Read Angami Naga Capiko 10 Bible Online

Capiko 10 - Angami Naga bible

Capiko 10

¹Abimelek siaketa sie, Isakar mia puo, Pua nuou, Dodo tsuu Tola sier di Israel shüphrashüketuo la sier capi chü, mu puo Efraim kijüthou rüna Shamir nu lhou.

²Sidi cie mepfüese Israel capi chü di siata, mu Shamir nu khruwa.

³Puo sie Gilidmia Jair sier, di cie mepfüekenie Israel capi chü.

⁴Mu puoe puo nuo thepfu ser nyi, sükoe gada ser seya. Ukoe Gilid kijü nu nadi ser kekhaya, süko thie ketso rei Havot-Jair üya.

⁵Siro Jair siata tse, puo pie Kamon nu khruwa.

⁶Tsiu Israelkoe Jihova mhinguki kerüzhü chü lata. Ukoe Baalko mu Ashtarot, siro Siriamia, Sidonmia, Moabmia, Ammonmia mu Filistinmia rhuoko lie chütuota. Hamhie di ukoe Jihova khawa di puo lie chü moketa la.

⁷Süla Jihovae uko gei puo noumeyie sieta, sidi puoe uko ze pie Filistinmia mu Ammonko dzienu shüwa,

⁸mu sücie uko Israel nuonuoko pesüpemvü mu pese phi. Ukoe cie kerethetha Gilid nu Jordan niathutsa Amorko kijü nu ketuo Israelko pese seta.

⁹Sizomonyü Ammonkoe Juda, Benjamin mu Efraim yiemiako perhietuoü di Jordan cieparta; sidi Israel bu theziekejü chüta.

¹⁰Sitse Israelmiakoe Jihova ki melo di sie, “He-i hie Jihova khawa di Baal lie chütuote, mu n mhodzü phoumawate,” sishü.

¹¹Sitse Jihovae uko die kela di sie, “Ae Ijiptmiako, Amormiako, Ammonmiako, Filistinmiako,

¹²Sidonmiako, Amalekmiako mu Maonmiako nieko peseketa ki, nieko a ki meloshü ru, ae uko dzie nunu nieko shüphralie mo me?

¹³Sizoürei nieko a khawa di terhuo kekrei lie chütuote, süla ae nieko shüphra la sa lhote.

¹⁴Nie thuo kedakelie rhuoko ki vo di melolie, sidi nie kemezhiekelie ki uko bu nie shüphralie” sishü.

¹⁵Derei Israelko sie Jihova ki, “Hieko phoumawate, hieko pie n mhodzüki viücüu chüwalie; derei thie we hieko shüphrashü zocie” sishü.

¹⁶Sidi ukoe uko donu solhi rhuoko khawa di Jihova lie chüta; mu puoe Israelko kemezhiekecüko ngu puo kerata.

¹⁷Siro Amorko u rünyie keselie di Gilid nu razhüchü dojülie tse; Israelko rei vo kengulie di Mizpa nu razhüchü balie.

¹⁸Sitse Gilidmia krütakoe huoniehuo ki, “Supuonie sie Ammonmiako perhie kerie chüshütie shiü, puo bu Gilid nu themia peteko mhokezha chütatuo” silie.