Read Angami Naga Ibriko 9 Bible Online

Ibriko 9 - Angami Naga bible

Ibriko 9

¹Siro dietseidiekho kerieu nu zorei kerüsuo la thezhoko mu kijü nu rei kerüsuoki nyi.

²Kekreilamonyü rüsuopfheki puo chülie, süu kerieu, mu sünu mitubau, mizhüu, mu Kepekie Niekhrüdau khapie ba; hau üse Kemesa Chüu üya.

³Siro süsieu nu pfhe lhapie khakecü bou-u üse Kemesa sie rei Kemesa Chüu üya.

⁴Sünu mha kethengu theketuo suna ruosuobau mu dietseidiekho bou-u, pete suna pie dakecüu, suna pie kechü lipfhü manna pie shüse kebau, Aron the puonyü the zo parketau, tsiu dietseidiekhokelie tsiekranie rei pie zhü;

⁵sümho gei zayie kechü Cherubnie unie shü kelhapie ngukemezhiebau whepfü ba. Tsie mha hako dze puopuo di pu menuo balie lhote.

⁶Mha süko keselie zhü, di zievoko bu rüsuopfheki bou kerieu nu le di ruosuo chü zhü zo;

⁷derei zievo kezhau rübei kibou kenieu nu lelie kevi zo, mu puo rei cie puo nu va puo rübei lelieya, mu puo süki thezie se di puo thuo puo la mu themiako le kemo nunu kephouma chükewako la le ruosuo chüya.

⁸Haha la rüsuoki pfhekiu nu kibou kerieu kebachie kemesabau nu leketuo cha khrüshü mo zo üdi Kemesa Ruopfü thuo thashüte.

⁹Hau pie tsiedo teiu la thakie[5] puo chüshü, sütei ki mia puo puo mha khakeshü mu khunuo dukhripie ruosuo chükeshüko la puo nou chü pevi tseilie kenjü,

¹⁰derei mhako chüpie puotoulieketuo teiu vor kemochie kecükekrie mu u chü kemesaketuo zho kro puo zo.

¹¹Derei Khrista vor di mha kevi vorketuoko[6] mho zievo kezhau chülieta tse, puoe (thedzie üse chü kemo, süusü tsiedo mhachükelieko mhie mo di), rüsuopfhekiu ki zhakuo mu vi tseikecüu nu,[7]

¹²puoe va puo chü le Kemesatho Chüu nu le ruosuo chüwate, sünu temvü mu mithunuo zie se mo, derei puo puo thuo puo zie se le di kechachie la rhakelie se vorshü.

¹³Kekreilamonyü temvü mu thudo zie mu thuünuo thekeshü mige kegepie themia u perhuwaketako chü kemesalieya liro,

¹⁴süki rei Khrista zieu we u chü kemesakuoshü motuo me, puoe kechachie Ruopfüu geinu puo thuo puo chü kemesapie Ukepenuopfü tsükeshü la, sidi kesia mhatho chü tuoketa nunu u chü kemesawa di u bu rheituoyakezha Ukepenuopfü lie chüketuo la.

¹⁵Hau la puo dietseidiekho kesa puo nu thetou nu kethau chü, sidi kielieketako bu phrapiekezhü kechachie baketuo kayie welie vite, kekreilamonyü dietseidiekho kerieu[8] khrükhro ketuo teiki rei jo tuoketako rhalieketuo la puo siashü zo.

¹⁶Siro mha pupie mia tsükeshü die puo[9] nyi ro, puo se sienu kekreiu bu süu ngulieya.

¹⁷Kekreilamonyü phrakeshüu[10] se sienu süu puo kekuo nyitaya, derei puo rhei kebachie we mhapuorei chülie kenjü.

¹⁸Sümhiei dietseidiekho kerieu zorei thezieu sa mo di chülie mo zo.

¹⁹Kekreilamonyü Mosae thezho-u medzi di diekhakeshü pete pie themia peteko ki pukeshü ki, puo thudonuo mu temvü zie pie dzü sa kereilie mu chümielo kememhie pie hisop nha gei phakelieu petselie di kegepie thezho leshüdau mu themiako va phreshü zo.

²⁰Sidi sie, “Hauha Ukepenuopfü nieko ki die khakeshü dietseidiekhokelie zieu we” iya.

²¹Sükemhie di thezieu kegepie pfhekiu mu rüsuo nu seyakezha mhabou pete rei vashü.

²²Ketho, thezho-u nu zorei thezie se mha kekratsa chü kemesalieya, mu thezie sa mo di kephouma valieya mo.

²³Siro teigei keba rhi hako thuo rei mha süko se chü kemesalie morosuota ro, teigei keba vieko zowe süko ki rei ruosuo kevi se morosuokuo zo.

²⁴Kekreilamonyü Khrista zowe themia dzie se chükelie kemesachüu nu le mo, süu ketho-u rhi puo zocü la, derei puo teigei le di tsie u souchü vo Ukepenuopfü mhodzünu bate.

²⁵Sizomonyü zievo kezhau puo thuo puo zie monyü perinuo zie se di teiciekepra kemesachüu nu le sei tuoyakezha tuoi Khrista zowe tsiemelie puo phou pie ruosuo chüshü balie lhote;

²⁶simotuoükecü sie kijü chülie tsenu vor kenuotsa ketso puo tsiemelie kemezhie morosuota zotuo. Derei puo mia mhingu chü vor di kephouma valieketuo la puo thuo puo pie va puo chü ruosuochüwate.

²⁷Mu themia bu va puo sia phre di süsie ketsokecü vortuoüwaketa tuoi,

²⁸süla Khristae themia kekra kephouma pfülietuoü di vapuochü puo phou khashüwate, mu puo vorketuo va kenieu we kephouma va lashüketuo la monyü puo merü kelho di pfhe kebako kelalieketuo la vorcü zotuo.