Read Angami Naga Ibriko 6 Bible Online

Ibriko 6 - Angami Naga bible

Ibriko 6

¹Süla Khrista dze kepetha die sede kerieko khapie zhüwa di vi tseilieketuo dzetsa le petoulie khe. Puomvü dze kesa la mo di kesia mhathotsa thenou kedikecü mu Ukepenuopfü kitsa kepele,

²siro dzülukepfü mu u dzie khapie mia tsü gei keshü mu kesiamia rheilasieketuo mu kechachie la u capi chüketuo dze kepetha dieko bode kesa molie khe.

³Mu Ukepenuopfü u bu hau chülienu ro, we süu chütuo.[3]

⁴Kekreilamonyü thiedzü huomia u kenei ngulie, mu teigei mhaphruo rei metha tsiu kemesa Ruopfü rei u ya nyilie,

⁵mu u thuo u geinu Ukepenuopfü dieu rei vi zo ücü mu thiesie vorketuo kelhoudze kekuo rei metha,

⁶sidi tetsu lata ro, themia sikecüko chü kesa lalie di thenou kedilieketuo chülie kenjüte, kekreilamonyü ukoe Ukepenuopfü Nuou gou la mu mia bu puo peseketuo chüwate.

⁷Kijü kehoupuorei tsiekenuo teirü tsurkecüu krielie di mha leikeshüko petsüpethepie ciekeshümia tsüya liro Ukepenuopfü theja ngu salietuo.

⁸Derei mhanuü süu nu kikhahuko mu nharhu lhou sierta ro, süu kemethuote; mu Ukepenuopfü bu rüsewaketuo mu mi bu thewaketuo zote.

⁹Hie khrieko, hie die hakemhie pushü shierei, hie nie pelekhrupfü ba zo, mu mha vikuocüu nie kelakelie sa baketa si touta zo.

¹⁰Kekreilamonyü Ukepenuopfü dietho motaya mo; puo nie mhachükeshüko morei puo za la nie kekhrie nunu mia khruohikeshü mu tsierei nie kezemia kemesamiako gei süu chüshü bayakezhako rükra motalie lho.

¹¹Hie kemenguu sü nieko mia puopuokecü bu shürhei se zo tha thela tsolie mu nie kemerü puo kebau ngu toulieketuou zo,

¹²sidi nie mecüta mo di pelekelieko mu shügeshühielieketako mhie di Ukepenuopfü phrapiekezhüko ngulie nyüya.

¹³Ukepenuopfü puo die phrapie Abraham ki keshü ki, kekreimia puo ki zhakuokecü ba moketa la, puo thuo puo za se rüseshü,

¹⁴sidi sie, “A japie n tsü tou zotuo mu n chü pekrashütuo” sishü.

¹⁵Sümhie di Abraham shügeshühiepfü di pfhe ba zolie, sidi Ukepenuopfüe phrakeshüu ngulie.

¹⁶Themiae rüse ro, puoe puo ki zhakuokecümia puo za pu rüseya, sidi süu geinu mha pete pepiya.

¹⁷Sütuoi Ukepenuopfü rei mha pupie tsütuoükezhü ngulieketuoko ki puo die kediwalie kelho rüse di pukeshü geinu u bu si toulieta zo.

¹⁸Sidi rüditalie kelho kenie geinu, Ukepenuopfü mhakipuorei tijütalie lho zoükecü geinu we ta puo khrükhro kevoko bu u mhodzütsa kezhü siedzeu thezetsase tuolieketuo le u kethepfu nyi selieketuo chüshü.

¹⁹We u kemerü baketa hau, u chüpie khrukhre mu u ruopfü khe kemeteise bate, mu kemerü süu zo kinu le pfhe lhapiekezhau pfüthe kemesatho chüu nu lete,

²⁰sünu Jisu, Melkizedek tuoi kechachie zievo kezhau chü di u la pedzüperie sünu lete.