Read Angami Naga Ibriko 7 Bible Online

Ibriko 7 - Angami Naga bible

Ibriko 7

¹“Melkizedek hau Salem nu kediu, kerükrietho Ukepenuopfü zievo rei chü, Abraham kedi diako penyüwa di la vorkezhü ki puo ze kese di japie puo tsüshü”;

²mu Abraham “Mha ngukelie kehoupuonurei ker za puo” khapie puo tsü Puo za ca kenieu ro, “Kemiatho kediu si”; süsie puo Salem kediu rei sa, puoca, “Vitho kediu” isi.

³Puo puo, puo zuo, mu puo krü puo pfutsanuoko dze, puo penuokelie mu puo se dze puorei jü, derei puo Ukepenuopfü Nuou kemhie puota zo; puoe kechachie zievo chü sei bate.

⁴Puo zhapie kedipfü chü shi! Abraham, u pfutsau zorei terhü nunu ngukelie pete geinu ker za puo pie puo tsü.

⁵Levi yiemiako bu zievo chüketuo thezho-u nunu pushü, uko bu Israelmia puoca, uko siezedzürieko, Abraham yie geinu lhou kesierko ki nu zorei ker za puou kengulieketuo la.

⁶Derei themia hau, uko yie geinu lhou sier mo, derei puoe ker za puo pie phrapiekezhüko ngukelieu Abraham tsü di japie puo tsüshü.

⁷Süu japie mia ketsüu theja piekelieu ki rei zhakuo zo.

⁸Kesia phou kepfü zievoko bu ker za puo lieya, derei puoca kekreiu nu we, rhei tuoya zo üdi pu tuoketau bu süu lie.

⁹Süla ca puo nu ro Abraham-e ker za puo khakeshü ki, Levi rei ker zau khashüwata zo,

¹⁰kekreilamonyü Melkizedek puo ze kesekecü ki puo pfutsanuo vanu tuo zoluo.

¹¹Siro zievo kechü zho-u pemvü di vi tseikecü ngulieya üro, themiakoe zievo mhatho khronu thezho-u nguliecü la, kiüdi Melkizedek mhiekecü, Aron mhie kemo zievo kekrei puo bu la sier morokesuo pu lata ga?

¹²Kekreilamonyü zievo kedikecü ze di thezho-u nu rei mha huo kedi morosuotaya.

¹³Siro puo dze pupiekezhü hako lesie ro puo seyie rei krei, puo seyie nunu miapuorei ruosuoba lietho chü mo.

¹⁴Kekreilamonyü puo Juda yie geinu siercü we si ba, mu Mosa zorei zievoko dze pu kesie ki seyie hau pu mo zo.

¹⁵Tsiewe Melkizedek kemhie zievo kekrei puo sierkelie geinu hau dze si kemeciekuo parte,

¹⁶puoe chüüzie yie geinu monyü pekawalie kelho kerheiro kekuo puo nunu zievo chülie.

¹⁷Kekreilamonyü süu dze pukecü, “Melkizedek kemhie, no kechachie zievo chüte” si.

¹⁸Tsiewe die khakeshü kerieu khawate, kekreilamonyü süu thachü mu kemethuo puo zokecü la,

¹⁹(Mosa zho-u mhapuorei chü pevi tseishülie kenjücü la); tsiewe u kemerü kesa puo khashüte, süu geinu Ukepenuopfü penuo volieya.

²⁰Hau we rüse puo se mvü kemeteilie, kekreilamonyü kekreiko we zievo pie pfükecü rüse mo,

²¹derei hau we rüse puose, kekreilamonyü puo ki pukeshüue sie: “Niepu-ue rüseshüte mu puo die vawalie lho, ‘No kechachie zievo chütuo,’ ” isiwaketa la.

²²Süu medzi di Jisu rei vikuokecü dietseidiekho puo la jamin pfüliete.

²³Kekrei puo liro, thiedzü zievomia kekra tuo rei kesia bu uko deiwawa di u mhatho chü salie lhotata vor,

²⁴derei puo we zievo mhatho-u chü sei vo zotuo, kekreilamonyü puo kechachie batuo.

²⁵Süla puo geinu Ukepenuopfü ki kevo khe kelalietuo,[4] puo kechachie rhei tuo di süko la cha sei bayacü la

²⁶Kekreilamonyü we zievo rükrie haikecü se morosuo tuoya, puoe mesa, pejolie kenjü, rhuta mo, kephoumamia ki nu kela kreilie di teiko ki rei rükriekuo.

²⁷Puoe zievo kekreiko mhie mo, puoe puo thuo puo la mu süsie themiako kephouma la teisonhie ruosuo khakeshü mhatho-u chü morei vite; hau puoe puo phou pie va puo ruosuo chükeshüu pete la zo.

²⁸Thezho-u zowe kethachü nu ketuo kro puo kedapie zievo chü, derei thezho-u sie nu kevor rüse dieue kechachie vi tseikecü Nuo puo bu chüliete.