Read Angami Naga Jakob 3 Bible Online

Jakob 3 - Angami Naga bible

Jakob 3

¹A üpfüko mu siezedzürieko,[8] nie mia kekra kepetha chüta hie, we mia kepetha chüyakezhako kekreimia kirei u ketso menuokuoketuo nie si ba zocü la.

²We mha kekra nu kekrütayacü la. Derei mia puo puo diepuko nu kekrütaya mo ro puo vi tsei zo, mu puo puo kelhou peteu rei kekhalie vi.

³We mha kecü yopuo se gura me kekhalie di puo bu u die zelie, di puo ze u medora volieya.

⁴Morei rou puo dze leshü phi: Süu zha phi tsiu teikhrie bu hepie lutsahatsa va tuo zorei rou kethumia sei kecü yopuo se süu shükewhipie u thuo u medora volieya.

⁵Sütuoi umeü rei umo-u gei zatho kecü yopuo zorei se di kemelha sekecü die pulieya. Mi kecü yopuo zorei ketsa kedithede thewaya mu!

⁶Tsiu umeüe mi puo zo. Umo gei zatho kekreikecüko donu khakeshü u meüe kephouma kijüu nu tuote; süu umo pete chü perhuwaya, sidi u kelhouzho theshüya, mu süue mizie miu nu thewaya.

⁷Themiae nhachü mu pera, khunuo gouketuoko mu dzükezha nu ketuo neiüko kekhalie vi mu kekhalieya,

⁸derei miapuorei umeü ha kekhalie mo zo, mu bajülieya kemo mha kesuo puo, mia reikhriwalie kevipfü therei thuo tshu zo.

⁹We süu se Niepuu mu u Puou thezieya mu we süu se Ukepenuopfü rhi nunu chükelie themia rei rüsetaya.

¹⁰Tie puo nunu japie mia ketsü mu mia rüsekecü rei parya. A kezeko, hau hi zhü mo zo.

¹¹Dzüluoki puo nunu dzü krie kevi rei mu kepfhü rei parlieya me?

¹²A kezenuoko chiedebo geinu Oliv si, morei kezie dzüluo nunu dzü krie kevi parlieya mo zo.

¹³Nie donu supuonie mhasi mu mhacamhala sikelie ba ga? Puo bu puo kelhouzho kevi nunu, süu puo mhathomhachüko geinu menekecü mhasi geinu kepar se pekieshülie.

¹⁴Derei nie nou nu mia ngu nie ro, ngumecü tsiu mia ze keperhiekecü ba ro, nie mhasiu se kemelha di ketho-u se kecürü hie.

¹⁵Sikecü mhasi we teigei nu vor mo, derei kijü hau nu vie zo, süu u chüüphou mu terhuokesuo kitsa nunu zo.

¹⁶Mia vie mehoukecü mu u thuo u zhazhü kele kebara, kebvükecü mu mha kesuo neiü bayacü la.

¹⁷Derei peso geinu kevor mhasiu we therieu mesa, süsie kezekevi, u zho kevi, kediezelie kerüü, mia ngukemezhie mu mhatho kevi kra phicü, u nei si kreikecü, morei ketherakecü saya mo.

¹⁸Siro kezeviyakezhako kezevi di kemiatho siu leishüya.