Read Angami Naga Johan Kerieu 2 Bible Online

Johan Kerieu 2 - Angami Naga bible

Johan Kerieu 2

¹A nuonuoko, nie bu phouma molieketuo la a hako thupie nieko ki shüya. Derei huomia phoumata üro, u la Puou ki zhapu chü kethamia puo ba, süusü kemiatho-u Jisu Khrista zo;

²mu puoe u kephoumako la u ruo chükewau zo, tsiu u kephoumako la rübei monyü kijü pete kephouma la rei zo.

³We puo silietakecü sikelie-e, we puo diekhakeshüko zeyakezha la zo;

⁴Miapuonie, “A puo si,” idi pu, derei puo diekhakeshüko chüya mo liro, süu ketijümia zo, mu sikecümia ketho-u puo nou ba mo;

⁵derei kehoupuorei puo die zeyakezhau Kepenuopfü kekhrieu puo geinu chü tseishüya. Hau geinu we puo nou ba ücü si toulieya:

⁶Kehoupuorei, “A puo gei ba” idi puya ro, puo mhie di tuolie zhü.

⁷A khrieko, a die kesa puo thupie nieko ki shütuoüzhü mo, derei die keweu, nie sietsenu ngulieketau zo; diekhakeshü keweu sü nieko rünyülieketa dieu zo.

⁸Sirei a diekhakeshü kesa puo thupie nie kishüzhie, süu puo gei mu nie gei rei ketho ücü si, kekreilamonyü kezeiu jütazhie mu kezie ketho-u zie par bate.

⁹Kehoupuorei sie, “A kezie nu tuoya” idi pu, sirei puo siezedzürie ngumecüya ro, tsierei kezei nu ba zo.

¹⁰Kehoupuorei puo siezedzürie khrieyakezhamia kezie nu lhou baya, mu themia sikecümia gei thephi kemesü tuo mo.

¹¹Derei kehoupuorei kepelemia kekrei puo ngumecüya ro kezei nu tuo zo, mu kezeiu nu ketuo la kirapuo vozhü shi siya mo, kezeiu bu puo mhi chü peciewaketa la.

¹²A nuonuoko, puo za nunu nie kephouma vawaketa la, a thupie nieko kishüya,

¹³Mia puonuoko, nieko sietsenu ketuou sikecü la, a thupie nieko kishüya. Khriesako, nie kesuou penyülieketa la, a thupie nieko kishüya.

¹⁴Nhicuko, nieko Puou sicü la, a thupie nieko kishüya. Mia puonuoko, nieko sietsenu ketuou sikecü la, a thupie nieko kishüya. Khriesako, nieko kuo, mu Ukepenuopfü dieu nieko gei baketa la, a thupie nieko kishüya, mu nieko mha kesuou mho kuoliete.

¹⁵Kijüu morei kijü nu vieko khrie hiecie, kijüu khrieyakezhamia gei u Puou kekhrieu tuo mo;

¹⁶kekreilamonyü kijüu nu ketuo pete, chüüphou menguko, u mhi menguko, kinyi se kemholiekecü pete, u Puou ki nunu monyü kijüu nunu zocü la.

¹⁷kijüu mu süu menguko jütazhie, derei Ukepenuopfü medo chüyakezhamia kechachie lhou tuotatuo.

¹⁸A nuonuoko, thela teiu penuo bate! Siro Khrista ngumvü kekra vortazhükecü nie siketa tuoi tsierei Khrista ngumvü kekra sier bate. Sügei nu thela teiu sü vor bataükecü we silieya.

¹⁹Süko u donu nu tuo prate, derei süko u kromia mo zo; kekreilamonyü süko u kromia üro, uko u ze ba zotieciü. Derei uko u khawa di tuoketa geinu u kromia mo ücü si kemecie touta zo.

²⁰Derei Kemesau bu nie kenheliete, süla nieko pete ketho-u silie[2] vite.

²¹Nie ketho-u si mo üdi a thupie nieko kishü mo; derei nieko süu siyakezha la mu ketijü puorei ketho-u nunu parya mo ücü sicü la.

²²Ketijüu sü supuo ga? Süu Jisu üse Khrista mo üdi puyakezhau zo. Sikecümia sü Khrista ngumvüu zo, sümia Puou mu Nuou rei melieya.

²³Kehoupuorei Nuou melieyakezhau Puou rei sa melieya; mu kehoupuorei Nuou phrakezhau Puou rei phraya.

²⁴Sietsenu silieketau pie nie nou baliecie. Nie sietsenu silieketau pie nie nou balieta ro, nie Puou mu Nuou nu rei balietuo.

²⁵Mu kechachie kerhei hauha, puo thuo u[3] ki phrapiekezhüu zo.

²⁶A nieko ki nie sewaketuomia dze thushüya.

²⁷Derei nieko la we, puo ki nu nie kenhekelieu nie gei baya, süla mia bu nie petha morei vi; derei puo nieko kenhelieketau thuo mha peteko dze pupie nie kieya, mu süu ketho zo, mu ketijü ba mo süu thapie nieko kiekeshü kemhie puo gei baliecie.

²⁸Mu tsie a nuonuoko, puo gei ba zolie, silie ro puo mia mhingu chü kevor nhie we kethepfu nyilietuo mu puo kevor nhie puo mhodzü mengatalie lho.

²⁹We puo miatho zo ücü si ba ro, nie kehoupuorei miathoyakezhamia puo nunu penuolie zoücü si tou batuo.