Read Angami Naga Pitor Kenieu 2 Bible Online

Pitor Kenieu 2 - Angami Naga bible

Pitor Kenieu 2

¹Siro themia donu siedzekesi ketijü sieryakezha tuoi nieko donu rei kepetha ketijüko sier zotuo, süko pekhre di mia pekaketuo dieko se vor. Siro ukoe uko khrükelie Niepuu rei melietatuo, sidi kepeka meshüpie uko thuo uko gei shü mhalietuo.

²Siro themia kekra uko rüyokecüko siedzi chütuo, siketa la mia bu ketho chau thatatuo.

³Tsiu uko kemehou la mhakese dieko se di nieko pie thelhi chütuo. Uko pejokecüe tsierei hadzü mhie rülei mozhü zo, mu uko kepeka rei rükreta mo zo.

⁴Kekreilamonyü thiedzü teigeidieliemia kro puo phoumaketa ki Ukepenuopfü süko rei lhieshü mo zo, di süko tepie mizie[3] nu shüwa, mu ketsokecü teiu ketso la uko khapie kezei kesoutho nu phapie[4] bawate.

⁵mu thiedzü dzüdi puo chüpie miathokemoko kijü nu keshü ki, kemiatho dze kepethau Noah mu kekreimia thenie kelalie, derei kijüu kelashü mota zo üro;

⁶mu puoe Sodom mu Gomora nadinie pejowa di pekapie mige chüwa, sidi miathokemoko ki thakie puo chüshü üro,

⁷siro kerüyoko la puo nou kemezhie sekelie Lot kemiatho-u kelashü üro,

⁸(Kemiatho-u teisonhie uko donu lhou di thezho kejü mhatho kerhuko si mu ngu di puo nou pechüpenyü zo di kemezhie sewa),

⁹siüro Niepuu dophi nunu kemiathomia kelalieketuo mu siazha pie miathokemoko tsü di uko bu mia nyie pepiketuo teisozhau tsoketuo do rei si,

¹⁰süusü u chü u phou mengu se u perhuwayakezhako mu kekuo kesemia thayakezhako la pekuo. Süko kerüzha mu thepfu se di zayie chü kebako[5] rei tha michieya mo,

¹¹sirei teigeidielieko uko ki zhakuo mu kuokuocüko thuo rei Niepuu mhodzünu süko tha melekecü, kengakecü chüya chie mo.

¹²Themia hako we u pfhe u va sikemo khunuo, lhou sier mia bu u telie di dukhriwayakezha mhie; uko mhadze sikemoko rei tha tuoya, khunuo süko pekacü ki uko sa pekawatuo,[6]

¹³sidi mhatho kesuoko la kesuo zhakhra ngutuo. Uko khinhie gei meze rüyoketuo üse u kenei puo chüya. Uko mesakemo kerhu kro puo zo, tsiu nie ze thehethehie kechü ki zorei thenga mu mha vapesuokecüko chü u neiya.

¹⁴Uko mhi-e pierüü thuo tshu, süla kephouma chü rüleiya mo. Uko themia u nou jüyakemoko selietaya. Uko nou mha kemehou zhathor. Rüsekepfü nuonuo kro puo zo.

¹⁵Uko cha kemezhüu khawa di yotuote, sidi mha kesuo zhakhra puo neiyakezha Bosor[7] nuo Balaam chau ze tuote,

¹⁶derei puo kejo la puo kerhie, sidi die pulieya kemo gadau thuo themia pfhe chü di siedzekesiu kenya thukhawa.

¹⁷Sükoe dzü kejü dzüluoki tsiu mhoutsa teikhrie bu heseketa kemhie, uko la kesuo zeibouikecü kesepie bate.

¹⁸Siro ukoe kemelhakecü diethuodieruo pu khuboupfü u chü u phou rüyako se di kekreimia lhou kekrüketuo therhietatuoü prakezhüko meshü mu se tuoya.

¹⁹Uko mia bu u kekhakejümia chütuoü phrashüya, derei uko zorei mha kesuo kechü diemia zo; mha puo bu u penyüwa ro süu die chüta zo.

²⁰Siro u Niepuu mu u kelakelieu Jisu Khrista sikelie geinu kijü gei mha u chü pesuoyakezhako therhie pralieketamia, süko nu la le di u penyülieta ro sümia rüli thelatsa therietsa ki suokuotaya.

²¹Kekreilamonyü kethochau silie di diekhakeshü kemesako nunu rüreiketau la we kenei si moto zokecüu vikuotuo.

²²Süko dze mia, “Tefü merüshü di puo thuo puo merü nu la phiya,” mu, “Thevo puo khrü kemesashü rei la le nyoba buoya” üdi mhasidie ketho-u nu kepu mhie tou zo.