Read Angami Naga Capiko 13 Bible Online

Capiko 13 - Angami Naga bible

Capiko 13

¹Tsiu Israelmiakoe Jihova mhodzünu mha kesuo chü lata; süla Jihovae cie hiedia uko khapie Filistinko dzienu shüwa.

²Tsiu siro Dan seyiemia Manoa ücü puo Zora nu ba, mu puo kimia sü nuojüpfü puo di puo nuo tuo mo.

³Ru Jihova dielieu vor puo pengushü di puo ki, “No sü nuojüpfü puo zo; derei no tsie we nuonipfülietuo sidi thepfunuomia puo penuolietuo.

⁴Süla menuolie di khubezu morei zu kekuo puorei krie hie mu mha mesakemo puorei cü hie,

⁵noe nuonipfülie di thepfunuomia puo penuolietuokecü la. Tsiu tsüpfü pie puo tsügei shülie lho, kekreilamonyü u nuoyoe puo penuoshü tse nu Ukepenuopfü la kela kreipie Nazirmia chütatuo. Mu puoe Filistinmia dzie nunu Israelmia shüphra sede tatuokecü la” si.

⁶Sitse thenupfüe puo nupfu ki vor di puo ki, “Ukepenuopfü themia puo a ki vorlie, mu puo zie Ukepenuopfü dieliemia zie mhiei kemerie zo; puo kirapuonu vor shi a puo ketsoshü mote, mu puo za rei a ki pu mo;

⁷derei puo a ki, ‘Harie no nuonipfülietuo, sidi thepfunuomia puo penuolietuo, süla tsie khubezu morei zu kekuo krie hiecie, mu mesakemo puorei cü hie, kekreilamonyü unuoyoe puo penuokelie nunu puo se ketso Ukepenuopfü la Nazirmia[12] chü zotuokecü la’ isilie” sishü.

⁸Sitse Manoa-e Jihova ki cha di, “He-i Jihova, a n ki chaya, no ketsekeshü Ukepenuopfü themiau bu hieki la vorcie, sidi unuoyo penuolie ro kimhie di puo theketuo shiü hie pethashücie,” sishü.

⁹Sitse Ukepenuopfüe Manoa pfhe rünyülie, sidi Ukepenuopfü dielieu thenupfü puo lie nu ketuo ki puo ki vor, mu puo nupfu Manoa satuo mo.

¹⁰Sitse thenupfü ta rükri puo nupfu ki vo di sie, “Legei, mia puo hadzü a ki vorcüu la vor a pengushüte” sishü.

¹¹Mu Manoa-e sielie di puo kimia siemedzi vo themiau ki, “A kimia ki diepukeshüu no me?” sishü. Ru puoe “A we” isi.

¹²Sitse Manoa sie, “N dieko chü tsei vorlie ro, unuoyo kelhou mu puo mhatho kedipuo chütuo ga?” sishü.

¹³Sitse Jihova dielieue puo ki, “A n kimia ki pukeshü pete puo bu chü morosuo.

¹⁴Khubero geinu kepar mhapuorei puo bu cü hie, khubezu morei zu kekuo krie hie, mu mha mesakemo puorei cü hiecie. A puo ki pukeshü pete puo bu medziliecie” sishü.

¹⁵Manoa-e Jihova dielieu ki, “N pezierei hie pfhe zashücie, sidi hie bu n la temvünuo yopuo chashü n tsücie” sishü.

¹⁶Siru Jihova dielieu puo ki, “No n thuo a kenyhuopie tha zorei, a nie ca cülie lho; derei no kethe ruosuo puo kesetuo ro, chüpie Jihova tsücie” sishü. Manoa-e puo Jihova dieliemia puo ücü si ba mo.

¹⁷Süla puoe Jihova dielieu ketso di, “N za supuo ga? N dieko chüketho vorlie ro hie n rhulieketuo la” sishü.

¹⁸Sitse dielieue sie, “No kidi a za ketsoya ga? Süu le tsokeliepfü mo” ita.

¹⁹Sidi Manoa temvünuo kemedzü yopuo mu lhacülhale ruosuo selie di khapie ketsie puo geinu ruosuo chüpie u ngo[13] chüshüyakezhau[14] Jihova tsüshü.

²⁰Süu miüue tei kevatsa khota zhücü ki Manoa mu puo kimia unie süu meho ketha nu Jihova dielieue ruosuoba gei miu nunu khota; sitse Manoa mu puo kimia unie-e tsu kijü zerepfü zhüta.

²¹Süsie Jihova dielieue Manoa mu puo kimia unie pengu lashü mota ru Manoa-e süzenu Jihova dielieu ücü silie.

²²Sidi Manoa puo kimia ki, “Cüsie avu sü siata meciete, avu Jihova nguwate eru,” sita.

²³Derei puo kimiae puo ki, “Jihova avu biekhriwakecü le ro, puoe avu dzienu kethe ruosuo mu thoulha ruosuo khakeshüko lielie lho, morei mha hako pie avu pekielie lho; morei avu ki mha haikecü pulie lho mecie,” sita.

²⁴Sidi thenupfüe thepfunuomia puo penuoshü, di puo zathopie Samson chülie. Unuoyo memie sielie, mu Jihovae japie puo tsüshü.

²⁵Mu puoe Zora nu Eshtaol unie donu keba Mahaneh-dan nu baluokecü nu Jihova ruopfüu puo hüvüta.