Read Angami Naga Jakob 5 Bible Online

Jakob 5 - Angami Naga bible

Jakob 5

¹Harie mhakenyiko, nieko a die rünyüliecie, kemezhiekecü nieko gei phirtuoü keba la nieko kra khouilie.

²Nie kinyiko cieürietazhie mu nie pfhe nie neiko shülhe bu cülietazhie.

³Nie suna mu rakachüko mhouthietazhie mu mhouthie süu nie kejo tha nie kieshütuo, tsiu süu mi mhie nie chü cülietuo. Nie thelatsa la nie kinyiko kenguliete.[11]

⁴Rünyüliecie! Nie mia nie lie nu mhachükeshüko zha chü moketa zha thuo shiekhouizhüte, mu nie lie rekeshüko shiekeshü pfhe si kho krodiko Niepuu tsote.

⁵Nie kijü hau nu lhou ketheguo mu nie nei nie nyüko chüwate; sidi nie nou thuo nie chü peluopie dukhriketuo zhau pfhe bate.

⁶Nieko themia kemiathoko pejo mu dukhriwa, sükoe nie mese chü mo zo.

⁷Süla a khrieko,[12] Niepuu vor kemochie shügeshühie balie. Lieciemia shügeshühiepfü di puo lieyie bu vilieketuo la teirü kerieu mu kenuou pfhe terüpfü baya.

⁸Süla nie rei shügeshühiepfü balie. Nie nou jükrepfü ba zolie, Niepuu kevor tei penuoketa la.

⁹A khrieko, nieko huoniehuo gei panyapara hiecie, sitse nie pejo molietuo. Harie, nie ketsoketuou kikha ki tha zo!

¹⁰A khrieko,[13] Niepuu za se siedze die pu kevorko rei kemezhiekecü nu rei hiepfü thalie üdi thakie puo chükeshü rükrashücie.

¹¹Ketho zo we shügeshühiekeliemia üse thejakepfümia üya. Nie Job shügeshühiekelie dze silie mu nie Niepuu mharhüu kedipuo shicü ngulie, Niepuue mia khrie mu mia ngumezhie phiya.

¹²A khrieko,[14] ba hurei nie tei rei morei kijü rei morei phrakeshü kehoupuorei se rüse hie, derei nie die ro “U” ülie mu moro “Mo” üliecie, nie pejokewa nu leta molieketuo la.

¹³Nie donu miapuonie kemezhie ba me? Sümia bu kechachülie. Miapuonie u nei ba me? U bu ketshe pfhe chü kelilie.

¹⁴Miapuonie mhachü ba me? Puo bu kehou nu phichüko kielie di uko bu puo la chashülie mu Niepuu za nunu tier pie puo kenheshülie.

¹⁵Pele di chakeshü la mhachükezhüu bu la sielietuo, mu Niepuu puo thuo süu bu shürholietuo, tsiu puo phoumawa shierei vashü puo tsütuo.

¹⁶Süla nie shürholieketuo la huoniehuo mhodzünu nie kejokemouko phrawalie mu huoniehuo la chaliecie. Kemiathomia kechae kuo phi mu chükhrielieya.

¹⁷Thiedzü Elija rei u kemhiemia puo zo ru, puo thenou thetho chü di tei bu rü hienu cha ba tse, cie se di puotie teirü bu kijü tsur mota.

¹⁸Süsie puo cha lashü ru tei bu rülie, sidi mha bu kijü nu lhou la parlie zo.

¹⁹A üpfüko mu siezedzürieko,[15] nieko donu huomia ketho-u therhieta di yo tuota, sidi huomia puo nou chü kedi lalie ro,

²⁰sümia bu si touliecie, mha kesuo chüketau nou chü kedipie puo bu puo kejokemou kechü chau therhielieketau, puo kesia nunu kephoumau[16] ruopfü kelalietuo tsiu kejokemou kekra whelietuo.