balietuo; sitse Ukepenuopfü dieu thawa molietuo.

⁶Sükemhie thepfumia zharata kemomia bu rei u kethekerelienu hü beicie.

⁷No mhatho kevi kheko nu thakie puo chü mia kielie, siro kepetha nu rei kedietho mu kemesü se pekieshülie;

⁸mu n diepu puo nu rei mia bu u telie kelho chü zolie, sitse n kepetsoumia bu n gei mha kesuo puorei pulie kenjüta di mengalietuo.

⁹Mia diemia bu rei u niepumia khrükhro balie mu mha kehoupuonurei u neiu chüshülie; süko bu mia prüli hie,

¹⁰mha beta hie, derei u dietho mu u kevi tha pekieshülie, sitse mhakehoupuonurei ukoe Ukepenuopfü u kelakelieu die va kezivilietuo.

¹¹Kekreilamonyü Ukepenuopfü ngukemezhieu, themia peteko kelalie kevi se pesipengushüte,[5]

¹²süu u pethapie u bu mha kesuo shüüko mu kijü vieko kemehou khawa di u kethekerepfü, dietho, mezhü mu Ukepenuopfü khrüprei di kijü hanu lhou tuolieketuo la.

¹³U bu u siedze kevitho-u süusü Ukepenuopfü mu u Kelakelie[6] kezhatho-u Khrista Jisu zayie chü di mia mhingu chü vorketuou pfhe keba ki.

¹⁴Puoe u kesuo kheko nunu u rhalie mu u khrü kemesapie puo thuo puo themia kro puo chülietuoü u bu mha kevi pete nu u rhie chülietuoü di puo kelhou khashü.

¹⁵Mha hako pushülie; thepfu[7] di tarho mu mia kejo rei pupie kieshülie. Mia puo bu rei u le pesuoketa chü hie.