Read Angami Naga Johan Kerieu 5 Bible Online

Johan Kerieu 5 - Angami Naga bible

Johan Kerieu 5

¹Kehoupuorei Jisue Khrista ükecü peleyakezhau Ukepenuopfü nunu penuolieta zo mu kehoupuorei puo krü khrieyakezhau puo nuo rei khrieya.

²We Ukepenuopfü khrie mu puo diekhakeshüko zekelie haha geinu, we Ukepenuopfü nuonuoko khrieyakecü silieya.

³Siro Ukepenuopfü khriekecü sü puo diekhakeshüko chüü zekecüu zo. Mu puo diekhakeshüko re mo zo.

⁴Kehoupuorei Ukepenuopfü geinu penuo parketau kijüu ki kuolieya. Mu kijü ki kuokelie süusüe u kepeleu zo.

⁵Siro Jisue Ukepenuopfü Nuou zoükecü peleyakezhau sie kijüu ki kuolieyakezhamia suomia ga?

⁶Dzü mu thezie nunu kevor-u sü Jisu Khrista zo, dzü rübei nunu mo derei dzü mu thezie ze vor. Mu Ruopfüue zhapu chükeshüu, kekreilamonyü Ruopfüue ketho zo.

⁷Siro zhapu chükeshü mha se ba:[7]

⁸Ruopfüu, dzüu mu thezieu, mu se hako keze puo zo.

⁹We themia zhapu rei lieya ro, Ukepenuopfü zhapuu we süki zhakuo; kekreilamonyü Ukepenuopfü puo Nuou dze zhapu kechü süusü puo zhapuu zocü la.

¹⁰Kehoupuorei Ukepenuopfü Nuou pelekezhamia zhapu süu puo nu bata zo. Kehoupuorei Ukepenuopfü peleyakemomia Ukepenuopfü üse ketijüu chüwate; themia süu Ukepenuopfü puo Nuou dze zhapu chükeshüu pele motacü la.

¹¹Mu hauha zhapuu zo: Ukepenuopfü kechachie kerhei khashü u tsü, mu kerhei hau puo Nuou nu tuo.

¹²Kehoupuorei puo Nuou ngulieketamia kerhei nyite; kehoupuorei Ukepenuopfü Nuou nguliekemomia kerhei hau nyi mo.

¹³A hako thukeshü nie Ukepenuopfü Nuou pelelieketa khe bu kechachie kerhei nie vieta ücü silieketuo la zo.

¹⁴Siro puo mhodzünu u kethepfu batakecüu sü we puo medo nunu mha kehoupuorei cha ro, puo u pfhe rünyüyacüu zo.

¹⁵Mu we puo ki chakeshü ki puo u pfhe rünyüyacü silieta ro, we puo ki chakeshüu ngulieta ücü siliete.

¹⁶Miapuonie puo siezedzüriemia siata kesü kephouma zokemo puo chükewa ngu ro, puo bu chacie, siliro puo rheilietuo, siliro Ukepenuopfü siata kesü kephouma zokemo chükewako la kerheiro khapie puo tsütuo. Siata kesü kephouma rei nyi zo; a nie bu chanukecü we süu mo.

¹⁷Mha puotou kemo kechü pete kephouma zo, derei siata kesü zokemo kephouma rei nyi.

¹⁸Ukepenuopfü nunu penuolieketako we kephouma chü zo bataya mo; derei Ukepenuopfü nunu penuolieketako rüguose bataya, sidi kesuou bu uko biewaya mo.

¹⁹We Ukepenuopfü nuonuo ücü si bate, kijüu thuo kerüzhüu kekuo khrükhro ba zoürei.

²⁰Ukepenuopfü Nuou vor di kesikele pie u tsü di u bu puoe ketho-u ücü silie; mu we Nuou Jisu Khrista ketho zocüu nu bate. Puoe ketho zokecü Ukepenuopfü mu kechachie kerheiu zo.

²¹A nuonuoko, terhuorhiko therhie zoliecie.[8]