Read Angami Naga Capiko 1 Bible Online

Capiko 1 - Angami Naga bible

Capiko 1

¹Joshua siaketa sie, Israelkoe Jihova ketso di, “Hieko la supuonie rie kho di Kananko ze kegeituo ga?” si.

²Sitse Jihovae, “Juda themiako bu khotuo. Ae kijüu khapie uko dzienu shüwate,” si.

³Sitse Juda puo siezeu Simeon ki, “A ya chükeshü kijü nu khor di a ze Kananko ze kegeicie, siliero hie rei sütuoi nie tsükeshü rüvietsa khorshütuo;” sishü. Süla Simeon puo ze kho.

⁴Siro Juda-e kho ru, Jihovae Kananko mu Perizko khapie uko dzienu shü; mu ukoe Bezek nunu mia nyie ker geiwa.

⁵Siro ukoe Bezek nu Adoni-bezek ngulie di puo ze kegei, mu ukoe Kananko mu Perizko bie tseiwa.

⁶Adoni-bezek-e tata; derei ukoe puo whuo vo di puo telie, di puo dziekrünie mu puo phikrünie dawa.

⁷Siro Adoni-bezek-e sie, “U dziekrü mu u phikrü dakewa kedi hiethenie a mizhü khronu khutie pacü vor; tsiewe ae chükeshü tuoi Ukepenuopfüe a gei chü lashüte,” isi. Ukoe puo ze Jerusalem nu vor, mu puoe sünu nu siata.

⁸Siro Juda themiakoe Jerusalem whuo di süu lielie. Ukoe zhiecha pie themiako pete geiwa mu mi pie nadiu thewa.

⁹Süsie, Juda themiakoe kijüthou rüna nu lhoukeba Kananko, Negebko mu niakratsa kijüthou phinu kebako ze kegeituoü tsu.

¹⁰Ukoe Hebron nu keba Kananmiako ze kegei perie (thiedzü Hebron za Kiriat-arba); sidi ukoe Sheshai, Ahiman mu Talmai penyü phrewa.

¹¹Sünunu Juda themiako vo Debir nadiu whuo, (Debir za Kiraiat-sefer isiya).

¹²Mu Kaleb-e sie, “Kehoupuorei Kiriat-sefer whuo di liekelieu a nuopfü Aksa pie puo ki penyishütuo,” sishü.

¹³Sitse Kaleb siezeu Kenaz nuou Othniel-e süu chülie; süla Kaleb-e puo nuopfü Aksa khapie puo ki penyishü.

¹⁴Sitse puoe khunhie Othniel ki vor di puo puou ki lie puo chalienu di pu beilie; ru puoe puo Gada geinu kerlie tse, Kaleb-e puo ketso di, “A bu n la kedipuo chütieya ga?” isi.

¹⁵Sitse puo sie, “Mha a nei puo chü a tsücie, no Negeb nu kijü keso huo kha a tsüshüte, derei Guloth-mayim[1] sa pie a tsücie,” isi. Sitse Kaleb-e Guloth Peso-u mu pekhro-u pie puo tsüshü.

¹⁶Siro Mosa meiu Ken nuosenuoyieko, Juda themiako ze di kukuobo kelhou nadiu nunu Negeb nu keba Arad khieki Juda rayha nu kholie. Süsie uko vo Amaleko ze balie.

¹⁷Mu Judamiako uko siezeu Simeon themiako ze vo Zefat nu keba Kananmiako dukhriwa mu rünau peka lotsowa. Süla nadi süu üse Horma idi kieta.

¹⁸Siro Juda themiakoe Gaza, Askelon, Ekron mu uko rüvieko sa lielie.

¹⁹Siro Jihovae Juda themiako zetuo zo; mu ukoe kijüthou rünako lie phrelie, derei uko thezha nu keba themiako whuolie kenjüta, kekreilamonyü ukoe thegi gari nyikecü la.

²⁰Mosae pukeshü tuoi, Hebron pie Kaleb tsüwa, mu puoe sünunu Anak nuo thepfu seko whuowa.

²¹Derei Benjamin themiako we Jerusalem nu keba Jebusko petalie mota, süla thie ketso rei Jerusalem nu Benjaminko ze lhou tuota.

²²Josef kinuko rei kho Bethel whuo; mu Jihovae uko zetuolie.

²³Josef kinukoe mia huo ketseshü di Bethel rie (thiedzü we nadiu za Luz iya.)

²⁴Sitse mha riekevokoe mia puo nadiu nunu parkezhü ngulie, ru ukoe puo ki, “N pezie rei nadiu nu lelieketuo chau thashü hieko kiecie, siro hieko n ngumezhieshütuo” sishü.

²⁵Süla puoe chau thapie uko kieshü; sitse le di nadiu nu themiako pete biewa; sirei themiau mu puo kinuko pete we kelashü di uko bu tuota.

²⁶Sitse themiau Hitko kijü nu vo di rüna nadi puo chülie; sidi süu za pie Luz idi kielie, thie ketso rei theza süu kieya.

²⁷Siro Manasseh yieko Bet-shian, Tanak, Dor, Ibliam, Megido nadi hako mu uko natseko nu lhoukeba themiako whuowa mo sidi Kanankoe nadi hako nu lhou bata.

²⁸Mu Israelkoe kuo sierlie tse, uko Kananko kemvü chü di uko bu mhachü, derei uko whuowa mo.

²⁹Efraim yieko rei Gezer nu keba Kananko whuowa mo; sidi Kananmia Gezer nu uko donu lhou tuota.

³⁰Zebulun yieko rei Kitron nu kelhouko morei Nahalol nu kelhou Kananko whuowa mo; derei uko kemvü chü uko bu mhachü di lhou.

³¹Asher yiemiako rei Ako, morei Sidon, morei Ahlab, morei Akzib, morei Helba, morei Afik mu Rehob nu kelhou Kananko whuowa mo;

³²derei Asher themiako Kananmia khenu kelhouko donu balie, ukoe uko whuowakemo la.

³³Naftali themiako rei Beth-shemesh mu Beth-Anat nu kelhou Kananko whuo zowa mo, derei Kananmia khenuko donu balie, di uko kemvü chü uko bu mhachü.

³⁴Siro Amorkoe Danko whuo la pie kijüthou rüna nu shüwa, di ukoe uko bu razha nu tsur mvüta.

³⁵Amorkoe Har-heres nu, siro Aijalon nu mu Shalbim nu rüdi mo balie, derei Josef kinuko kuo sierlie tse, uko kemvü chüpie uko bu mhachü.

³⁶Amorko rieu ro Akrabim nu kekho chau nunu Sela tso di süu keyie zo kho.