Read Angami Naga Jakob 1 Bible Online

Jakob 1 - Angami Naga bible

Jakob 1

¹Ukepenuopfü mu Niepuu Jisu Khrista kituou[1] Jakob ki nu, Khapie Cüre tuoketa seyie kerekenieko kelushüya.

²A üpfüko mu kezeko,[2] dophi neiüko nie gei kephir ki nie la kevi zo ücü lelie,

³mu nie kepele dojükeshü geinu shügeshühiekecü nyi parlieketuo siliecie;

⁴mu shügeshühiekecüu bu nie chüpie vi tseiliecie, sitse nie mha kehoupuonurei lope mu tso moketa chü lho.

⁵Nie kehoupuorei mhasi jü ro, puo bu mephruomevuoi mu panya mo zo di pie mia tsüyakezhau Ukepenuopfü ki chaliecie.

⁶Sirei pelekhru di chalie, kenoudo moto di, kekreilamonyü kenoudokezhau teikhrie bu hepie lutsahatsa vaketuo dzürüpfhü mhie zocü la;

⁷kenoudokecümia bu Niepuu ki nu mhapuorei ngulieketuo le hiecie,

⁸nou keniemia sü mha kehoupuonurei puo nou jü balieya mo.

⁹Kepelemia[3] miasuomiaruomia zorei puo piesiekeshü la puo mhokuo chü balie,

¹⁰mu kenyimia zorei puo chü kerünuokewa ki puo neiliecie, kekreilamonyü kenyiu zowe lie nu nhapou kemhie jüta zotuo.

¹¹Niaki puo teinia chü se sier nha phie pesiawaya; sidi puo pouko phie pesiawaya; sidi puo pouko rürhotaya mu puo ziviko jütaya, süsütuoi mhakenyimia rei u rhie chü di pfhü ketuoko ra jüta zotuo.

¹²Dophi nu rei shügeshühie thalieyakezhamia thejakepfütho. Sikecümia u kedokecü nu thakelie la kerhei keditsüre Niepuu[4] pie puo khrieyakezhako tsütuo üdi phrapiekezhüu ngulietuo.

¹³Süla kehoupuorei dophi sikecü puo gei kephir ki, “Ukepenuopfü a medophiya” isi hie. Kekreilamonyü mha kesuo se Ukepenuopfü kedolie kenjü mu puo thuo zorei miapuorei medophiya mo zo.

¹⁴Derei kehoupuorei dophi puo gei phiryakezhau puo menguko bu puo meshülie di puo seketsilieyakezha zo;

¹⁵Süsie puo menguko nuonipfülie di kephouma penuoshüya siro kephouma phichülie tse kesia penuoshüya.

¹⁶A khrieko, mia bu u sewa hiecie.

¹⁷Mephruomevuoi di khakeshü, mu vi tseikecü mhaphruoko pesogei kezie Puou ki nu ker phreya, puo zowe u khrü kemhie rüdirüliya mo.

¹⁸Puo thuo puo medo nunu ketho dieu se u chü u rhi parlie, sidi u bu puoe pelhoukeshü pete si kerieu chülie.

¹⁹A khrieko nieko hau siliecie. Themia kehoupuo bu rei rünyü rhürhülie, diepu mhamha hie, u nou meyie mhata hiecie;

²⁰nie nouyie geinu Ukepenuopfü miatho-u parlieya mocü la.

²¹Süla nieko mesa kemo shüüko mu nie nou mha kesuo bakecüko kha phrewa di nie nou mene di nie ruopfü kelalie kevi die leipie nie nou zhükewau lieliecie.

²²Derei kerünyü rübei zo di u thuo u se penya tuoyakezhamia monyü dieu chü mu zeyakezhamia chüliecie.

²³Kekreilamonyü kehoupuorei dieu rünyülie, derei chüüzeya kemomia khrüva nunu u thuo[5] u khrü nguyakezhamia mhie zo;

²⁴süko u thuo u mehoshü di tuo rüdiketa sie puo kimhiecü puo shi rükra mo mhatayakezha mhie zo.

²⁵Derei themia vi tseikecü zho-u, u kekhakejü zho-u mu le sei balieyakecüu, rünyüshü di rükra mo latayakecüu monyü chüüzelieya, süko u mhatho nu rei thejapfü zotuo.

²⁶Miapuonie puo thuo puo üse nanyü nu pecü üya, mu puo tie kekhalieya kemosie puo thuo puo nou se penya seketuo zo, mu puo nanyü rei kemethuo zo.

²⁷Ukepenuopfü u puou mhodzü ki nanyü kemesa mu rhu mo bakelieu sü hau: Merünuomia mu samipfüko mezhie rükra mu khruohikelie tsiu kijüu bu puo perhuwa mo di balieyakezhamia zo.