Read Angami Naga Filemon 1 Bible Online

Filemon 1 - Angami Naga bible

Filemon 1

¹Paul, Khrista Jisu la kedie chüketuou, mu a siezeu Timothi ki nu, Thupie hie khrieu mu kedziese di mha chüyakezha Filemon,

²mu u üpfü Afia, mu hie ze chüpahi chüyakezhau Arkipa tsiu n kinu kehouyakezhako ki keshü:

³Ukepenuopfü u Puou mu Niepuu Jisu Khrista bu ngukemezhie mu noune pie nieko tsücie.

⁴A kecha nu n rükrakecü metsei a a Kepenuopfü thezie sei baya,

⁵kekreilamonyü no kemesako pete khrie mu Niepuu Jisu kitsa n kepele keba dze sikelie la.

⁶A kechau sü, n bu Khrista nunu mha kevi se u vie chü baketako si pesou salie di n kepele keza pevi sakelieu zo.

⁷A siezeu, n kekhrie geinu a kenei mu thenou keluo ngu philieya, kekreilamonyü n la kemesako u nou va perheikelie ngukelie la.

⁸Mhaca hau la, a Khrista geinu thepfu se di n bu n mhatho chülienu diekhashülie vi zoürei,

⁹a kekhrie nunu n ki chakecüu a neikuote, mu a Paul, phichümia puo tuoi mu Jisu Khrista diemia puo[1] rei chü sa di süu chaya.

¹⁰A n ki chayakecüu sü, kedieki nunu a puo puo chüketa a nuou Onesima la zo.

¹¹Hamhodzü we n bu puo la kepra puorei jü, derei tsiewe puo n la mu a la rei mevi[2] sekecü puo chüliete.

¹²A tsie puo ketse lapie n ki shüya, süu a melou ketseshüzhie.

¹³A dieliekeviu la kedie chüketuo ki puo bu haki nu n sou chü a lie chü bata nyü;

¹⁴derei a n medo rüsa mo di mhapuorei chü nyü mo, süusü n kemvü kechü geinu monyü n bu n nounu keda di ketseikevi thashüketuo la zo.

¹⁵Siro puo zopuoki n therketa ha, puo bu la vor n ze sei bataketuo puo la mecie,

¹⁶puoü kediemia ü sa monyü, kediemia kirei u kekhrie siezemia puo chüte, süu a kitsa rei phi zo, derei n kitsatie rei, puoe chüüphou mu Niepuu kitsa rei sikuota zo.

¹⁷Süla no a üse n dziesemia puo ücü leya ro, a zekelie mhiei puo zeliecie.

¹⁸Puo n gei kekrüwata ü mha ro, morei n pu pfüzhü üro, süu a za nu shüwacie.

¹⁹A Paul a thuo a dzie se leshü hau thushüya; a thepu süko su phrewatuo. No n phou zorei a pu pfüzhü zo, derei a süu pu lho.

²⁰Uwe a siezeu, Niepuu zanu n geinu mha hau pie a mevi chücie. Khrista geinu a nou va pemvüshücie.

²¹No a diezelieketuo thepfu di a thupie n ki shüzhie ho, mu noe ha kezie rei chü zoketuo si ba zo.

²²Siro a la rüsobou puo kesepie bacie, nie kecha geinu mia a kha lashü di a bu nieko ki vorlieketuo merü ba.

²³Khrista Jisu nu a ze kedie chü kebau Epafra n kelushü ho,

²⁴mu a ze mhachüyakezha Mark, Aristarka, Dema mu Luk rei sa n kelushüya.

²⁵Niepuu Jisu Khrista ngukemezhieu bu n ruopfü ze baliecie.[3]