Read Angami Naga Capiko 12 Bible Online

Capiko 12 - Angami Naga bible

Capiko 12

¹Efraimmiakoe uko rüpfhünuo kiekengulie di Zafon nu pralie di, Jeftha ki, “Kiüdi no hie bu n ze vonu hieko kie mo di pa Ammonko ze kegei ga? Hieko mi pie n ki theshü n tsütuo” sita.

²Sitse Jeftha-e uko ki, “A mu a themiako re se di Ammonko hie pese phi kevorko perhie. Derei a nieko kiekeshü ki, niekoe uko dzie nunu hie kelashü mo,

³mu nieko a kelashülie kelho ngushü tse, a thuo a phou khashü di Ammonko ze kegeituoü pra, ru Jihovae uko khapie adzie nu shüshü. Kiüdi nieko thie a ze kegeituoü parya ga?” ita.

⁴Sidi Jefthae Gilid nu themiako kie kengu phrelie di Efraim ze kegei, mu Gilidkoe Efraimko penyüwa, kekreilamonyü ukoe sie, “Nieko Gilidmia sü Efraim mu Manasseh donu solhimia zo” iketa la.

⁵Sidi Gilidkoe Efraim nu kepra Jordan dzüpfükecü chüko lielie. Mu Efraimmia taketuo huo vor di, “Hie bu praliecie” isiro Gilid themiakoe puo üse, “No Efraimmia me?” ituo. Puo uko ki “Mo” ishü ro,

⁶puo sie “Shiboleth” idi putuo, mu puo süu pu kemecielie mo di “Siboleth” ita ro, uko puo telie di Jordan dzüpfücü chau nunu puo dukhriwawatuo. Sidi süki nu uko Efraimmia nyie hiediaekenie geiwa.

⁷Jeftha-e cie sorou Israel capi chü. Sidi Jeftha, Gilid-ue siata, siro Gilid kijü nu puo nadiu nu puo khruwa.

⁸Jeftha se sie Bethlehemmia Ibzan-e Israel capi chü.

⁹Puo nuonuo thepfu ser nyi. Puo nuo thenu serko penyhü pie thinuo kekrei kishü, mu kekreira nu puo nuo thepfuko la thenu ser lie se vor puo nuo chü. Mu puoe cie thenie Israel capi chü.

¹⁰Siro Ibzan siata, di Bethlehem nu puo khruwa.

¹¹Tsiu puo se sie Zebulunmia Elon bu Israel capi chü; mu cie ker Israel capi chü.

¹²Sidi Zebulunmia Elon siata, di Zebulun kijü Aijalon nu puo khruwa.

¹³Puo sie Pirathonmia Hilel nuou Abdon bu Israel capi chü.

¹⁴Puo nuo thepfumia hiedia mu puo tsunuo thepfumia ser nyi, sükoe gada hiethetha seya; puo cie thetha Israel capi chü.

¹⁵Süsie Pirathonmia Hilel nuou Abdon siata, sidi Efraim nu Amalek kijüthou rüna Pirathon nu puo khruwa.