Read Angami Naga Ibriko 2 Bible Online

Ibriko 2 - Angami Naga bible

Ibriko 2

¹Süla we silieketau therhieta molieketuo la u terü chü süu le menuo sakuo shülie zhüte. Sitse süu nunu u hepfü tata lho.

²Siro teigeidielieko tie nunu kepar die thuo rei puotou zoü, mu thezho kevarhuo kehoupuorei morei dieze chü kemo kheko rei puo mesetou siazha ngulieya üro,

³we kelakelie do zhapie hathede chükecüu lielie mo ro, kikidi talietuo ga? Süu Niepuu thuo pu rieshü, mu puo die rünyükelieko süu ketho zo ücü u ki zhapu chüshü,

⁴sizomonyü Ukepenuopfü ungomhatho mu zasi neiüko chüshü mu kemesa Ruopfü mhaphruo kezapie puo medomia tsüshü di rünyülieketako zhapuu chü kemetei sashü.

⁵Ukepenuopfüe teigeidielieko bu we kijü kesa puo dze pu tuoyakezhau mho dituoüshü mo.

⁶Derei mia puoe mharapuo zhapu chükecü, “Themia ha kedipuo üdi no puo rüli rükraya mu, morei themianuo ha kedipuo üdi nuo puo sanyüya mu?

⁷Noe puotei huoyo la uko chüpie teigeidielieko ki rünuo zashü; no zayie mu therhu se puo keditsüre chüshüte,

⁸No mha pete pie uko phikhro shüshü.” Siro mha pete pie uko khro shükewa ki, Ukepenuopfü, uko khrükhro shü kemo mhapuorei pie ba sa mote. Mu we tsie mha peteko puo khrükhro letakecü ngu moluo,

⁹derei we Jisu ngukecü puotei huoyo la puo chüpie teigeidielieko ki rünuo zawa zorei, Ukepenuopfü ngukemezhie nu puo bu peteko la siashü, di kemezhie di siakeshü la tsie zayie mu therhu pie puo keditsüre chüpfü bate.

¹⁰Ukepenuopfü mha pete chükeshüu mu mha pete se kebau, kemezhiekeshü geinu vi tseiütsoshülie di puo nuonuoko kekra bu puo zayieu nu u ya nyilieketuo chükeshü hau puotou zo.

¹¹kekreilamonyü chü kemesashüyakezhau mu mesalieketako pete rei uko puo puo zo. Süla Jisu süko üse puo siezedzürieko üdi kieketuo mengata mo.

¹²Sidi sie, “A siezedzürieko ki n za pie pushütuo, a kehou kro-u nunu n tsheshütuo.” si.

¹³Mu la sie, “A a kepeleu pie puo gei batuo” si. Süsie rei, “A haki nu Ukepenuopfü khapie a tsüwaketa nuonuoko haki bawe” si.

¹⁴Süla nuo süko themia chüüzie chükepfü tuoi, puo rei puochü puozie chüpfü, sidi puo siakeshü geinu kesia kekuo kenyi terhuokesuo penyüwa,

¹⁵sidi kesia prei di süu die chü ketuo pete pha phreishüwate.

¹⁶Puo teigeidieliemia khruohituoü vor monyü, Abraham yiemiako khruohishüketuo la vor.

¹⁷Süla puo mha pete nu puo siezedzürieko kemhielie di kedietho mu ngukemezhie se Kepenuopfü lietho kechüu nu uko zievo kezhau chü themia kephouma neiüko Ruothoruori chüwate.

¹⁸Siro puoe medokephi mu kemezhiekecü nunu puo dojüwaketa la, tsiewe puo rei medokephi sekezhako khruohilie vite.