Read Angami Naga Pitor Kerieu 4 Bible Online

Pitor Kerieu 4 - Angami Naga bible

Pitor Kerieu 4

¹Siro Khristae puo chü puo phou kemezhiekecü la nie rei noule sikecü se nie nou shüpfülie. (Themia kehoupuorei puo chü puo phoutsa kemezhielieta ro kephoumau chü sa motaya)

²silie ro nie kijü nu lhou sa phiketuo teiko nu themia menguko se monyü Ukepenuopfü medo-u nu lhoulietuo.

³Nieko voketa teiko nu Judakemomia chüyakezhako chü nie khra mo di rügerüzhü, chüüphou menguko chü, mezemelu, nie nei nie nyü chü, kepekro nyanyüpfü, mu kerütsekecü terhuorhi kerüsuoko chü vor.

⁴Sirei tsiewe nie uko mhatho kerütsekecüko nu uko ze kekrotho moketa ha ngupie uko ngo mu nie tha reiya.

⁵Derei uko khunhie u rüliko hiepie kerheiko mu kesiako ketsotuoü kebau mhodzünu shütuo.

⁶Hau lanu thiedzü dieliekeviu pupie siaketako rei kie, süusü chüümotsa uko pejowata rei ruopfü kitsa Ukepenuopfü mhie di rheilieketuo la.

⁷Mha pete puo thelataketuo penuote; süla nie melou tseiphrei mu nie mhale menuo di cha balie.

⁸Mha pete mho rei nieko huoniehuo khrie bei zolie, kekreilamonyü kekhrie-e kejokemou kekra whewaya ze ru.

⁹Panyapara mo zo di huoniehuo pesoliecie.

¹⁰Kehoupuorei u mhaphruo ngukelieu se di mhaphruo neiüko khashüyakezha Ukepenuopfü kituo kevimia chü di huoniehuo lie chülie.

¹¹Die puyakezhau bu Ukepenuopfü die tou puyakezha nu pulie, mia khruohikezhamia bu rei Ukepenuopfü thuo khashüyakezha kekuou se lietho chülie, sidi mha kehoupuonurei Jisu Khrista lanu Ukepenuopfü ketsheu chüliecie. Zayie mu kedi kechü telhekechachie puo vie zo. Amen.

¹²A khrieko, mi pie thekecü kemhie nie gei phir kebako haü kethekhrükecü puo mhie di nie ngota hie.

¹³Sirei Khrista kemezhiekelieu nu nie ya ngulie ba ükecü le di nie neiliecie, sitse puo zayieu pesipengukeshü nhie nie nei di pheshietuo.

¹⁴Nieko Khrista zau la thetha pfüya liro nie theja kepfümia, zayie kechü[13] mu Ukepenuopfü Ruopfüu nie gei baketa la.[14]

¹⁵Derei nieko miapuorei mia kedukhri, morei kerügu, themia kesuo, dopfidorü chü di kemezhie hiecie.

¹⁶Derei nie Khristamia kechü la kemezhieya ro mengaketa chü hieü theza süu pfülieketa la Ukepenuopfü tsheliecie.

¹⁷Ukepenuopfü kikru-u nu sede di mia nyie kecüketuo teiu tso batacü la; mu süu u kinu sede sie üro Ukepenuopfü dieliekeviu die zekemoko rüli we kimhie ta?

¹⁸Siro, “Kemiathomia zorei kelalieketuo re se liro, pelekemoko mu kephoumako dze we kedipuo mhie ta?”

¹⁹Süla, Ukepenuopfü medo-u ze di kemezhielieyakezhako bu u phou khapie mha pete pelhoukeshü kedietho-u tsü di mhatho kevi chü ba zoliecie.