Read Angami Naga Tita 3 Bible Online

Tita 3 - Angami Naga bible

Tita 3

¹Siro uko bu mia kekhayakezhako mu kekuokeseko khrükhro balienu, mu dieze chülienu, mhatho kevi kehoupuorei chülienu pushülie,

²tsiu u bu mia dze kesuo puorei pu hie, keprüli hie, huoniehuo gei u zho mene, mu mia pete gei vilie.

³We rei thiedzü mhale mo, mia die ze mo, cha vajopfü, u menguko mu u nei u nyü kekra die chü vor, sidi mha kemehou mu mha kesuo nunu u tei pevo, mia rütse, tsiu huoniehuo ngumvü vor.

⁴Derei u kelakelie Ukepenuopfü kevi mu mia ngukemezhie par tse,

⁵puo thuo u kelalie, u thuo u kemiatho nunu chükelie mhathoko la monyü, puo thuo u ngumezhiekeshü la zo, süusü penuo kesakelie dzü[8] nunu mu Kemesa Ruopfü geinu chü kesakelie zo.

⁶Puoe u kelakelie Jisu Khrista geinu kemesa Ruopfü rupie u ketshu chüwate,

⁷mu süusü ngukemezhie bu u chü kemezhüpie kechachie kerhei siedzeu nu kayiemia chülieketuo la zo.

⁸Die hau ketho zo. A n bu mha hako putsa bakelie mengu, sitse Ukepenuopfü pele vorkelieko u khapie u terü chü di mhatho keviko chülietuo; mha hako vithor zo mu kehoupuo la rei kemevi ba.

⁹Mu kemethuo puo se kemeü, u pfutsanuo phrü kekie di keprüli kemethuo chü hie, huoniehuo perhiekecü mu thezho-u la keprülikecü hako therhie zolie, sükoe puo kepra puorei jü mu kemethuokemeruo zo.

¹⁰Va puo moro va kenie tarhokeshü sie mia pfükhoyakezhamia la n nounyü sa hie,

¹¹themia sikecümia ketho-u therhiete mu phouma zo vo di puo thuo puo rüsewaya.

¹²A Artemas moro Tukika ketsepie n kikeshü ki no Nikopoli nu vor a ze kese beicie, a teisei ki sünu batuoüyacü la.

¹³Siro thezho kesiu Zena mu Apolo unie ketseshülie, mu unie bu mhapuorei tsopfhü molieketuo keseshülie.

¹⁴Siro themiako bu mia tsopfhü teiko nu mia khruohilieketuo la mhatho keviko chü mezhieliecie, sitse uko mhachülie moketa chü lho.

¹⁵A zekebako pete n kelushü ho. Kepeleu geinu hie khriekezha pete kelushücie. Ngukemezhie bu nie pete ze bakelieu chüliecie.[9]