Read Angami Naga Pitor Kerieu 2 Bible Online

Pitor Kerieu 2 - Angami Naga bible

Pitor Kerieu 2

¹Süla nieko thezho kemo neiü mu kedodakecü neiüko, mhatho nu pecülie kemo, mia ngu u rokecü, mu mia tha mia melekecü pete khawalie.

²Sidi nuoranuomia mhie di ruopfü nudzü kemesau mengu siei zolie, süu geinu memie sie di kelakelie tsolieketuo la,

³nie Niepuu ketseikevi methawate ru.

⁴Nieko mia bu puo thiwa zorei Ukepenuopfü thuo kedakelie puoma kere kerheitsieu ki vorliecie, mu

⁵kerheitsieko kemhie nieko rei zievo kemesa kro puo chü ketoukerepfü sie ruopfü ki puo chüliecie, sidi Jisu Khrista geinu Ukepenuopfü bu lielie kesü ruopfü kelhou ruosuo chülieketuo la.

⁶Süu dze ketholeshü nu thupieketuo: “Harie, a Zion gei ketsie puo khapiezhü, kedakelie mu puoma kere puoke nu tsieu; kehoupuorei puo pelekelieu thenga chütalie lho.”

⁷Nieko puo pelekelie la we, puoe puoma kere tsieu; derei pelekemoko la we, “Ki kechükoe khakewa tsie puoke nu tsieu chüketau,”

⁸mu “Mia perhekeshü tsie tsiu mia bu tetsuketuo tsiekrieu zo.” Ukoe tetsutaya, ukoe dieu ze mvücü la, situo üdi pedzüperie rhüse ketuo tuoi.

⁹Derei nieko zowe kedakelie seyie, kedi zievo, kemesa seyie, Ukepenuopfü vieketa themiata zo, süusü kezei nunu nieko kiepie puo kezie u ngo phi zocüu nu shülieketau mhatho kevi kezhako pupie mia pesilieketuo la zo.

¹⁰Va puo we nieko ü themia ütuo mo, derei tsiewe nie Ukepenuopfü themia chüte; Va puo we nie ngukemezhie ngulie mo, derei tsiewe nie ngukemezhieu nguliete.

¹¹A khrieko, a nie bu rüsomia mu rüvemia kemhie di nie ruopfü perhie tuoyakezha chüüphou menguko nunu nie kethelienu beiya.

¹²Nie Judakemoko donu nie zhorüli vi se di lhoulie, sidi mia nie üse kesuo kechümia üdi nie thaya rei, uko bu nie mhatho kevi ngu di Ukepenuopfü mia nyie pepituoü[6] kevor nhie puo tshelietuo.

¹³Niepuu za nunu themiae rhükelie zhoko[7] kehoupuorei chüliecie, kedi kezhau zho üse kerükrietho chü di,

¹⁴morei ahng zho rei, süko bu siazha pie puotou kemo chüyakezhamia tsü mu mha kevi chüyakezhamia tshenu di ketsekeshümia zo.

¹⁵Ukepenuopfüe nie bu mha kevi chüpie mhasikemomia diethuodieruo kepuko va pejütuoükecü puo medota zocü la.

¹⁶Ukepenuopfü kituomiatacü[8] la, nie kekhakejümia mhie di lhoulie, sirei nie kekha jüketa süu bu mha kesuo kechüu whewa hie.

¹⁷Mia pete rhulie. Kepele kikruu khrielie.[9] Ukepenuopfü preilie, kediu rei rhulie.

¹⁸Miadiemiako, nie niepumiako rhu di dieze chü tseilie, u zho keviko rübei monyü u zho kesuomia die rei zelie.

¹⁹kekreilamonyü miapuonie Ukepenuopfü dze le menuo di, puotoukemo nu puo bu kemezhiekecüko rei hielieya ro puo kevi dze pu zotuo.

²⁰Nieko mha kesuo kechü la, mia nie pechükecü hielie rei süu la therhu kikecü puo ngulie ta? Derei nie puotou-u chü di süu la kemezhielie mu süu hielie ro nie Ukepenuopfü nei chüliete.

²¹Mha hau la nie kielie, kekreilamonyü Khrista rei nieko la kemezhieshü, sidi nie bu puo phisie nu volieketuo la thakie chüpiezhü.

²²“Puo kephouma puo rei chü mo, mu puo tie nunu rei dietho kemo die puorei ngulie mo.”

²³Mia puo zhasekecü kirei, puo mia zhase la mo; puo kemezhiekelie ki, puo mia kechükede la mo; sirei puo thuo puo pie kemezhü tou nu nie nyie pepikezhau pelewata zo.

²⁴Puo thuo krus[10] geinu u kephoumako puo mo geinu toupfüliete, sidi u bu kephouma kitsa u pesiawa mu kemiatho la lhou tuolieketuo la; puo kevüpfüko[11] la nieko chü kemeneliete.

²⁵Kekreilamonyü nieko tekuo tuoi yo tuo ru, tsiewe nie ruopfü kepfheu mu rüguokezhau ki vorliete.