Read Angami Naga Ibriko 8 Bible Online

Ibriko 8 - Angami Naga bible

Ibriko 8

¹Hie pu keba ca kemeyieu sü hau zo: teiko gei Kezhatho-u kedibau zatsa baketa u zievo Kerükrie hikecü puo bate.

²Mu puoe themia bu monyü, Niepuu thuo chükeshü kemesachüu nu pfheki ketho-u nu lietho chü bate.

³Kekreilamonyü zievo kezha kehoupuorei kedapie puo bu mia mha khakeshüko khashü mu ruosuoko chüya; süla zievo hau rei mha huo khashü morosuotaya.

⁴Mhanuü puoe kijü nu ba üro puoe zievomia puorei mota zotuo, kekreilamonyü zievomiako thezho-u medzi di ruosuo khakeshüko mezalie kevi batacü la.

⁵Ukoe teigei chüketuoko rhiu mu puo khrü puo zo; kekreilamonyü Mosa rüsuo pfhekiu pethoutuoü kesie ki, puo tarho di, “Kijüthou geinu thapie n pekiekeshüu medzi tou di chüliecie” ishü zo.

⁶Derei tsiewe Jisu lietho vikuokecü puo nguliete mu puo thedo nu dietseidiekho vikuokecü puo chükelie rei phrapie kezhü vikuocü puo geinu puo mvüdze chüliete.

⁷Kekreilamonyü dietseidiekhopiekezhü kerieu vi tseiü liro, kekrei puo pfhü saketuo ba ba mo.

⁸Ukepenuopfüe süu vi tsei kemo ngu di pukecü: “Teisozhako vorzhü tou zo, Niepuu puya, a Israel kiu mu Juda kiu ze dietseidiekho kesa puo chüketuo la;

⁹a uko pfutsanuoko ze dietseidiekhokeshüu mhie mo, a Ijipt nunu uko dzie teshü di uko chatha ze kepar ki; sirei uko a dietseidiekho-u nu tuolie mote, süla a rei uko sanyü mote, Niepuu sidi puya.

¹⁰Teisozha süko sie a Israel kiu ze dietseidiekho ketuou hauha zo, Niepuu puya: A a zhoko pie uko nou shüshütuo, sidi uko melou nu thushütuo, mu a uko Kepenuopfü chütuo, mu uko a themia chütuo,

¹¹Siro uko huoniehuo petha morei mia puo mia puo ki, ‘Niepuu siliecie,’ isi lho, kekreilamonyü uko pete a situo, kecütho-u nunu vo kezhatho-u ketso.

¹²Kekreilamonyü a uko kejokemouko ngumezhieshütuo, mu a uko kephoumako rükra sa motatuo” sishü.

¹³Siro puo “Dietseidiekho kesa puo” idi pukeshü ki, puoe kerieu chüpie kewe chüwate. Mu sielie suoketau mu weketau jü mhatatuo.