Read Angami Naga Ibriko 10 Bible Online

Ibriko 10 - Angami Naga bible

Ibriko 10

¹Siro thezho-u zowe mha kevi vorketuoko kethoko monyü, süko khrü puo zokecü la, teiciekepra ruosuo chü tuoyakezha ruosuo süko se penuo vorkezhako chü pevi tseilie kenjüta zo.

²Mo üro rüsuoyakezhakoe va puo chü u chü kemesalieta üdi kephouma dze le u pejo sa mota di ruosuo rei chü sa mota motuoü me?

³Derei ruosuo süko kechü geinu mia bu teiciekepra u thuo u kejokemouko rükra lalielieyakezha zo.

⁴Kekreilamonyü thudo mu temvü zie zowe themia kejokemouko setalie kenjü zocü la.

⁵Süla Khrista kijü nu kevor ki, puo sie, “No zowe ruosuo kechü mu mhase ruosuo chütuoü kevorko n neiya mo, derei no a la themo puo keseshüwate;

⁶no zowe kethe ruosuo mu kephouma ruosuoko nu n neiya mo.

⁷Sitse a sie, ‘Harie, Kepenuopfü, a zowe n medo-u chütuoü vor zowe, he-i Kepenuopfü’ (Leshütshüu nu a dze thupiekezhü tuoi)” sishü.

⁸Puo nnyhü pukeshü, “No we ruosuo kechü mu rüsuotuoü mhase kevorko tsiu kethe ruosuo mu kephouma ruosuoko mengu morei n nei reiya mo” ishü zo, (ruosuo hakoha thezho-u medzi di chüya.)

⁹Süsie rei, puo pukecü, “Harie a we n medo chütuoü vorwe” si. Puoe kenuou sedeshüketuo la kerieu khawate.

¹⁰mu süusü Ukepenuopfü medo la Jisu Khrista mo-u pie vapuochü u ruosuo chüwaketa la u chü kemesaliete.

¹¹Siro zievo kehoupuorei teisonhie ruosuo kechü sie chü lala thaya rei, süko kejo kephouma chü setalie kevi ruosuo mo.

¹²Derei Khrista we kechachie la kephouma ruosuo va puo rübei nu chüwa di vo “Ukepenuopfü zatsa bate,”

¹³mu sidi “Puo ngumvüko pie puo phikhro shüwa kemochie” pfhe bate.

¹⁴Kekreilamonyü ruosuo chü keviwa di kechachie la chü kemesalieketako chü pevi tseiliete.

¹⁵Süla Kemesa Ruopfü rei u ki puo zhapu khashü, di sie,

¹⁶“Vorkezhü teisozhako nu a uko ze dietseidiekho chüketuou hauha zo; Niepuu siya: A a zhoko pie uko melou nu shütuo, mu a süko thupie uko nou shütuo” si,

¹⁷puo pu sacü, “A uko kephoumako mu uko thezho kevarhuoko rükra[11] sa motatuo” isi.

¹⁸Mha hako vakelie nyita ro, kephouma ruosuo chü sa morei vite.

¹⁹Süla, a üpfüko mu kezeko,[12] Jisu zie lawe thepfu di Kemesachüu nu lelie vite,

²⁰puoe lhapiekezha pfheu pfüthe le di cha kesa mu kerheicha puo u la khrüshüwaketau ze di (süusü, puo mo-u geinu zo).

²¹Mu we Ukepenuopfü ki nu zievo kezha puo bate,

²²süla we u nou ketho chü mu kepele se chüsechü di u pejoketuo noule chü kemesakewa mu dzü kemesa pie khrüwaketa umo pfü di Ukepenuopfü penuo volie khe.

²³We rüditalie kelho u siedze süu theze kemetei se tha zolie khe, puoe phrapiekezhüko dietho zotuocü la.

²⁴Mu úko huoniehuo nou chüpie huoniehuo khrie mu mha kevi chülie khe,

²⁵huomia zho tuoita mo di úko we keze kehou seiyakezha zho-u khawa hie khe, sikecüumonyü úko huoniehuo tarho ba zolie khe, Teisozhau penuo miemie vortazhücü ngu baketa la.

²⁶Kekreilamonyü u bu ketho-u silieketa sie, u thuo u khre u ra chü phouma ro, kejokemou valieketuo ruosuo kekrei ba sa mote.

²⁷Derei u nyie kecüketuo mu kemeriekecü mi thuo mia petsouyakezhako pekawaketuou zote.

²⁸Kehoupuorei Mosa zho-u ze mota ro “Zhapumia kenie kese die geinu” puo ngumezhie moto zo di dukhriwaya.

²⁹siliro, mia puo Ukepenuopfü Nuou melieta, mu thezie pie chü kemesalie di dietseidiekhokelieu üse mesa kemo puo mhieta mu ngukemezhie Ruopfüu rei thiketamia süki rei puo siazha rekuo zhü mo me?

³⁰Kekreilamonyü, “Khepu sü a mese, a süu chüshütuo” idi pukeshü, we si ba. Süsie rei, “Niepuu puo themiako nyie kecütuo” si lashü.

³¹Rhei tuoyakezha Ukepenuopfü dzie nu letuo ükecü mha kemichie kezha se puo zo.

³²Derei nie kezie ngulieketa theriekiko rükra lashücie, süki nie kemezhiekecüko nu rei shügeshühie thalie zo,

³³huoki mechü nunu pese mu mia bu nie pechüpenyü, mu huoki sikecü ze kesekecüko rei ze puo chü.

³⁴Kekreilamonyü nieko kedie kechüko rei ngumezhie, mu mia nie vie peka cülie zorei nie neisiei di hielie, mha vikuokecü mu jütalie kelho pie nie vie chüketa la.

³⁵Süla, nie thepfu baketa hau pejüwa hiecie; süu zhakhra kezha se vorshü zotuo.

³⁶Nieko Ukepenuopfü medo-u chülieketuo la, mu phrapiekezhüko ngulieketuo la shügeshühie tha zoliecie.

³⁷Kekreilamonyü, “Puotei huoyo sie, mia puo vortuoü ketuou vortuo mu menuotalie lho;

³⁸derei a themia kemiathoko we kepele geinu lhoutuo. Sirei kehoupuorei tsiesieketako a ruopfü sümia ngu puo neilie lho zo” si piezhü.

³⁹Derei úko zowe tsiesie la keka nu voketako monyü kepele nyi di u kelalieketuoko zo.