Read Angami Naga Ibriko 12 Bible Online

Ibriko 12 - Angami Naga bible

Ibriko 12

¹Süla zhapumia hade puo kimhou mhie u houpfü bakecü la, mha u chakhapfü kebako mu u kutsapfü keba kephouma kha kegewa di u kegepfü ta u mhodzütsa whuo zo volie khe.

²sidi u kepele khapie u ketsüu mu chü tseishüyakezha Jisu meho zolie khe, puo mha puo kenei puo mhodzütsa bakecüko la kemengakecü rei üse mhapuo kemo mhie di krus se rei hielieta zo, sidi vo Ukepenuopfü kediba nu thezatsa bate.

³Puo kephoumamia ki nu ngukemvü hade ngulie rei kephoumako donu shügeshühiekelie leshücie;[16] sitse nie chamezie morei nie nou thachüta molietuo.

⁴Nieko kephouma ze keperhiekecü nu nie zie pekrucü ketso phi mo zoluo.

⁵mu nieko puo nuonuo üdi nie tarhokeshü dieko rükra mote, “A nuo, Niepuu n pechü di pethakeshü le kemedzawa hiecie, morei puo siazha pie n ketsü ki n nou thachüta hiecie;

⁶kekreilamonyü Niepuue puo khriemia pechü di pethaya, mu puo nuonuo üdi zelieketamia vü di zelieyakezha la” idi pushü.

⁷Nie bu vilieketuo la pechü di pethayakecü zo. Ukepenuopfüe nieko ü puo nuonuo üdi nie gei haishüya; sütuoi nuo kikecüpuo puo krü puo pethaya kemo ba ga?

⁸Mhanuü mia nuonuo pete u pechü di pethakecü ngulie hu; mu nieko sikecü ngulie mota ro, niekoe nuothonuo monyü tekhruonuote.

⁹Sizomonyü uchüuphoutsa zorei u krünuoe u pechü di pethaya, mu we süko rhuya. Siliro we süki rei ruopfü kitsa u Puou dieze chükuo di lhou zhü mo me?

¹⁰Uko zowe u mhodzü ki vi ücü puotei huo u pethayakezha zo, derei puo zowe u bu puo kemesau ngulieketuo la u la kevi le di u pethashüya.

¹¹Pechü di pethayakezha khe tseki we u neikelieu monyü u thepesuokeshü mhietaya, derei sidi pethapfülieketako kenuotsa süu la kemiatho kelhou si thenou kemene parlieya.

¹²Süla nie bou nganga tuoketako yhashülie, siro nie khoudza metei moketako chü kemeteilie,

¹³mu nie phiyhako chü kemezhüliecie, sitse phiyhoko bu rüyho sa mota di vilietuo.

¹⁴Themia kehoupuorei ze kezevituoü pfhü zolie, mu mesa zolie, si mo liro Niepuu ngulie kenjü zo.

¹⁵Miapuorei bu Ukepenuopfü u ngukemezhieu vajowa molieketuo la menuoliecie; mu kepfhü puo bu rei tsü par nieko chü pesuowa hie, si mo tse mia kekra bu rhuta rei si mo.

¹⁶Siro thiedzü Esau vatho puo la puo phichüzha ze cükelie kemhie miatho kemo mu Ukepenuopfü prei kemo puo bu rei par molieketuo la menuoliecie.

¹⁷Puo kenuotsa thejau ngulie nyü di kra zo di cha bei sie rei kha puo tsü mvüketa nieko rei si batuo, kekreilamonyü puo mhapuorei chü di puo nou kedi lakelie ba puorei ngulie moketa la.

¹⁸Siro nieko bielie kevi tu kemerie chü zo keba, zeiboui mu thedzükezei chü keba, rükrierükhriepfü keba,

¹⁹mu ketsü kekhou pfhe, puo pfhe kesi khe puo bu pu sa hietanu u mezhiemelo phreketa pfhe puo ki vor mo.

²⁰(Kekreilamonyü ukoe “Khunuo zorei kijüthou süu nyü ro, ketsie pie vakhri zotuo, ikeshüu hielie kenjüta zokecü la.”

²¹Süu kemerie chü zoketa Mosa rei ngu di sie, “A michie di peta zo”) ita zo.

²²Derei nieko Zion Kijüthou, rhei tuoyakezha Ukepenuopfü nadiu, teigei Jerusalem, puo dieliemia phrü hulie kelho kerütsopfü di vor kengu kebau, nu vorte,

²³mu teigei u za rulieketa penuolie kerieko kehou nu,[17] siro themia peteko nyie pepiketuou Ukepenuopfü ki, mu kemiathomia chü pevi tseishülieketa kemiathomia ruopfüko,

²⁴siro dietseidiekho kesakelieu nu thedo nu kethau Jisu ki, siro Abel zie kegepie vakeshüu ki die vikuokecü puyakezha puo ki vor bate.

²⁵Nieko rüchü kethau meliewa molieketuo la nie kireiliecie; kekreilamonyü süko thuo rei kijü nu uko tarhokeshüu die ze mvüketa la rüdalie lhota ro, úko we teigei nu u rüchü kethau die rünyü mota ro talie lhokuota zotuo.

²⁶Süki puo pfheu kijü shükenieshü zo; derei tsiewe puoe, “A va puo kijüu zomonyü tei rei sa shükenieshütuo” idi phrashüte.

²⁷Siro, “Tsierei va puo” icü die hau ca liro shükeniekewako bie pejüwaketuo tha toushüte mu süze mha bie kenielie kelhoko bu batatuo.

²⁸Süla we kethezie khashülie khe, kekreilamonyü we bie keniewalie kelho kedirüvie puo ngulieketa la, silie ro we Ukepenuopfü rhu mu puo khrü preisiei di puo neikecü lietho-u chülietuo;

²⁹kekreilamonyü Ukepenuopfü we mi bu mha the pejüwayakezha kemhie puo zocü la.