Read Angami Naga Jakob 2 Bible Online

Jakob 2 - Angami Naga bible

Jakob 2

¹A kezeko, zayie kechü u Niepuu Jisu Khrista pelekelie nu nie huomia khrie pekreitaya me?[6]

²Miapuonie suna dziekha nyü mu pfhemenei kevi se di nie kehou nu vor mu mhakejümia puo pfhemenei kesuo se di vor;

³mu süki nie puo pfhenei kevi keseu si krei di sie, “N pezie rei theba hanu baliecie” ita, mu mhakejüu ki, “Cüki thalie,” morei “A phiki balie”[7] isita ro,

⁴nie thuo nie donu themia kho kekrei mu nie nou puotou mo di capi chüta mo me?

⁵A khrieko, rünyüliecie. Ukepenuopfüe kijü hanu mhakejüko kedapie uko bu kepele tsa mhakenyimia mu puo khrieyakezhako la phrapiekezhü kedirüvie kayiemia chülieta moü me?

⁶Derei nie kejümiako peseya. Kenyiko thuo nieko peseya moü me? Nie merhashü ze dienyaki nu kevoko süko thuo mo me?

⁷Theza kevitho pie nie tsüwaketa zatho süu uko thuo pu pesuoya mo me?

⁸Ketholeshü nu thupiekezhü ngukelie kedizho-u, “No n siezanuomia khriepie n thuo n kekhrie mhieliecie” ikecüu dieze chü tseilie ro, no vi zo.

⁹Derei nie huomia khrie pekreita ro, nie kephouma chüta zo mu thezho-u bu nieko pejopie thezho varhuokezhamia chü bate.

¹⁰Siro kehoupuorei thezho-u pete zeya zorei ca puo nu tso mota ro, pete nu puo jotaya.

¹¹Siro “Pieü chü lho” idi pukeshü “Mia dukhri lho” ikecü rei pu sashü zo. Süla no pieü chü mo zorei mia dukhriya ro, no thezho-u varhuoyakezhamia chüta zo.

¹²Süla u kekha kejü zho-u bu nie mezhü thoshülieketuo le di diepu mu chü zoliecie.

¹³Derei mia ngumezhieya kemomia we ngumezhie mo di puo nyie kecütuo, derei ngukemezhie we dienya nu kuolietuo.

¹⁴A kezeko, miapuonie puo kepele nyi rei puo mhatho jü liro kedipuo kemevi ba ga? Kepele puo kelashülie vi me?

¹⁵Mhanuü nie siezedzürie morei nie üpfünuo huo methuo mu thiethie va rei jü tuo,

¹⁶mu nie mia puo sie puo ki, “Nie nou mene di tuolie; mi peguolie mu mhacü pevüliecie” ishü, derei nie mhapuorei pie u mo va kemeteishü mo liro, süu la kedipuo kemevi ba ga?

¹⁷Sütuoi kepele rei puo mhatho jü liro kesia zo.

¹⁸Derei huomia sie, “No n kepele nyi mu a we mhatho nyi” isituo. N mhatho sa mo di kepele balie vi ükecüu tha a pekiecie, siro a mhatho geinu kepele pekieshütuo.

¹⁹No rei, Ukepenuopfü puo ba zo ücü peleya; süu vi zo. Terhuokesuoko rei süu peleya mu michie di pe baya.

²⁰Derei mhalekemo-u, n kepele puo mhatho sa kemosie kemethuo zo ükecü no silietuo mo mo ga?

²¹U puou Abraham puo nuo Isak pie ruosuoba geikeshü la puo mhatho geinu puo ü mezhülie üta mo me?

²²No rei si batuo, puo kepele mu puo mhatho kedziese tou di mhachü; mu puo mhatho geinu puo kepele chüpie vi tseikelie zo.

²³Ketholeshü pukeshü, “Abraham Ukepenuopfü pelelie, mu süu la puoü miatho üta” ikeshü chü tseilie, sidi puo üse Ukepenuopfü zeu üta.

²⁴No rei si batuo themia puo puo kepele la rübei monyü puo mhatho rei sakecü la mezhülieya.

²⁵Sütuoi Rahab thethenupfü zorei thiedzü mia lie chü kevornie pesolie di unie ketsepie cha kekreitsa shükewa la mezhülieta zo moü me?

²⁶Kekreilamonyü umo zorei u ruopfü sa ba mo ro siatayakezha tuoi kepele puo mhatho sa mo liro süsütuoi kesia zo.