Read Angami Naga Pitor Kenieu 1 Bible Online

Pitor Kenieu 1 - Angami Naga bible

Pitor Kenieu 1

¹Jisu Khrista kituou[1] mu apostel-u Simon Pitor-e, Thupie Ukepenuopfü mu kelakelieu Jisu Khrista kemiatho nu thalieketa, hie kepele mhiekecü nyiketako kishü ho.

²Ukepenuopfü mu u Niepuu Jisu sikecü nunu ngukemezhie mu noune bu nie gei krakelieu chüliecie.

³Siro puo zayie mu ketseikevi chü zokecü ü u kiekelieu dze sikelie la we puo kekuo kezhau thuo u kelhou mu mesamezhükecü la se morokesuo pete khapie u tsüshüwate.

⁴Sidi puo mha hako geinu mha kezha puoma keretho pupiekezhüko kha u tsüshü; sidi süko geinu nieko bu kijüu nu keba kesuokerhuko nunu talie di kemiatho kelhouzho-u se lhoulieketuo la.

⁵Mu mha hau la nie kitsa nie rhie chü bei di nie zho kevi pie kepele salie, mu mhakesi pie nie zho kevi salie,

⁶mu nie kethekerekecü pie mhasi salie, mu shügeshühiekecü pie kethekerekecü salie, mu mesamezhükecü pie shügeshühiekecü salie,

⁷mu siezedzürie huoniehuo ngumezhiekecü pie mesamezhükecü salie mu kekhrie üse siezedzürie huoniehuo ngumezhiekecü saliecie.

⁸Nieko mha hako se nie vie chü mu kra miemiezhülie ro, süko la u Niepu Jisu Khrista dze kesi mhasitsa nie shüshü morei nie si vülie kelho chütalie lho.

⁹Derei mha hako kejümia puo la we puo khieki kebako rübei ngu di puo mhicie bate, tsiu puo kephouma chükewako nunu puo chü kemesawaketa rükra mote.

¹⁰Süla a kezeko, nie kiekelie mu kedakelie si kemecie toulieketuo la hadzü kirei nie rhiechükuolie, mha hau chülie liro, nie mhakipuorei tetsutalie lho.

¹¹Silie liro u Niepuu mu kelakelieu Jisu Khrista kechachie kedi nu nie bu lelieketuo cha khrü kemeya phishütuo.

¹²Siro nie mha hako si mu nie gei baketa ketho-u gei metei bata zo ürei, a hako pie nie tarho lalashüketuo le tuo zo.

¹³Themo pfheki hau nu keba ki nie nou chü perhei lakeshü puotou zoücü a le,

¹⁴u Niepuu Jisu Khrista thuo thapie a kieshücü pecha mo di a se teiu vortuoü batacü la.

¹⁵mu a tuoketa sie nie bu kehoukipuorei die hako rükralieketuo la a hie chütuo zo.

¹⁶Hie u Niepu Jisu Khrista kekuo mu puo vorketuo dze pupie nie kiekeshü ki themia do se rhükelie kemeda dze pu mo, derei hie hie mhi pie puo kekuo kezha nguwate.

¹⁷Zapuzayie Kerükrietho geinu mha pfhe puo: “Hau a Nuo a khrieu; a puo ngu a neithor zo” isikecü kevor ki puo Ukepenuopfü u Puou ki nu therhu mu zayie ngulie.

¹⁸Hie puo ze kijüthou kemesau gei ketha ki hie thuo zorei mha pfhe süu teigei nu kerkecü si.

¹⁹Sidi ketho dieu chü kemetei sapie hie tsüshü. Nie melou nu teiso pi par mu teiziepfü zie kepar mhielie kemochie mitue kezie nu va pezieshüyakezha tuoi nie die süu le ter balie ro vituo.

²⁰Kerietho-u nieko hau silie; süusü ketholeshü nu siedzedie puorei themia medo nunu pu par mo;

²¹Kekreilamonyü siedzekesidie puorei themia medo nunu sede mo, derei Kemesa Ruopfü thuo hükeshü geinu themia bu Ukepenuopfü ki nu se pu kepar zo.[2]