Read Angami Naga Pitor Kenieu 3 Bible Online

Pitor Kenieu 3 - Angami Naga bible

Pitor Kenieu 3

¹A khrieko, hau a thupie nieko ketsü leshü kenieute; mu kenienie nu nie bu noule puotouu se nie siele lalienu hüshü ho,

²süusü nie bu thiedzü kemesa siedzekesiko pupiekezhü dieko, siro Niepuu mu kelakelieu die nie apostelko geinu khakeshüko rükralienukecüu zo.

³Nieko si morokesuo kerietho-u sü thelatsa mha krenyü zokecü kro puo, mia krenyü vortuo, siro uko rüyo uneiunyü chü,

⁴di sie, “Puo vortuo ükecü kirapuo pupiezhü ga? kekreilamonyü u puonuoko siaketa[8] yawinu vor thie ketso sietsenu mha chükeshüko mhie vorzhü ze!” isituo.

⁵Ukoe thiedzü Ukepenuopfü dieü teiko chü se parkelie, tsiu dzü nunu mu dzü üse kijüu chü parkelie le mvüte,

⁶süu la dzüdi sier süteiki kijüu rei pekawa.

⁷Derei die süu thuo tsie keba teiko mu kijüu rei pie mi pfhe keba zo, sidi pie mia nyie pepiketuo mu miathokemoko la pekawaketuo teisozhau pfhe ba.

⁸Derei a khrieko, mha hau rükra mota hie, süusü Niepuu la we khunhie teiso rei teicie nyie puo mhie mu teicie nyie puo rei khunhie zha mhie zo.

⁹Huomia noule ki we rüli ükecü mhie, derei Niepuu zowe vortuo üdi phrapiekezhü dieu tseiütsoshü menuotalie lho, sirei puo mia puo bu rei kata mo di peteko bu thenou kedi phrelie kenyü la puo nie gei puo nou cha phi keba zo.

¹⁰Derei Niepuu zhau we kerügumia mhiei vortuo, süki teiko puo pfhe kemerie chü di jütatuo, siro mhapie süko kechüko rei lethorkecü la the pezhawatuo, tsiu kijüu mu sügei mhathoko pete rei the pejüwatuo.[9]

¹¹Mha peteko sükemhie di jütaketuo la, nieko kedipuo kemhie kelhou lhou di mesa mu miatho di,

¹²Ukepenuopfü teisozhau pfhekebau bu vor pezilietuo[10] shi? Sünhie teiko the pezewatuo mu lethorkecü la mhapie süko kechüko rei zhatatuo.

¹³Derei we ro, puo die phrapiekezhü tuoi süsü tei kesa mu kijü kesa kemiathomia thuo lhouyakezha kiu pfhe bate.

¹⁴Süla a khrieko, nieko mha süko pfhe ketuo ki, nieko rhu mo mu jo mo di kezevi ba di puo bu nie ngulieketuo la nie teitso chü ba zolie;

¹⁵mu u Niepuu puo nou cha kebae kelakelie zoücü leliecie. Siro u kezeu Paul rei mhasi khapie puo ketsü mhie thupie nie tsü,

¹⁶puo leshü pete nu thuyakezha mhiei hau dze pu. Süko nu die silie kere huo ba zo, mu mhasikemo mu u nou jüliekemo themia doupuo u thuo rei chükezha tuoi süko kewhipie u thuo u pekakelie chüya.

¹⁷Süla a zenuoko, nieko mha hako si batakecü la thezho kejü kerüzhümia die kekrükecüko bu nieko khrukhre baketa thau nunu nie teshü seta molieketuo la pecü balie.

¹⁸Derei u Niepuu mu kelakelieu Jisu Khrista mhasi mu ngukemezhie nu memie sielie. Puo bu tsierei mu kechachie zapuzayie chücie. Amen.