Read Angami Naga Capiko 11 Bible Online

Capiko 11 - Angami Naga bible

Capiko 11

¹Tsiu Gilidmia Jeftha sü terhümiavi kezha puo, puoe Gilid nuo mu puo zuoe thethenupfü puo.

²Siro Gilid kimiako rei thepfumia huo penuoshü mu süko zha sierlie tse ukoe Jeftha whuowa, di uko puo ki, “N bu hieko puo kinu kayie puoreiwelie lho; no sü thenu kekrei nuo zocü la” sita.

³Süla Jeftha-e puo siezedzürieko kinu tata, sidi vo Tob kijü nu lhou tuota. Siro miahoumiaruo doupuo vor puo ze mia peprietuota.

⁴Puotei huo sie, Ammonkoe Israel ze terhü chüta.

⁵Sitse Gilid nu phichükoe Tob kijünu Jeftha ze vortuoü di vota.

⁶Ukoe Jeftha ki, “Vor di hie krüta chücie, silie liro hieko Ammonko ze kegei lietuo” isi.

⁷Derei Jeftha-e Gilid nu phichüko ki, “Nieko a ngumecü di a puo kinunu a whuowa mo me? Kiüdi tsie nu nieko kemezhielie tse a ki vorya ga?” sita.

⁸Sitse Gilid nu phichükoe Jeftha ki, “Morosuo beicü la hieko n kitsa rürei vorzhie mu, n bu hieko krüta chü di Ammonko ze kegei mu Gilid nu kelhou pete mhokezha chülieketuo la” isi.

⁹Jeftha-e sie phichüko ki pu la di, “Nieko a ze la ura vo di a bu Ammonko perhieketuo nu mhanuü Jihovae uko khapie a dzie nu shüwa ro, a bu nieko mhokezha chü kethotuonyü” ishü.

¹⁰Sitse Gilid phichükoe sie, “U zo, n kepu tuoi chü zotuo; mu Jihova thuo u donu zhapuu chütuo” si.

¹¹Süla Jeftha-e Gilid phichüko ze vo, mu themiakoe puo pie uko mhokezhau mu krütau chü; mu Jeftha Mizpa nu Jihova mhodzünu puo dieko pete pu lashü.

¹²Sitse Jefthae dieliemia ketsepie Ammonko kediu ki shü, di sie, “Kedipuo avu donu ba di hie ngumvü di vor hie kijü penyülieta ga?” si.

¹³Ru Ammonko kediue Jeftha dielieko die kela di, “Israel-e Ijipt nunu kepar ki, a kijü Arnon nunu Jabok ketso, mu Jordan tsatie pete lieliete; süla kezekevi nu kha lashüwaliecie” sita.

¹⁴Sitse Jefthae Ammonko kediu ki dieliemia ketse lashü di,

¹⁵puo ki, Jeftha-e hakemhie puya: “Israel-e Moabmiako kijü morei Ammonko kijü puorei lielie mo,

¹⁶derei ukoe Ijipt nunu parcü ki, Israel-e nhatsa pfüthe se Kemerie Dzükezha[11] nu vor, di vo Kadesh nu balie.

¹⁷Sitse Israel-e dielie ketsepie Edom kediu ki shü di puo ki, ‘Hieko bu n kijü pfüthe vocie’ isi, derei Edom kediue rünyü mvüte. Mu ukoe Moab kediu ki rei dieliemia ketseshü derei puoe mvüte. Süla Israel-e Kadesh nu bata.

¹⁸Sidi ukoe rayha nu rühou se Edom kijü mu Moab kijü whi vo süu niathutsa tsolie, di Arnon khie kekreitsanu razhüchü chülie. Derei uko Moab rüvie nu le mo, Arnon pie Moab rie chücü la.

¹⁹Siro Israel-e dieliemia ketsepie Heshbon nu Ammonko kediu Sihon ki shü di puo ki, ‘Hieko bu n kijü pfüthe se hieko ra vocie’ ishü.

²⁰Sirei Sihon-e Israel bu puo kijü pfüthe voketuo puo le pevi mota; sidi puoe puo themiako kie kengulie di Jahaz nunu razhüchü chülie di Israel ze kegeita.

²¹Sitse Jihova, Israel Kepenuopfüe Sihon mu puo themiako pete khapie Israel dzienu shüshü di ukoe puo penyüwa; sidi Israel-e Amorko lhoukeba kijü pete liepie puo vie chülie.

²²Mu ukoe Amorko rüvie pete, Arnon nunu Jabok ketso rayhau nunu Jordan ketso lielieta.

²³Mu Jihova Israel Kepenuopfüe puo themiako mhodzünu nu Amorko whuowa di uko vie lielieta üliro, no süko lie lakecü mese me?

²⁴N Kepenuopfü Kemosh pie n ketsüu pie n vie chülie lho me? Sükemhie Jihova hie Kepenuopfüe kha hie tsükeshüko hie-e süko pevie motuo me?

²⁵Tsiu no Zipor nuo-u Balak, Moab kediu ki kuoüte me? Puo Israel ze keperhie morei terhüchü me?

²⁶Israel-e cie krie se mese Heshbon, Aroer mu puo natseko, siro Arnon khieümhou nadiko pete peba se vorte, hateikiko kiüdi no süko lie lalie mo ga?

²⁷A n gei kejo puorei chü moho mu no a ze terhü chükecü a gei puotou mothorte. Jihova bu thie Israelko mu Ammonmiako donu capiu chütuowe” sishü.

²⁸Derei Ammonko kediue Jeftha puo ki kepu dieu rünyü mota.

²⁹Siro Jihova ruopfüue Jeftha ki vorlie, sidi puoe Gilid mu Manasseh pfüthe vo, di Gilid kijü Mizpa nu vorlie, sünunu Amorko perhieketuo dojülie.

³⁰Siro Jeftha-e Jihova ki rüse di pukecü, “Noe Amorko kha a dzie nu shüshü ro, sidi a bu Amorko penyülie ro, a kuolie di a kinu la vorkecü ki,

³¹kehoupuorei kikha nu a ze kesetuoü tuokepar-u pie Jihova vie chütuo, mu a süu khapie kethe ruosuo chüshütuo” sishü.

³²Sidi Jeftha-e Ammonko ze kegeituoü di tuoshü, mu Jihovae uko khapie puo dzienu shüshü.

³³Puoe Aroer nunu Minith kepenuo ketso nadi mepfü pekawa. Siro Abel-Keramim ketso uko dukhri phiwa. Sidi Israelko Ammonko penyüwa.

³⁴Siro Jefthae Mizpa nu puo kinu la vor tse, puo nuopfü übou pfheü ze nashü di puo setuoü par. Puo nuoe süpfü rübei, mu süpfü sie puo nuo thepfu rei thenu rei kekrei jü.

³⁵Mu puoe süpfü ngushü tse, puo pfhenei cierhata, sidi sie puo ki, “Hou, a nuopfü! No a nouchü pie meyhumezhie shütie, ae Jihova ki rüseshüwate mu a süu varhuolie kenjüe” sita.

³⁶Sitse puoe puo puo ki, “A puo, noe Jihova ki phrashüwate, süla n die phrashükewa kemhiei a gei chüwaliecie, tsiewe Jihovae n ngumvümia Ammonko gei n khepuwate eru” si.

³⁷Sidi puo sie puo puo ki, “A la mha hau chüshücie: Thekhrü kenie kha a tsü, di a bu vo a kro a zuomia ze kijüthouko gei rühou di a rüü phouse krükracie” sishü.

³⁸Sitse puo puo sie, “Volie” sidi khrü kenie la puo ketsewa. Sidi puoe puo zeko ze kijüthou gei vo di puo rüü phouse teiko la thekrü chü.

³⁹Khrü kenie sie puoe puo puo ki la vor, sidi rüsekewa tuoi puo gei chüwa. Mu puo mesa tsei di siata. Sidi hau se Israel nu thezho puo chü di

⁴⁰teicie kepra rüünuokoe zhadia Gilid Jeftha nuopfü krüketuo la prapraya.