Read Angami Naga Ibriko 5 Bible Online

Ibriko 5 - Angami Naga bible

Ibriko 5

¹Siro zievo kehoupuorei themiako donu nu kedalie di puo bu Ukepenuopfü kitsa uko sou chü, kephoumako la ruosuo chüshü mia kephoumako la ruotho mu mha se kevorko khashüya.

²Puo puo thuo zorei vi tsei mokecü la puo mhale menuo kemoko mu kekrütayakezhako gei rei tseiüvishülieya;

³mu haha la puoe puo thuo puo kephouma la rei mu themiako kephouma neiüko la ruotho chü morosuo.

⁴Mu miapuorei therhu tha hau nu kedalie monyü Ukepenuopfü Aron kiekelie mhie medzi di chükelie zo.

⁵Sütuoi Khrista rei puo thuo puo chüpie therhu kenyi zievo kezhatho chü mo, derei pethokeshüu thuo puo ki: “No a Nuo, a thie n penuoliete” si.

⁶Siro puo kekreira puo rei pukecü: “No kechachie zievo chüte, Melkizedek mhie di” isi zo.

⁷Jisu rei puo chüüzie pfüketuo ki, puo kecha mu puo mezhiemelokecüko nu, kra mu puo mhidzü pekru zo di kesia nunu kelaliekeviu ki cha zo, mu puo chü kerünuopie chakelie la, puo kecha rünyüshü zo.

⁸Puoe Nuou zoürei, puo kemezhiekeshü geinu dieze kechü do silie;

⁹mu puo chüpie vi lotsokelie ki, puo die zekelie kheko la puoe kechachie kelakelie bo-u chüte,

¹⁰mu Ukepenuopfü puo ü Melkizedek mhie zievo kezhau ücü chüshüte.

¹¹Hie hau dze mha kekra puketuo ba zorei pupie nie kielie re ba, nieko mhacamhala siketuotsa kenyiebiketa la.

¹²Nieko tsiewe mia kepetha chükelie mesete, derei niekoe mia bu Ukepenuopfü die puo sede kerieko se nie petha la morosuo bate. Nieko kecüca kemeteiu monyü nudzü pie nie vachü la morosuo bate;

¹³Kehoupuorei nudzü se theke sei bayakezhamia kemiatho dieu dzetsa mhasi parlie mo di nhicumia mhie baya zo.

¹⁴Derei kecüca kemetei-e phichümia la zo, süko u nou se mhale mezhieketa la kevikesuo si kekreilieya.