Read Angami Naga Ibriko 11 Bible Online

Ibriko 11 - Angami Naga bible

Ibriko 11

¹Siro kepele-e siedze ngulietuoü ketuoko merü tou baketa puo, ngu mo zoluo rei si tou baketau zo.

²Ketho zo, u pfutsanuoko rei kepele süu la uko üse mezhü ülie.

³Kepele geinu teikijü chükelie Ukepenuopfü die geinu zo ücü silie, sidi ngu kemoko geinu kengu vieko chüse parlie.

⁴Kepele geinu Abel ruosuo chüpie Ukepenuopfü ketsü la, süu Kain ruosuo ki vikuoükelie zo. Sügeinu puo üse miatho ülie, sidi Ukepenuopfü thuo puo mha khakeshüko puotou ükelie zo; süla puo siata zorei puo kepele süu geinu tsierei u rüchüya.

⁵Kepele geinu Inok bu sia mo di ze khote, mu “Ukepenuopfü thuo puo ze khoketa la puo ngu mote,” Kekreilamonyü puo ze khoketa mhodzü rei “Puo Ukepenuopfü nei chülie” ükecü zhapu chüshü zo.

⁶Mu kepele sa mo di Ukepenuopfü nei chülie kenjü, kekreilamonyü puo ki kevormia, puo ba zoükecü mu puo pfhü kevormia mhapie tsüshüya ücü pele morosuo.

⁷Kepele geinu Noah rei vorketuoko ngu moluocü nu Ukepenuopfüe puo tarhokeshü dieu silie, mu tarhokeshü dieu ze di rou puo chülie, puo mu puo kinuko kelalieketuo la; süu geinu puoe kijüu pejowate, derei kepele la puoe kemiatho kayieu chüte.

⁸Kepele geinu Abraham rei puo kekie die ze di pie tsütuoü phrapiekezhü kijüu nu voketuo la tuo prata, puo kevokevü cha si mo zorei.

⁹Kepele geinu puotei huoyo la puoe phrapie puo ketsü kijüu nu chazoumia mhie di lhou, dzüpfheki nu lhou, Isak mu Jakob unie rei sümhie di pfheki nu lhou, unie rei puo ze kayie kerhe zocü la.

¹⁰kekreilamonyü puoe merü keba nadi puo mvü dzepie zhükewa puo, süu rhi mu chükeshüu sü Ukepenuopfü thuo zokecü nadiu pfhüzhü zocü la.

¹¹Kepele geinu puo yie ngulie kevi kekuo ngulie, puo rei tsata mu Sara rei nuojüpfü puo zo, sirei puoe phrapiekezhüu dietho zoketuo peleketa la.[13]

¹²Sidi kesiamia kemhie puo geinu zorei puo se puoyie “Teigei themvüko mhiei mu dzükezha khieki theshünyo tuoi phrü hulie kelho kekra lhoulie.”

¹³Themia hako pete rei phrapiekezhüko ngulie mo, rei kepele nunu sia phrete, derei uko ratsa nu süko ngu di u neita zo. Uko pete rei kijü hanu la zowe rüsomia mu chazoumia zoü pu,

¹⁴themia hai di pukeliemia u rüna ketho puo pfhükezhü thakeshü la.

¹⁵Uko khawaketa kijüu dze leücü siewe, uko sünu la vota zotuo.

¹⁶Derei ukoe vikuokecü rüna puo mengu tuote, süu teigei rünau. Süla Ukepenuopfüe uko bu puo uko Kepenuopfü üdi kie mengata mo zo; ketho zo, puo uko la nadi puo kesepie bate.

¹⁷Kepele la Abraham rei puo dojü kesie ki, Isak rei pie ruosuo chütuoü sie zo. Phrapiekezhüko ngulieketau puo nuo pfuliu zorei khapie ruosuo chütuoü dojüse tuo,

¹⁸Nuo süu dze, “Isak geinu n nuosenuoyie üdi kieketuo siertuo” isipiezhü zorei.

¹⁹Puoe Ukepenuopfü kesiamia zorei chü perhei lalie kevi pele zo, mu sürhi puo nunu puoe puo ngu lalieta zo.

²⁰Kepele la Isak rei hasie vorketuo thejako japie Jakob mu Esau unie tsüwa.

²¹Kepele la Jakob rei siatatuoükezhü ki japie Josef nuonie tsü mu, “Puo the mengupie di rüsuota zo”

²²Kepele la Josef rei puo se tieki Israelmiako tuo la pralietaketuo dze puta zo mu puo khruketuo[14] la mha morokesuoko pushü zo.

²³Kepele la Mosa penuokelie ki puo puo puo zuo unie thekhrü se puo keviese bata, unie unuoyo zivicü ngucü la; sidi unie kediu thezho khakeshü rei prei mota.

²⁴Kepele la Mosa rei phichü sierkelie sie puo kediu nuopfü nuocü rei kie mvüta,

²⁵sidi kephouma nunu puo nei kebau kirei Ukepenuopfü themiako ze kemezhieketuo kedalie.

²⁶Puo Ijipt kinyiko pete ki rei Khrista la thetha pfükeshü we puoma rekuo ücü leta, puoe thiesie zhakhrau meho tuoketa la.

²⁷Kepele la puo kediu nouyieu prei mo zo di Ijipt nunu tuoprata, kekreilamonyü puoe umhi ü ngulie kelho-u ngu baketa tuoi khashü mvü beita zo.

²⁸Kepele la puoe Ciekevonyiu keselie mu thezie kegepie vakecüu rei chülie, sidi nuorieu kepekau bu Israelmia nuorieu pekawa molieketuo chülie.

²⁹Kepele la themiako Kemerie Dzükezhau ha rei ü kijü keso chülie di cie vota zo, derei Ijiptmia süu cietuoü kele ki uko pelheikhriwa.

³⁰Kepele la uko zha thenie tuo Jeriko dahou-u whikeshü sie süu bu tetsuta.

³¹Kepele la dieze chülie moketako donu nu thethenupfü Rahab dukhriwa molie, kekreilamonyü puo puo neisiei di mha rie kevornie pesokelie la.

³²A bu kedipuo pu sa ta? A Gideon, Barak, Samson, Jeftha, David, Samuel mu siedzekesiko dze putuo üro pu kekralie lho,

³³süko kepele geinu kedirüvieko penyülie, kethoca chülie, phrapie kezhüko rei ngulie, losha tie rei pha khalie,

³⁴kemeriekecü miüko rei biemhelie; zhiecha rei therhielie, kuo kemo nu rei kekuo ngulie, terhü nu miavimia chülie, ngumvümia rüpfhünuoko rei whuokelie zo.

³⁵Thenuko bu u themia siaketako rheilakelie ngu. Kekreiko kedieki nunu par mvü di mia bu u pechü, uko rheilakesie vikuocü puo menguketa la.

³⁶Huomia mia bu u kre, u vü, u tepie pha mu kedie chü.

³⁷Ketsie pie u vakhri, seigei pie rethe,[15] zhiecha pie uko dukhri; uko bu tekuo mu temvüzhü dzie di ze whi kho mu ke, tsopfhü, mia bu u pechüpenyü mu u pese phi.

³⁸Kijüu themia süko ze balie sü mota zo. Uko rayha mu kijüthouko gei rühou kho mu ke, tsiu tsiepfü mu keciekiko nu lhou tuota.

³⁹Sishierei kepele geinu kuokelie hako pete uko kepele la thetshe pfü phi zorei, uko phrapiekezhüu ngulie mo,

⁴⁰derei Ukepenuopfü uko la süki vikuokecü puo keseshü, süko bu úko sa mo di chü pevi tseikelie nguwa moketuo la.