Read Angami Naga Ibriko 3 Bible Online

Ibriko 3 - Angami Naga bible

Ibriko 3

¹Süla a üpfü mu siezedzürieko[2], teigei phreimia chütuoü di kielieketa kemesa dziesemiako, Jisu, süu u kepele apostel-u mu zievo kezhatho-u Jisu dze leshücie,

²Mosa-e “Ukepenuopfü ki peteko nu diethokeshü tuoi puo rei puo kedakelieu mhodzünu diethoshü zo.”

³Sishierei ki kechüue kiu ki therhu nyikuokecü tuoi, Jisu rei Mosa ki therhu nyikuote.

⁴(Kekreilamonyü ki kehoupuorei puo chükeshümia puo nyi, derei mha pete chükeshüu sü Ukepenuopfü zo.)

⁵Thekemia puo tuoi di Mosae Ukepenuopfü kiu pete gei diethoshü zo, sidi puoe thiesie pu vorketuoko dze pushü zo.

⁶Sirei Khrista we nuothonuo chü di Ukepenuopfü kiu gei diethoshü, mu we ki süu zo, we se kemetei thalie ro u kemerü geinu ngukelie kethepfu mu mhokuou theze se tha zolie liro.

⁷Süla Kemesa Ruopfü pukeshü hamhie, “Thie, nieko puo silie ro,

⁸thiedzü puo nei kemo kechü tuoi, rayha nunu puo dojüketa tuoi, nie nou reta hiecie,

⁹nieko puotsanuoko a dojü, ukoe a mhathoko nguwata zorei

¹⁰teicie hiediako nu. Süla thephou süu gei a nei mote, sidi a sie, ‘Uko melou nunu cha vajowa, sidi uko a chako silie mote’ siwa.

¹¹Sidi a bu a nei kemopfü sie rüse zo di ‘A kerülei nu uko bu lelie lhote’ si zowa.”

¹²Süla a kezeko, nieko pele kemvü thenou kerüzhü nyita di rhei tuoyakezha Ukepenuopfü ki nu rüreiketa keprei la nie kireiliecie.

¹³Derei kephouma bu nieko miapuorei sewa di thenou reta molieketuo la “Thie” ikebachie, nieko teisonhie huoniehuo tarho ba zolie.

¹⁴Kekreilamonyü, we rei sietsenu si toulieketau theze kemetei se zo tha thelau tsolie liro, u pete rei Khrista ze dziese chüketamia zo.

¹⁵Süu pukeshü, “Thie, nieko puo pfhe silieta ro, thiedzü puo nei kemo kechü tuoi nie nou reta hiecie” si.

¹⁶Siro puo pfhe silie mu puo nei kemo chüwaketako suomia ga? sükoe Mosa bu krüta chü di Ijipt nunu ze parkeshüko moü me?

¹⁷Derei puo teicie hiedia suomia gei puo nei mo tuo ga? Kephouma chüwa di umo vapie rayha nu shükewako moü me?

¹⁸Siro puo rüse zo di suomia bu puo kerülei nu lelie lhoü puya ga? puo die zemvüketako zo moü me?

¹⁹Süla nie ngukelie ukoe pele kemvü la sünu lelie mota zo.