Read Angami Naga Ibriko 13 Bible Online

Ibriko 13 - Angami Naga bible

Ibriko 13

¹Huoniehuo khrie ba zolie.

²Thezie si kemo so pesokecü rükra mota hie, hau geinu huomia si mo di teigeidieliemia rei pesolie zeru.

³We rei kediemia zeru idi kedie chü ketuoko rüli rükralie, we rei mia bu u pechüya zeru idi mia bu u pechüyakecümia[18] rüli rükralie.

⁴Nieko kehoupuorei kishükiya üse therhu puo chü zolie, mu kiyazhü bu kerüzhüzhü chü suo; Ukepenuopfü pieü kechüko mu pierüüko pejo zotuocü la.

⁵Shükeiraka mehouta hie, derei nie vie ketuokoyo se nie nei tuolie; kekreilamonyü puoe pukecü, “A mhakipuorei n khawa morei n vawalie lho” sishü;

⁶Süla we thepfu di, “Niepuu sü a kekhruohiu zo; a michielie lho. Supuonie a gei kedipuo chülie ta?” idi pulie vi.

⁷Thiedzü nie krütako, Ukepenuopfü die se nie ki pukeshüko rükrashücie; uko kedipuo mhie di lhou vo tsoshü shicü le di uko kepele dorie lieliecie.

⁸Jisu Khrista zowe ndu rei thie rei kemhie ba zo mu kechachie situo zotuo.

⁹Mia bu kepetha die neiüko se nie se seta hie, kecükekrie zhoko medzi monyü ngukemezhieu se thenou chü kemeteikelieu we vikuo, süko medziyakezhako rei süu la kemevi puorei ngulie lho.

¹⁰We ruosuoba puo nyi, mu ruosuo pfhekiu nu lietho chüyakezhamiako ruosuoba süu geinu mhapuorei cüketuo uko mezhü puorei jü.

¹¹Zievo kezhatho-ue kephouma la ruosuo khakeshü khunuoko zie se kemesatho chüu nu leya derei khunuo moko pie casie nu thewaya.

¹²Süla Jisu rei puo thuo puo zie se themia chü kemesawaketuo la nadi kharu-u sienu kemezhieshü.

¹³Süla uko rei kharu sie pra di puo zhase pfükelieu nu puo ze thalie khe.

¹⁴Kekreilamonyü hanu we jütalie kelho nadi hanu we ba mo, derei thiesie vorketuo nadi puo pfhü tuote.

¹⁵Süla we puo za se Ukepenuopfü ketshe ruosuo kechü, süusü u tie üse puo za phrakeshüu.

¹⁶Mha kevi chü rükra mota hie mu mha pie mia ze kezalie, kekreilamonyü Ukepenuopfü ruosuo sikecüko puo neiyacü la.

¹⁷Nie krütamia die zelie mu uko khrü khro tuolie, kekreilamonyü sükoe nie phou pfheüla tuoya, mu thiesie uko mhatho süko dze se pushüketuo la. Uko bu u nousuo monyü u nei se di süko chüliecie, uko nousuo chü liro nieko la kemevi puorei jütatuo.

¹⁸Hie la cha ba zolie, hie nouleu mesa zo, mu, hie puotei pete nu therhu nunu mhachü nyü tuo zo.

¹⁹A nieko bu nie nou thetho chü sakuo di hau chünuya, a bu la nieko ki pezi vorlieketuo la.

²⁰Siro Ukepenuopfü nouneu, puoe kesia nunu u Niepuu Jisu chüperhei lakeshüu, tekuoko kepfhe kezhau, puo zie geinu kechachie dietseidiekhokelieu bu

²¹mha kehoupuonurei nie chü pevi tseishülie, siro nie puo medo chülietuo, mu Jisu Khrista geinu nie gei puo mhingu ki puo neiu chülie di kechachie Khrista bu zayie chükelieu chüliecie. Amen.

²²A üpfüko mu siezedzürieko[19], a nie bu shügeshühiepfü di nie tarhokeshü die rünyülienu chaya, a leshü thu pedzüpie nieko ki shüshü ho.

²³U siezeu Timothi kedieki nunu la parta ükecü a nie bu si nyü ba, puo puotei ki vorlie ro, a nieko ki kevor ki puo a ze vortuo.

²⁴Nie krütamia pete mu kemesako pete kelushücie. Itali nu kebako rei nieko kelushü ho.

²⁵Ngukemezhie bu nie pete ze baliecie.[20]