Read Angami Naga Jakob 4 Bible Online

Jakob 4 - Angami Naga bible

Jakob 4

¹Nie donu kegei mu keprülikecüko kirapuonu vorya ga? Süko nie menguko geinu nie donu kegei sei baya mo me?

²Nie mha menguya, derei süko ba mo; süla nie mia dukhriya. Mu nie mha mehouya,[9] derei süko ngulieya mo, süla nie mia ze keprüli mu kegeitaya. Nie chaya kemo la, ngulieya mo.

³Nie chakesie ki süu ngulieya mo, kekreilamonyü nie nei nie nyü chü di cha zhü kemoko chakezha la nie cha rei ngulieya mo.

⁴Harie, pieümiako! Kijü hau ze khrietho kechüe Ukepenuopfü ngumvü zo ükecü nieko si mo me? Süla kehoupuorei kijü hau ze khrietho chü ro puo Ukepenuopfü ngumvümia zo.

⁵Morei ketholeshü nu, “Ukepenuopfü ruopfü puo khapie u nou shüwaketau la mha mengu kelho baya” idi kepuu kemethuo puo ü leya me?

⁶Derei puo ngukemezhie kha pekrashüya; süla süu dze, “Ukepenuopfü kemiakokezhamia mese chüya, derei ngukemezhie pie kokemoko tsüya” isi.

⁷Süla nie pie Ukepenuopfü tsülie. Terhuokesuou mese chülie, sitse puo ta nie thertatuo.

⁸Nieko Ukepenuopfü penuo volie, sitse puo rei nie penuo vorlietuo. Nie dzie chü kemesalie, nie kephoumako, mu nie nou chü kemesalie, nie nou kenieko.

⁹Nie thekrü chülie, nie nou suolie mu kralie. Nie kenyü chüpie kekra chüwalie mu kenei chüpie thedzü kezei chüwalie!

¹⁰Niepuu mhodzünu nie chü kerünuolie, sitse puo nie chü kerükrieshütuo.

¹¹A üpfüko mu kezeko,[10] nie huoniehuo tha hie. Kehoupuorei puo zemia tha morei puo zeu le pejo ro, thezho-u tha mu thezho-u pejota; no thezho-u pejota ro, no thezho-u chüüzeyakezhamia monyü capimiate.

¹²Thezho khashüyakezhae mia puo rübei zo mu puoe süu kela rei shü morei peka reiwalie vi. No n zanuou le pejoyakezhau n thuo n üse supuo üya mu?

¹³Siro rünyüliecie, nieko we, “Thie morei sodu we rüna puo nu vo di cie puo sünu batuo, sidi thelhi chü di raka pfhülietuo” isiya.

¹⁴Sirei nieko sodu kedipuo vortie shicü si mo. Nie kelhou ha kicüpuo ga? Nieko mha kekhu zopuoki par di ngu mo latayakezha kemhie kro puo zo.

¹⁵Süla nieko, “Niepuu medo ro, we rhei ba di mha hau morei luu chütuo” ikecü pucie.

¹⁶Sümhie nieko tsierei kemelha mu kemiako tuoya; kemiakokecü süko pete kekrü zo.

¹⁷Süla mia puoe chü kezhüu si zorei chü mo ro puo phoumata zo.